Read BIBILLYA Mareiyo Meele a Iruva 2 VAMANGYI 20 Bible Online

2 VAMANGYI 20 - BIBILLYA Mareiyo Meele a Iruva bible

2 VAMANGYI 20

¹Fyeeri yefyo mangyi Esekia kalwaa kufii na ifwa, nkisuku Isaya mwana wa Amosi kansheya, kammbia Nndumi Iruva, aamba indi; “Songosya mbony ta mmba yafo kukeefwa nta nkukeekya-fo.”

²Naasa Esekia kaindutya kisangu kyakwe neefo isimambeny wa mmba, katereva Nndumi Iruva, eshaamba,

³“Shakutereva, woi Nndumi Iruva, kukummbwe ulaalu, myeengye yakwa usanguny lwafo na ngata shilerunda kya dede na usumanu yefo mashoreny akwa na yewe kumuni fikakusennya” Esekia kafua nnu nnu.

⁴Kulare, Isaya ansomuka ooka kulya kari ka muri ulya irero lya Nndumi Iruva lyikansheya lyishaamba:

⁵“Wuya kundevia Esekia nsongoru wa vandu vakwa, Nndumi Iruva, Iruva wa Davidi, we ndoo aamba indi; Shammiita fiterewo fyafo, shalollya na misoru yafo; lola shikushiisa, na nkonu wa kararu kushesaama na yefo mmba ya Nndumi Iruva.

⁶Mmwasi shishekwengyeryaa suku tafo andu a myaaka ikumi na iraanu na yeny shishekukira yewe na muri yeu na finya ya mangyi ya Ashuru, shisheringa muri yeu kimaruma kyakwa na kimaruma kya Davidi nndundi wakwa.”

⁷Nawe Isaya kaamba, “Endeny nkate wa mafura muusongosye, nalye naambo nakooye isalala.”

⁸Esekia kavia Isaya, “A ndesa! Mmbo shilollyaa wende-ki shimanye sheelyi Nndumi Iruva ashishiisaa na nkonu wa kararu shisaami na yefo mmba yakwe?”

⁹Isaya kammbia, “Kya mbony yei mmbo kulollya wende luuka kwa Nndumi Iruva, sheelyi Nndumi Iruva ashetana yekyo aamba; ndesa kirishe kikeenda mbee fitere ikumi, ao kikawuya numa fitere ikumi?”

¹⁰Esekia karouwa, “Nkyingakyi kyaangu nkirishe kyeende mbee fitere ikumi; oonde kirishe yekyo kiwuye numa fitere ikumi.”

¹¹Nkisuku Isaya katereva Nndumi Iruva; kaviira kirishe kilya numa fitere ikumi, kilya kyemmoloka fitereny fya Ahasi.

¹²Kyeeri yekyo Merodak-baladani mwana wa Baladani mangyi ya Babilony karuma barrwa na findo fya pya kwa Esekia mashika emmiita sheelyi Esekia alwee.

¹³Esekia kavawarya, kavaora mmba na umasi lwakwe loose, fesa saabu na mafura afwaama nisha, fisha fya fira na filya fyoose filekooywa yefo mmba yakwe ya isuruma findo; nkulesaa-fo kindo kimwi kya umangyi lwakwe kulare Esekia alewoora-fo.

¹⁴Naasa nkisuku Isaya keenda kwa mangyi Esekia, kaambia, “Nkyokyi vandu yeva vakeyaamba? A mmbo wooka-kwi vakasha kwafo.?” Nawe Esekia kaamba, “Wooka urukeny lwa Babilony.”

¹⁵Kammbia, “Nkyokyi vallollya yefo mmba kwafo?” Nawe Esekia karouwa kaamba, “Vallollya wok indo kikee yefo mmba kwakwa; nkwiifo kindo yefo mmba yakwa yeesuruma findo kulare shawoora-fo.”

¹⁶Naasa Isaya kavia Esekia, “Aranya irero lya Nndumi Iruva:

¹⁷Lolaan kwiifo mikonu ikeesha, findo fyoose yefo mmba kwafo, na filya nde yaafo ensangirya kufike inu, mmbo fishiipowa firawa Babilony; nkisaa-fo kindo kimwi-fo, ni Nndumi Iruva aamba.

¹⁸Na vana vafo maata, yewo kuvawonnye kumuni, vashekamarwaa mifungwa, vasheva mashinga yeefo Babilony mmba ya kimangyi,”

¹⁹Naasa Esekia kavia Isaya, “Irero lya Nndumi Iruva yelyo kwaamba ni isha.” Mmbo ekusara, “Ukiva nkwi lukai, kwakooya kwiifo ufoo na uringyi yefo muuny mbwakwa?”

²⁰Mbony toose ta Esekia tilesaa-fo, na widimi lwa mashora moose, na ngata alesongosya kirori kya mura na yeende mura kafita muriny mmbo filakee fireiye yefo kyitabuny kya mikonu kya vamangyi va Yuda?

²¹Naasa Esekia kafwa kimwi sha vandeye na Manaseh mwana wakwe kashillya ando akwe.