Read BIBILLYA Mareiyo Meele a Iruva 2 VAMANGYI 16 Bible Online

2 VAMANGYI 16 - BIBILLYA Mareiyo Meele a Iruva bible

2 VAMANGYI 16

¹Kwikee mwaka wa ikumi na mfungara wa Peka mwana wa Remalia, llyo Ahasi mwana wa Yothamu mangyi ya Yuda, epooka ishillya.

²Ahasi mmbo etiri myaaka makumi avii kyeeri epooka ishillya, nawe kashillya Yerusalemu myaaka ikumi na irindaru; nta alakunde itana fya usha usanguny lwa Nndumi Iruva, Iruva wakwe, sha Davidi we ndeye.

³Kalatya shia ta vamangyi va Israeli, naakwa ni mwana wakwe kashemwiita uwe ya muro, karasa sha vandu va nndeny valya Nndumi Iruva alevaumbuta mbee ya usangu lwa vana va Israeli.

⁴Nawe kasheniingya kiraso kya ifumbira ufumba yoo kitareny kyeerasya, na fidoorony, na wo andu kutiri nri uteri ushu.

⁵Naasa Resini mangyi ya Shamu na Peka mwana wa Remalia, mangyi ya Israeli, vakasanga amwi naambo vakabe Yerusalemu indi mangyi Ahasi kavalimba finya.

⁶Kyeeri kilya kyeni Resini mangyi ya Shamu kaviirya Vaashemi uruka lwawo Elathi, kaanta-fo Vayuda, nawo Vaashami vakasha Elathi kundo vakai kufike inu.

⁷Naasa Ahasi karuma vandu kwa Tiglath-pileseri, mangyi ya Ashuru, kaamba, “Yeny ni nndundi na mwana wafo, osho kwasheshitarama kushilete maakony a mangyi ya Shamu, na maakony a mangyi ya Israeli, eva vakeshikaba.”

⁸Nawe Ahasi keepoo fesa na saabu ilya ilekooywa yefo mmba ya Nndumi Iruva, na yefo umasiny loose lwa mmba ya mangyi, kanderwaaya mangyi ya Ashuru kikee kindo kya pya.

⁹Nawe mangyi yeto wa Ashuru kamwiirikya; kandekaba Damaski, kautira, na ikamara vandu vakwe woose mifungwa fika Viri na Resini mangyi ya Misri kawaawa.

¹⁰Mangyi Ahasi keenda Dameski indekwanannya na Tiglath-pileseri mangyi ya Ashuru, kandelollya-fo kitara kyeerasya kya efo Dameski. Mangyi Ahasi kyeengye Uria we Kuani kitara kilya kyeerasya ngata kikee kisongosye, na urango lwa vayo loose.

¹¹Nawe Uria kuani, katana kitara kyeerasya kya ngata ilya sheni aleengye mangyi Ahasi oota Dameski.

¹²Nalyo mangyi ekiwuya ooka Dameski mangyi kalollya kitara kilya kyeerasya mangyi kaserikya kufii ya kitara kilya kyeerasya, nawe kautya-u kiraso uwe yavayo.

¹³Kamamita kiraso kyakwe kyeemamitwa na kiraso kyakwe kya nswa, kaletya-u kiraso kyakwe kya ina, kashoshotya-u samu ya kiraso kyakwe kya ufoo yoo uwe ya kitara kyeerasya.

¹⁴Na kitara kilya kyeerasya kya arera kyekee mbee ya Nndumi Iruva, kakyeende kyuuka mbee ya mmba ya Nndumi Iruva, kakyeende kyuuka mbee ya mmba kyuuka nnang'ani ya kitara kyakwe muni kyeerasya na mmba ya Nndumi Iruva, kakyivika taari ya ndoo ya kitara kyakwe kyeerasya.

¹⁵Mangyi Ahasi kavia Uria kuani na kuti, eshaamba, “Uwe ya kitara kyeerasya yekyo kiniini mamita kiraso kya imamitwa kya ngama, na kiraso kya nswa, kwa nkwaany, na kiraso kya mangyi kya imamita, na kiraso kyakwe kya nswa, sanda na kiraso kya kyeemamitwa kya vandu woose va uruka, na kiraaso kyawo kya nswa, na firaso fyawo fya ina, kuletye uwe yakwe samu shoose yashishwa, indilyo kitara kyeerasya kilya kya arera kikaa kwakwa yeny naambo shindeivesya-fo.”

¹⁶Uria koani katana indo, ngata aleitikyo mmangyi Ahasi.

¹⁷Mangyi Ahasi kamanya rungo ta kitima kilya, koota birika ilya uwe ya vayo, koolota-si yeeve yuuka uwe ya shau ta arera tilya tekee kwasi ya vayo, kaivika uwe ya sumbai yam awe.

¹⁸Na yefo mmba yeyo vakatana-fo andu kweyuutya mwiindye, na andu kwa mangyi kweyaa-nga fikakulola na mmba ya Nndumi Iruva, kimaruma kya mangyi ya Ashuru.

¹⁹Naasa mbony shoose ta Ahasi, telesaa-fo na tilya alerunda mmbo tilakeshireiye yefo kyitabuny kya mikonu kya vamangyi va Yuda?

²⁰Ahasi kafwa kimwi sha vandeye, kaarwa andu amwi na vandeye kulya muriny wa Davidi; na Esekia mwana wakwe kashillya andu akwe.