Read BIBILLYA Mareiyo Meele a Iruva 1 VAMANGYI 20 Bible Online

1 VAMANGYI 20 - BIBILLYA Mareiyo Meele a Iruva bible

1 VAMANGYI 20

¹Naasa Ben-hadadi mangyi ya Shamu kasangirya vandu vakwe woose va fira. Nnang'ani yakwe kweifo vamangyi makumi araru na vavii amwi nawe; mitika na frasi kashingillya Samaria kaukapa fira.

²Karuma vandu kwa Ahabu mangyi ya Israeli, kammbia, Ben-hadadi niindo akerera.

³Fesa na saabu yafo ni fwakwa yeny. Vana vafo vesha na vaka vafo woose ni vakwa yeny.

⁴Mangyi ya Israeli karouwa kaamba, Ndesa kwaamba ni indo kikai mangyi nndumi wakwa; yeny ni wafo na fyoose shitiri ni fyafo.

⁵Ni dede mmbo sharuma vandu indi, Fesa, saabu, vaka na vana vafo fyoose mmbo kushiniingya yeny.

⁶Indilyo ndesi kyeeri sha ekyi shirumaa vandu kwafo mashinga afo, wokindo kisha efo mbee ya miso afo, mmbo vakamaraa vasheengye.

⁷Naasa mangyi ya Israeli kavaanga vamiku va uruka woose kaamba, A nkyelolen, ndesa nndu yeu atinnyo nggapanu, mashika mmbo akundye ikamara vaka vakwa, vana vakwa, fesa na saabu yakwa nta nshilenlemya-fo

⁸Vamiku na vandu vakwe woose vakammbia, kulaarannyi nta yiirikya-fo.

⁹Naasa kavia vandu valya va Ben-hadadi; Endevieny mangyi nndumi wakwa, Kilya kya mbee kyoose alekunda kwa ishinga lyakwwe kishuutika indo, indi ekyi kya kavii woode, kyo nshiidimaa itana-fo.

¹⁰Naasa, Ben-hadadi kanrumya vandu kaamba, yewe ni kimwi sha kilulyi kya Samaria kilaishwa kidau kyakwa,

¹¹Mangyi ya Israeli kaamba, mbieny nndu akemanya nsengo alashikushopye sha nndu akeeyuluula-fo

¹²Nawe Ben-hadadi ekiita mbony yeyo, eke ando kweniiya wari we na vamangyi, kavia vandu vakwe kudeesyeny, nawo vakakudeesya ikapa muri.

¹³Nalyo yeni nkisuku kasheya Ahabu mangyi ya Israeli, kaamba, Nndumi Iruva aamba indi, A ndesa kwallolya ndesa nsemu yeu wa vandu ngata ufye mwiingi? Lola ni yeny shakuvia, vandu eva woose mmbo kushevamamita, neewe llyo kumanyaa yeny mmbwe Nndumi Iruva.

¹⁴Ahabu kaamba, na finya ingai? Ni Nndumi iruva aamba indi, Vana vakoo va vashilyi va fyunngo. Nallyo kaambia, ni vi ashekapaa fira? Nawe kammbia, Ni yewe.

¹⁵Llo ereiya vakoo va vashilyi va fyuungo, nawo vefikye mayana avii makumi araru na vavii; kareiya-se vandu woose, vana va Israeli woose, nawo vefikye fiku mfungare.

¹⁶Vakakwipoo kwikee nsanyiny. Indi Ben-hadadi we kyeeri ekyi ni efo mmbeny ta wari ekai, emmenangwa; we na vamangyi valya makumi araru na vavii veshemweekya.

¹⁷Vakoo valya va vashilyi va fyunngo vakasongwa ikwiipo-fo, nawe Ben-hadadi karuma vandu, nawo vakaambia kwiifo vandu vankwiipo kunu Samaria.

¹⁸Vakaamba, kwakooya vakwiipo-fo na ufoo, vatireny veifo na muu, ao kwakooya vakwiipo-fo kwa fira, vatireny veifo na muu.

¹⁹Naasa vakoo valya vakakwiipo kulya muriny fira ikavalatya numa.

²⁰Vakakapa wo nndu umwi nndu wakwe;Vashami vakarisha na Israeli vakavalatya numa; Ben-hadadi mangyi ya Shamu kakyiiya asiise esaamye frasi, amwi na vesaama frasi vengyi.

²¹Mangyi ya Israeli kavakapa ngapo shiniini nnu frasi na mitika awo.

²²Nawe nkisuku ulya kasheya mangyi ya Israeli kammbia, Enda kwandekudeesya, yuumbya finya, mashika nkonu sha inu mwaaka eto ushaa mangyi ya Shamu ashekwiipoiyo fira.

²³Naasa mashinga a mangyi ya Shamu vakavia Iruva waao, ni iruva wa mafumbu, nkyo kimaruma lulekapwa lukavingwa, indi ulaalu mmbo lushekapannya urukeny kundo kulele, na kya dede ni kuti luvavinge.

²⁴Ulaalu tana indi, utafo vamangyi woose, na ando awo kuvike-u nniini wa fira.

²⁵Kwammaa itana indo, kudeesye vakoo vengyi vafye sha valya valefiiya fireny, na frasi tiveefye indo, na mitika iffye indo; neese lushekapannya kunu kundo kulele; neese ni kuti lushevavinga. Kaarannya unyanga lwawo na ivatannya indo.

²⁶Naasa mwaaka eto wasorya Ben-hadadi kasangirya itorito lya Vashami, kasaama kafika Afeki naambo nakapani na Israeli.

²⁷Vana va Israeli nawo vakakundeesya, vakaniingwa fisha, vakeenda ikapana nawo. Vana va Israeli vakyifika alya mbee yaawo vakalollya sha fironda fivii fya mbuu; indi-wo Vaashami vaishwa uruka shapu.

²⁸Kasha nndu wa Iruva kavia mangyi ya Israeli, Nndumi Iruva aamba-indi: Kimmba Vaashami vammamba, Nndumi Iruva ni Iruva wa mafumbuu, nta nshi Iruva wa uruka lulele, naakwa ni elyi vafye indo veengyi, mmbo nshevavikaa maakony any neeni mushevakomba kombi, llyo mumanyaa yeny mmbwe Nndumi Iruva.

²⁹Vakavika ulale vekulolaa ando a mikonu mfungare, kwikee nkonu wa mfungare fira fikapooka, vana va Israeli vakakapa Vaashami vandu vashendaa na marende vamaa fiku iyana nkonu umwi.

³⁰Valya vasaa-u vakarisha vakafika Afeki muriny, isimamba lyikawoya vandu makumi avii na mfungare valya vensaa-u. Nawe Ben-hadadi karisha kadeanga mmba kiryeny kya nnang'ani kulya muriny.

³¹Mashinga akwe vakammbia, lolate, mmbo lwammiitya sheeli vamangyi va Israeli, ni vamangyi vatiri ilillya, lwakutereva luraa makunnya fisiny na mikova nrony, lulatye mangyi ya Israeli kishiidimika nakukire muu wafo.

³²Naasa vakakufingya makunnya kisiny, na mikova nrony, vakalatya mangyi ya Israeli, vakaamba, Ishinga lyafo Ben-hadadi akutereva kunkire muu wakwe. Kaamba, A mmbo eefo na muu-da? Eto ni mwanama.

³³Vandu valya vekiita mbony ilya vakaiwarya swany, vakaangusya indouwa vakaamba, yee Mwanamau Ben-hadadi. Kaamba! Endeny mukamweende. Llyo Ben-hadadi esha nawe kansaamisa ikariny.

³⁴Nawe Ben-hadadi kammbia, Miri ilya ndeyaakwa alesoka ndeyeaafo mmbo shikuviirya, neewe kusheallwa Demaski kundo kwekaa. Ahabu kammbia, lukammirikyana indo shikulekeyaa. Naaasa vakalya mma nawe kallekeya.

³⁵Naasa nndu umwi wa vana va vakisuku kavia mwana wa nkisuku urooye shakutereva, kwa irina lya Nndumi Iruva, shikapa. Mwana ullya kalema inkapa.

³⁶Kammbia, kimmba kwalema yaarannya unyanga lwa Nndumi Iruva, mmbo shakuvia, elyi kusomuka yaandi kwakwa indi, mmbo kuwaawa mmiiso. Nawe ekisomuka alya kwakwe, miiso ikanlollya ikammbwaa.

³⁷Llyo elollya nndu ungyi; kammbia, shikapa, shakutereva. Nndu ulya kankapa, kankapa kutani ambika kishavere.

³⁸Naasa nkisuku ulya keenda ivereya mangyi shia eesikkey kisngu na soori naambo alamanyike.

³⁹Naasa mangyi eshiraa, kammbaanga nkisuku ulya kavaanga mangyi, kammbia, “Ishinga lyafo mmbo lyilesheengye nndu umwi yaandi amuuta efo nnang'ani ya fira; kashivia, mmbo kuringaa nndu yeu, keenda kareka, muu wafo mmbo uwuyaa ando a muu wakwe, ao kusheniingya talanta ya fesa.

⁴⁰Naasa ishinga lyafo lyirekye mashoreny engyi mave nndu ulya keenda kyakwe.” Mangyi ya Israeli, kammbia, “Ni indo kushekooya yuutywa uvingo, mashika kwankuutya uvingo kumuni.”

⁴¹Kakuporomwa swany soori ilya ekufingye kisangu mangyi ya Israeli kashemanya ate ni umwi wa vakisuku.

⁴²Kammbia, Nndumi Iruva aamba indi, Kimmba kwammulekeya, kooka maakony afo, nndu shemma ideesya naambo nakooye irumatwa deny, muu wafo mmbo uwuyaa ando a muu wakwe na vandu vafo ando a vandu vakwe.

⁴³Mangyi ya Israeli kakwiipo keenda kyeny kwakwe eke nrovye nriminy etirwa nngoo kafika Samaria.