Read BIBILLYA Mareiyo Meele a Iruva 1 VAMANGYI 9 Bible Online

1 VAMANGYI 9 - BIBILLYA Mareiyo Meele a Iruva bible

1 VAMANGYI 9

¹Naasa mangyi Davidi ekimaa itana mmba ya Iruva na mmba ya kimangyi, na findo fingyi fyoose ekundye itana,

²Nndumi Iruva kakora lyingyi nawe, shallya ekoora kulya Gibeoni.

³Nndumi Iruva kammbia, “Shammiita kiterewo kyafo. Shavauwa mmba yei kuleshitannya ive ando kwaishiindya llung'anu. Mmbo shiilolaa na iiringa kyeeri kyoose.

⁴Kwakooya kwashiindya na ishirundya kya wiindi, shaasa ndeye-afo Davidi, na ilatya mavavaso na wo kindo shaasa shilenkuvavasa.

⁵Mmbo nshiindyaa kyaasa kilya shevia ndoo Davidi, sheelyi mwiishillya Israeli kyeeri kyoose mmbo ashewonika efo mmba yakwe.

⁶Indi-lyo nkonu yewe ao ngyeeri yafo mushelemaa ishilatya, na yiindya mavavaso alya shilemuvavasa, mwishiindya maruva engyi;

⁷Mmbo nsheantaa vandu vakwa Israeli kunu urukeny elu shilemmaa ivaniinga. Naakwa ni mmba yeyo shilemmaa yiivauwa nshiyiisityo kwaasha. Musheararwa na yiinyalwa ni vandu kundo koose Israeli.

⁸Mmba yei mmbo ishewundukaa na iva irama, na wo nndu asheilollya; mmbo asheaukwaa na ivesa, a nkyokyi kilevutika kunu urukeny elu?

⁹Nawo mmbo vasherouwa, ni kimaruma valefuluta Iruva, Nndumi Iruva waawo eto alevauta kulya Misri. Vakasha-yiindya maruva engyi. Nkyo kileveengye vakakooya ngapo yei.”

¹⁰Ni myaaka makumi avii yesia, nawe Solomoni kamaa itana mmba tilya ivii, mmba ya Nndumi Iruva na mmba ya mangyi;

¹¹(naasa kyeeri kilya kyeni mangyi ya Tiro we Hiramu, emmengye mangyi Solomoni mieresi na miberoshi amwi na saabu shaasa ekundye), llyo Solomoni eniinga Hiramu miri makumi avii ya uruka lwa Galilaya.

¹²Nawe Hirimu kauka kulya Tiro keenda indelola miri ilya aleniingwa ni Solomoni nta ilakinsennyi.

¹³Kaamba, Mwanama miri-ki yei kuleshiniinga? Kafishya uruka lulya Kabuli fika inu.

¹⁴Hiramu kaengye mangyi talanta makumi arindaru ta saabu

¹⁵Nawe mmbo aleitikyo ni mangyi Solomoni kya itana mmba ya Nndumi Iruva, na mmba yakwe muni, na milo, na isimamba lya Yerusalemu, na Harori na Migido na Gezeri.

¹⁶Farao mangyi ya Misri kakapa taari ya ndoo katira Gezeri na iurumata na muro, kawaa Vakanaani valya vekee kulya muriny ulya, na muri eto kauniingya wikee ni masaa a mwana nka wa mangyi Solomoni.

¹⁷Nawe Solomoni katana-se Gezeri, na Beth-horoni ya sinde,

¹⁸na Baalathi na Tamari kulya Yudaya kasa koomu,

¹⁹na miri myoose kundo Solomoni evikye masaa akwe, na miri ya mitika yakwe, na miri ya vandu vakwe ewo vesaama frasi, na wo kindo Solomoni alekunda itana kulya Yerusalemu, na Lebanoni, na wo kundo etiri ushilyi.

²⁰Kya mbony ta vandu woose vesaaye-fo, Vaamori, Vahiti, Vaperezi, Vahivi, na Veyabusi, ewo valakee va vana va Israeli;

²¹na valya woose valesaa-fo kuloore vana va Israeli valeidima ivakapa Solomoni kavaallwa mashinga fika inu.

²²Indi wo vana va Israeli, Solomoni kavaallwa mmbo vandu va fira, ngyama takwe na vaniini vakwe, vashilyi vakwe, vaniini va mitika yakwe na vesaama frasi vakwe.

²³Vashilyi ewo vekee uwe ya mashora a Solomoni vefikye mayana araanu na makumi araanu; ewo vekee veesalallya vandu varunde mashora.

²⁴Indi numa wa Farao kasama muriny wa Davidi kandefika kulya mmba ilya yakwe entannywa ni Solomoni, naasa Solomoni katara turuve ya Milo.

²⁵Solomoni kava mwiniingya kiraso kyekora kararu wo mwaka; na kiraso kya ufoo uwe ya kitara kya irasya kilya aletannya Nndumi Iruva, kafumbira ufumba amwi na kiraso uwe ya kitara kya irasya mbee ya Nndumi Iruva. Naasa kamarisya mmba.

²⁶Na lyingyi mangyi Solomoni kasongosya merikebu efo Ezion-geberi kufii na Elothi, mbaambaa ya Yeeve ya Shamu, kulya urukeny lwa Edomu.

²⁷Nawe Hiramu kulya merikebuny karuma-fo varundi vakwe veeshi ikyeleya nisha vakasanga na varundi va Solomoni.

²⁸Vakafika Ofiri, vakandepoo-fo saabu, talanta mayana aana na makumi avii vakaengye mangyi Solomoni.