Read BIBILLYA Mareiyo Meele a Iruva 2 VAMANGYI 15 Bible Online

2 VAMANGYI 15 - BIBILLYA Mareiyo Meele a Iruva bible

2 VAMANGYI 15

¹Kwike mwaka wa makumi avii na mfungare wa Yeroboamu mangyi ya Israeli Usia, mwana wa Amasia kapooka ishillya Yuda.

²Mmbo etiri myaaka ikumi na irindaru kyeeri alepooka ishillya; kashillya myaaka makumi araanu na ivii kulya Yerusalemu. Na irina lya maye evaangwa Yekolia wa Yerusalemu.

³Katana mesha usanguny lwa Nndumi Iruva, mitannyi yakwe myoose ikavaka ya Amasia we ndeye,

⁴Indilyo alya andu kukee uwe, nkuleutwau-fo, vandu vakaengera iniingya firaso na ifumbira ufumba, alya andu kukee uwe.

⁵Nndumi Iruva kaengye mangyi ngapo katirwa ni ivave, kakaa mmba yakwe kyaanya kutani afwa. Na Yothamu mwana wa mangyi kaniingwa uniini lwa mmba, eshillya vandu va uruka.

⁶Naasa mitannyi myoose ya Usia ilesaa-fo, na ilya myoose aletana a ndesa nnyikee mireiye yefo kyitabuny kya mikonu ya vamangyi va Yuda?

⁷Usia kafwa kimwi sha vandeye; vakandika andu amwi na vandeye kulya muriny wa Davidi; na Yothamu mwana wakwe kashillya andu akwe.

⁸Kwikee mwaka wa makumi araru na nyanya wa Usia mangyi ya Yuda Sekaria mwana wa Yeroboamu kashillya Israeli kulya Samaria myiiri irindaru.

⁹Katana makasha usanguny lwa Nndumi Iruva, ngata ilya vandeye vetana; katana makasha sha alya a Yeroboamu mwana wa Nebati, alya etere vana va Israeli.

¹⁰Na Shalumu mwana wa Yabeshi kammbikya uriingyi, kankaba mbee ya vandu, kammbwaa, kashillya andu akwe.

¹¹Naasa findo fyoose Sekaria fyilesaa-fo, mmba fikee fireiye yefo kyitabuny mikonu ya va mangyi va Israeli.

¹²Yelyo llyo irero lya Nndumi Iruva alevia Yeu, eshaamba, Vana vafo mmbo vakaya kiri kya Israeli kyikava indo.

¹³Shalumu yeto mwana wa Yabeshi epooka ishillya kwikee mwaaka wa makumi aranu na kyeenda wa Usia mangyi ya Yuda, kashillya andu a mwiiri umwi kulya Samaria.

¹⁴Menahemu mwana wa Kati kasaama ooka Tirsa, kasha Samaria, kakaba Shalumu mwana wa Yabeshi kulya Samaria, kammbwaa, kashillya andu akwe.

¹⁵Naasa mbony shoose ta Shalumu tilesaa-fo, na uriingyi lwakwe mmbo fikee fieiye yefo kyitabuny kya mikonu ya vamangyi va Israeli.

¹⁶Nalyo Menahemu kakaba Tifsa, na valya woose veifo, kupookya minyanun ya Tirsa; kimaruma kya ilema kavakaba, na vaka veifo vakufingye woose kavabara ndeu.

¹⁷Kwikee mwaaka wa makumi araru na kyeenda wa Usia mangyi ya Yuda Menahemu mwana wa Kati kapooka ishillya Israeli, kashillya Samaria mwaka ikumi.

¹⁸Katana makasha mbee ya usangu lwa Nndumi Iruva; nalakunde irau ulyamari lwa Yeroboamu mwana wa Nebati mikonu myoose aleshillya, kaenngye vana va Israeli vakateere.

¹⁹Nawe Pulu mangyi ya Ashuru kasha ikapa uruka llwa, nawe Menahemu kaniingya mangyi Pulu talanta kiku ta fesa, lutire finya mmwasi.

²⁰Menahemu mmbo alesangirya fesa yeto tuuka maakony a vana va Israeli, valya woose, vatiri wiidimi lwa masaa, wo nndu kaniingya shekeli makumi araanu ta fesa; teniingya mangyi ya Ashuru. Naasa mangyi kakwiipoo kulya, kawuya urukeny lwake.

²¹Naasa mbony shoose ta Menahemu telesaafo, na tilya shoose aleidima irunda, mmbo tilakeshireiye yefo kyitabunykya mikonu ya Vamangyi va Israeli.

²²Nalyo Menahemu kalala kimwi sha vandeye, na Pekahiali mwana wakwe kashillya andu akwe.

²³Kwikee mwaka wa makumi araanu wa Usia mangyi ya Yuda Pekahiali mwana wa Menahemu kapooka ishillya Israeli kulya Samaria, nawe kashillya myaaka ivii.

²⁴Mashora akwe akava makasha mbee ya usangu lwa Nndumi Iruva; nta nalakunde ilakana na ulyamari lwa Yeroboamu, mwana wa Nebati, kaengye vana va Israeli vakateere vakanyamara.

²⁵Pekali mwana wa Remahali eke na vasikari makumi araanu kulya Giliard, vakandemmbikya shila kirisi ya immbwa kulya Samaria vekee kimwi na Arikobu na Arie; kammbwaa, kashillya andu akwe.

²⁶Naasa mbony shoose ta Pekahialitlesaafo, na tilya shoose aleidima irunda lola mmbo tikeshireiye yefo kyitabuny kya mikonu ya vamangyi va Israeli.

²⁷Kwikee mwaka wa makumi araanu na kavii wa Usia mangyi ya Yuda Peka mwana wa Remalia Tigkapooka ishillya Israelli kulya Samaria; kashillya myaaka makumi avii.

²⁸Naasa katana fya ulyamari usanguny lwa Nndumi Iruva; nta alakunde ilakana na ulyamari lwa Yeroboamu mwana wa Nebati, kaengye vana va Israeli vakateere/vakanyamara.

²⁹Kyeeri kya mikonu ya Peka mangyi ya Israeli kasha Tiglathpileseri mangyi ya Ashuru, lyoni, na Abel-beth-maaka na Yanra, na Kedeshi na Hasori, na Galilaya, na uruka loose lwa Naftali, kasamisa-fo vandu ewo woose fika Ashuru.

³⁰Nawe Hoshera mwana wa Ela kariingya Peka mwana wa Remaeli, kankapa kammbwa, kashillya andu akwe kwikee mwaka wa makumi avii wa Yothamu mwana wa Usia.

³¹Naasa mbony shoose ta Peka tilesaa-fo, na tilya shoose, aleidima itana lola, mmbo tikeshireiye yefo kyitabuny kya nikonu ya vamangyi va Israeli.

³²Kwikee mwaka wa kavii wa Peka mwana wa Remalia mangyi ya Israeli Yothamu mwana wa Usia llyo mangyi ya Yuda epooka ishillya.

³³Etiri myaaka makumi avii na iraanu kyeeri alepooka ishillya, kashiillya myaaka ikumi na irindaru yefo Yerusalemu; na irina lya maaye evaangwa Yerusha mfu wa Sadoki.

³⁴Katana fya usha usanguny lwa Nndumi Iruva; katana fyoose sha filya aletana Usia we ndeye.

³⁵Indi andu kukee uwe nkuleutwau-fo; kukava ni andu kwa vandu kwa iniingya kiraso kya ifumbira ufumba alya andu kukee uwe. Mmbwe aletana mwaango nniini wa uwe wa mmba ya Nndumi Iruva.

³⁶Naasa mbony shoose ta Yothamu tilesaa-fo, na tilya alerunda mmbo tilakeshireiye yefo kyitabuny kya mikonu kya vamangyi va yuda?

³⁷Kasha yeko Nndumi Iruva kapooka inruma nndu isuma mbony ta Yuda Resini mangyi ya Shamu, na Peka mwana wa Remalia.

³⁸Yothamu kawa kimwi sha vandeye, kaarwa andu amwi na vandeye kulya muriny wa Davidi we ndeye. Na Ahasi mwana wakwe kashillya andu akwe.