Read BIBILLYA Mareiyo Meele a Iruva 2 VAMANGYI 17 Bible Online

2 VAMANGYI 17 - BIBILLYA Mareiyo Meele a Iruva bible

2 VAMANGYI 17

¹Kwikee mwaka wa ikumi na kavii wa ushilyi lwa Ahasi mangyi ya Yuda, Hoshea mwana wa Ela llyo epooka ishillya Israeli kulya Samaria; kashillya myaaka kyeenda.

²Katana ulyamari mbee ya usangu lwa Nndumi Iruva, lyo nkilefikya kya vamangyi va Israeli valya venshillya mbee yakwe-fo.

³Nawe Shalmanesa mangyi ya Ashuru kashellamya Hoshea kasheva nndundi wakwe, weesana usanu.

⁴Mangyi ya Ashuru katirya Hoshea kififi, mashika enruma nrumi ka So, mangyi ya Misri, nta nalakunde imwengye usanu, ndesa yekee miishivire yakwe wo mwaka, kweekyo mangyi ya ashuru kantira kamweera kifingyony.

⁵Llyo mangyi ya Ashuru esaama kandetira uruka loose, keenda katira Samaria myaaka iraru.

⁶Kwikee mwaka wa kyeenda wa Hoshea, mangyi yeyo ya Ashuru ikalamya Samaria, kasamisa Veesraeli fika Ashiri, kandevavika kulya Hala na Habori, kufii na mureny wa Gosani, na miriny ya Vamedi.

⁷Kyeutika indo kimaruma kya ulyamari lwa vana va Israeli ventannya Nndumi Iruva, Iruva waawo, yeto alewoota Misri ushingeny lwa mangyi Farao, vakalakana na marua engyi a wongo.

⁸Vakasora mavavaso a vandu va masanga, valya nndumi Iruva emmbanta mbee ya vana va Israeli na mavavaso alya venloshwa mmbamangyi va Israeli.

⁹Na lyingyi vana va Israeli, kwa kirisi vakatana findo fikasha uwe ya Nndumi Iruva, Iruva waawo, Vakatana andu kwa uwe yefo miriny yawo myoose, kupookya kwa velala shoovi na miri myoose.

¹⁰Vakasaleesa ngota maashera uwe yaawo kidooro kyaasha, na kwasi yaawo nri utiri kirishe

¹¹Vakafumbira ufumba kulya wo andu kukee uwe, mitannyi ya vandu va masanga Nndumi Iruva kavanta mbee yaawo vakatana fya makasha, mmbo

¹²vakarundya mafwanu, findo Nndumi Iruva emmbeema, kaamba, “Mulasheetana kindo ekyi-fo”

¹³Kilanya ya fyaoose Nndumi Iruva karuma vakisuku na velola, indevavasa Israeli na Yuda kwa kana kyao eshaambaa, “Alashikeny mure-fo shia tany shikasha, mulatye mavavaso na miirumbuye yakwa, songosiny sha ilya shilevavasya vandeye vany, shavarikya kwa kana kya vakisuku varundi vakwa.”

¹⁴Indilyo nta valakunde yaarannya, vakava va nria muumuu ngata ya vandeye vawo, valakusirye Nndumi Iruva, Iruva waawo.

¹⁵Vakalema mavavaso akwe, na kyaasa kyakwe llya emmbikyana na vandeye vawo; na kureekyi takwe emmbakureekya vakalatya fya wongo sha vandu va masanga vakava kimwi sha-wo, valya Nndumi Iruva emmbeema valatani shawo.

¹⁶Vakamina mavavaso moose a-Nndumi Iruva, Iruva waawo vakakusongosya mafwanu, a ngashe ivii, vakasongosya Ashera, isanga lya iruveeu lyoose vakaindya Baali.

¹⁷Vakakora vana vawo va kyuumi na va kyika, uwe ya muro, vekapaa ramli nata ya usavi, vakakukumba veni na veni, naambo vaidimi itana makasha mbee ya usangu lwa Nndumi Iruva, kutani atirwa ni unyafi.

¹⁸Nawe Nndumi Iruva kanyafukwa nnu kya Israeli, kavasamisa kwaasha na usangu lwakwe; kulave-fo nndu alesaa-fo kuuta valya va mmba ya Yuda sheni.

¹⁹Naakwa ni vandu va Yuda nawo mmbalekiindya mavavaso a Nndumi Iruva, Iruva waawo-fo, mmbo valelatya mikaaye ilya yemmeendwa-fo mmbandu va Israeli.

²⁰Naasa Nndumi Iruva kasua ngeeri shoose ya mmba ya Israeli, kavalyisa ukiva kutani andeveera maakony vetuuro.

²¹Llya alelakanisa mmba ya Israeli na mmba ya Davidi; naweo vakaallwa Yeroboamu mwana wa Nebati nave mangyi; Yeroboamu kafuluta makusaro a Vaisraeli valashelatya Nndumi Iruva, kaveengye ulyamari uniini.

²²Nawo vana va Israeli vakaengera itana ngyulyamari toose ta Yeroboamu tya aletana; valakunde ilakana nato,

²³kutani Nndumi Iruva aumbuta vana va Israeli mbee ya usanguny lwakwe, ndesa llya emmaamba kwa kana kya varundi vakisuku wakwe woose. Naasa Vaisraeli vakakurikwa mifungwa wooka urukeny lwawo veni yeenda Ashuru kutani inu.

²⁴Nawe mangyi ya Ashuru keende vandu wooka Babilony, na Kutha, na Ava, na Hamati, na Sefarvaimu, kavavika kulya miriny ya Samaria andu a vana va Israeli; vakatira Samaria vakakaa yefo miriny yakwe.

²⁵Naasa kyeeri vekipooka ikaa kulya, vakarekywa yiindya Nndumi Iruva; kweekyo Nndumi Iruva karika-fo miiso nnang'ani yaawo, na maata vakawaawa.

²⁶Kweekyo kavia mangyi ya Ashuru vakaamba, “valya kulesamisya na ivavika kunu miriny ya Vasamaria-le mmbaishi miishivire ya iruva wa uruka-fo, kweekyo ammbarikya miiso nnang'ani yaawo, nalyo veefo vawaawa, kimaruma valeeshi miishivire ya Iruva wa uruka lwawo.”

²⁷Nalyo mangyi kaniingya ishingo kaamba, “Ruminy umwi wa Valori valya mulevakamara wooka kulya, andekaa-fo, evaloshaa miishivire ya iruva wa uruka lwawo.”

²⁸Naasa umwi wa valori aleepowa ooka kulya Samaria keenda kandekaa kulya Betheli kavalosha ngata kikwaani yiindya Nndumi Iruva

²⁹Naakwa ni indo vandu va wo isanga vakakusongosya maruva awo veni vakavavika mmba andu kwa uwe ngata Vasamaria vansongosya, wo isanga yefo miriny yaawo kundo vekai.

³⁰Vandu va Babilony vaktana Sukothi-benothi kava iruva waawo, vandu va Kutha vakatana Nergali, vandu va Hamati vakatana Ashima,

³¹Vaavi vakatana Nibhasi na Tartaki; nawo Vasefarvi vakakora vana vawo murony kwa Adrameleki na anameleki, marua a Sefarvaimu.

³²Kweekyo vakaindya Nndumi Iruva, na vengyi nnang'ani yaawo vakakwallwa vakohani va andu kwa uwe, ewo vakawautya kiraso efo mmba ta andu kwa uwe.

³³Vakaindya Nndumi Iruva na kunu veefo veshiindya maruva awo veni ndesa kyekee mishivire yaawo kulya kundo valesamisywa

³⁴Kufike inu Nndumi Iruva mmbo vakeetana ndesa vemmiishivya llya mbee. Mmbakeiryaa Nndumi Iruva-fo, nta mmbakeelatya miishivire yaawo-fo, nta mirumbuye yaawo-fo, nta miloshye nta ivavaso llya Nndumi Iruva emmbavasya vana va Yakobo ulya emmbaanga Israeli-fo.

³⁵Valya Nndumi Iruva elya mma nawo, kavavavasa kaamba, “Mulaindye maruva engyi nta iareya nta yaarundya nta iautya firaso

³⁶kuuta we Nndumi Iruva, ulya alemweende muuka urukeny lwa Misri kwa finya shiingyi na kwa woko loorokye; we mmbwe mushemwiindya na imwereya, we mmbwe mushemuutya firaso.

³⁷Miloshye mirumbuye na miishivire na mavavaso alya alemureyya, nto mushetitiraa mikonu myoose fika llung'anu, nta mulaindye maruva engyi-fo,

³⁸Na mma yei lwavikyana mulalyirekywa. Nta mulaindye maruva engyi-fo,

³⁹Indi Nndumi Iruva, Iruva waany, mmbwe mumwiindyaa nawe ashemukiraa uka maakony a vakiduva vany woose.”

⁴⁰Naakwa ni indo mmbalekunda yaarannya-fo, mmbo valengera itana ndesa veishivye uka mbee.

⁴¹Naasa masanga yaandi vakaindya Nndumi Iruva, lyo mmbalelakana na mafwanu awo eepasha-fo, wo na vana vawo, na vana va vana vawo vakalatya ndesa vandeye vawo vetana, nawo ni indo vaketana kufike inu.