Read BIBILLYA Mareiyo Meele a Iruva 2 VAMANGYI 14 Bible Online

2 VAMANGYI 14 - BIBILLYA Mareiyo Meele a Iruva bible

2 VAMANGYI 14

¹Kwikee mwaaka wa kavii wa Yehoashi mwana wa Yehoasi mangyi ya Israeli Amasia mwana wa Yoashi mangyi ya Yuda llyo epooka ishillya.

²Nawe mmbo etiri myaaka makumi avii na iraaru; kyeeri alepooka ishillya; kashillya andu a myaaka makumi avii na kyeenda kulya Yerusalemu na irina lya maye evaangwa Yehoadani wa Yerusalemu.

³Katana mesha usanguny lwa Nndumi Iruva, indilyo nshi sha mangyi Davidi-fo; katana filya fyoose Yoashi we ndeye alekooya itana.

⁴Indilyo alya andu kwa uwe nkuleutwau-fo; vandu vakaengera iniingya firaso na ifumbira ufumba alya andu kukee uwe.

⁵Kyeeri ushilyi lwakwe lulekooya iwona finya, kawaa varundi valya valewaa mangyi we ndeye;

⁶indi mmbalewaa vana va vawai valya-fo, ndesa kikee kireiye yefo kyitabuny kya uvavaso lwa Mose, ndesa Nndumi Iruva, kyeyaamba, Vandeye valashefwa kimaruma kya makasha a vana vawo-fo, nta vana valasheefwa kimaruma kya makasha a vandeye vawo-fo indi wo nndu mmbo afwaa kya ukasha lwakwe we muni.

⁷Kawaa Vaedomi vandu fiku ikumi; kulya iimungony lya shumbi, katira Sela kwa finya, na andu alya kakufishya irina lyakwe Yoktheeli fika inu.

⁸Nalyo Amasia kaaruma vandu kwa Yehoashi mwana wa Yehoahasi mwana wa Yehu mangyi ya Israeli kyeyaamba. Osho lukwaanannye kisangu kwa kisangu.

⁹Nawe Yehoashi mangyi ya Israeli karuma kwa Amasia mangyi ya Yuda kyeyaamba mwiinga uveifo Lebanoni nkaruma kwa mweesi wekee Lebanoni kaamba, Shiniinga mfu wafo nave nka wa nsero wakwa; kakwiipo-fo nkiduva eke Lebanoni, kavarya mwiinga ulya.

¹⁰Ni dede kwambinga Edomu, na nrima wafo ukakurumisha; nkyoki kukundye mmwasi, kaanyefo kyeny kwafo. Nkyiki yelyi kukundye ikweengye nsindara kutani kushewaa yeve na Yuda na vandu vafo woose?

¹¹Indi Amasia kalema yiirikya. Naasa Yehoashi mangyi ya Israeli kasaama; vakakulola kisangu kwa kisangu, we na Amasia mangyi ya Yuda, kulya Beth-shemeshi ya Yuda.

¹²Israeli ikakaba Yuda, kutani wo nndu arisha na kyen kwakwe.

¹³Yehoashi mangyi ya Israeli kantira mifungwa Amasia mangyi ya yuda, mwana wa Yoashi mwana wa Ahasia, kulya Beth-shemeshi, kasha Yerusakemu, kuwunndwa isimamba wa Yerusalemu kapookya mwaango nniini wa Efraimu kutani kafika mbai ando a maako mayana aana.

¹⁴Keepoo-fo saabu shoose na fesa, na fyia fyoose filelollyo yefo mmba ya Nndumi Iruva; na umasi loose lwa mmba ya mangyi sanda ando amwi na vandu vakaaluwa masaa, kawuya Samaria.

¹⁵Naasa mbony shoose ta Yehoashi telesaa-fo, tilya alerunda, na wiidimi lwakwe, na ndesa alekabana na Amasia mangyi ya Yuda, a ndesa mmbo kulare fyereiywa yefo kyitabuny kya mikonu ya vamangyi va Israeli?

¹⁶Nawe Yehoashi kafwa kimwi sha vandeye karikwa kulya Samaria andu amwi na vamangyi va Israeli; na Yeroboamu mwana wakwe kashillya andu akwe.

¹⁷Nawe Amasia mwana wa Yoashi mangyi ya Yuda kaka-fo myaaka ikumi na iraanu ekimaa ifwa Yehoashi mwana wa Yehoahasi mangyi ya Israeli;

¹⁸Naasa mbony shoose ta Amasia telesaa-fo mmbo tilakeshireiye yefo kyitabuny kya mikonu ya vamangyi va Yuda?

¹⁹Vakamwaatya uriingyi uwe yakwe kulya Yerusalemu, nawe karisha kafika Lakishi, vandu vakarumwa vakafika Lakishi vakandemmbwai-yafo.

²⁰Vakammwende uwe ya frasi; kanderikwa kulya Yerusalemu andu amwi na vandeye vakwe kulyamurin wa Davidi.

²¹Na vandu va Yuda woose vakasaleesa Usia, nndu wa myaaka ikumi na irindaru, vakamwallwa nave mangyi andu a ndeye Amasia.

²²Nawe katana Elathi, kaviirya Vayuda mangyi ekifwa kimwi sha vandeye.

²³Kwikee mwaka wa ikumi na karaanu wa Amasia mwana wa Yoashi mangyi ya Israeli kapooka ishillya kulya Samaria; kashillya andu a myaaka makumi aana na umwi.

²⁴Katana makasha usanguny lwa Nndumi Iruva; sha llya aletana Yeroboamu mwana wa Nebati na kwa mitannye yeyo kateere vana va Israeli.

²⁵We kashesongosya nnyanu wa Israeli kupookya alya mwaangony wa Hamati kundefika yeeve lya Araba, usumanu na irero lya Nndumi Iruva, Iruva wa Israeli; alelyirera kwa kana kya nndundi wakwe Yona mwana wa Amitai, nkisuku wa kulya Gathi-heferi.

²⁶Nalyo Nndumi Iruva kalollya mavavio a vana va Israeli ndesa eke maroo; mashika kweifo mfungwa na alakee mfungwa-fo, nta umwi wa itarama Israeli-fo.

²⁷Nta Nndumi Iruva nnyalaamba ashekaa narumate irina lya Israeli Kwasi ya ngina-fo; indi kavakira kwa woko lwa Yeroboamu mwana wa Yehoashi.

²⁸Naasa mbony shoose ta Yeroboamu, tilesaa-fo, na shoose aletana na wiidimi lwakwe, na ngata aleidima ikabana, kaviirya-se Israeli Dameski na Hamati ilya yekee ya Yuda mapookyony, a ndesa! Mmbo filakee fireiye yefo kyitabuny kya mikonu kya vamangyi va Israeli?

²⁹Yeroboamu kafwa kimwi sha vandeye wo vamangyi va Israeli. Nawe Zekaria mwana wakwe kashillya andu akwe.