Read BIBILLYA Mareiyo Meele a Iruva 2 VAMANGYI 22 Bible Online

2 VAMANGYI 22 - BIBILLYA Mareiyo Meele a Iruva bible

2 VAMANGYI 22

¹Yosia etiri myaaka nyanya kyeeri epooka ishillya, kashillya Yerusalemu myaaka makumi araru na umwi; Na irina lya maye evangwaa Yedida, mfu wa Adaya wa Boskathi.

²Katana fya usumanu mbee ya usangu lwa Nndumi Iruva, kalatya ngyayo ta Davidi we ndeye, kuleefo yaangya mbai taari ya woko usha au umuso.

³Kwikee mwaaka wa ikumwi na nyanya wa ushilyi lwa mangyi Yosia, mangyi karuma Shafani, mwana wa Asalia, mwana wa Meshulamu mwireiya mbony kyeny kwa mangyi andemmbya.

⁴“Neende kwa Hilkia nkohani nniini naambo nandeekyena fesa toose yeto teendwa yefo mmba kwa Nndumi Iruva, yeto veesangirya vawaryaa tuuka yefo kwa vandu;

⁵nalyo vandeniingya fesa yeto maakon a varundi valya veesallya mmba ya Nndumi Iruva; Vandeniingywa varundi valya vakee yefo mmba ya Nndumi Iruva; naambo vaidimi isongosya andu alya kulyamarikye yefo mmba;

⁶Vanningywa veetana mmba, vepasha, na veefisha mawe, naambo vandoora miri na mawe amma ipashwa naambo vasongosye mmba.

⁷Indilyo mmbaleveswa mbony ta fesa tilya valerambikywa-fo; mashika mmbo valerunda nato kya usumanu den.”

⁸Nawe Hilkia, nkohani nniini, kavia Shafani, “Shalollya kyitabu kya mavavaso. Kulya mmba ya Nndumi Iruva.” Hilkia, kaniingya Shafani kyitabu, nawe kakyisoma.

⁹Shafani mwiireiya mbony keenda kwa mangyi, kavia mangyi, “Varundi valya vafo vanningya fesa tilya tilekooywa kunu mmba, nawo vakaniingya varundi valya vekee kunu mmba vesalallya mashora yaa a mmba ya Nndumi Iruva.”

¹⁰Naasa Shafani we mwiireiya mbony kavia mangyi, “Hilkia nkohani anshiniingya kyitabu.” Nawe Shafani kakyisoma mbee ya mangyi.

¹¹Naasa mangyi ekiita marero alya a kyitabu kya mavavaso karanndwa soori takwe.

¹²Nawe mangyi kavia, Hilkia we nkohani na Ahikamu mwana wa Shafani, na Akibori mwana wa Mikaya na Shafani mwiireiya mbony, na Asia we ishinga lya mangyi, kaamba,

¹³“Endeny mukandevesa kwa Nndumi Iruva, na kya vandu woose va Yudaya kya mbony na marero moose yoo alelollya yefo kyitabun yekyo; mashika mmbo Nndumi Iruva antirwa nngoo shiniini kimaruma kyeeru, yelyi kulare vandeye veru valekunda ilola marero a kyitabu yekyi na itana fyoose ngata valereikywa.”

¹⁴Nalyo Hilkia we nkohani, na Ahikamu, na Akibori, na Shafani, na Asaia vakeenda kwa nkohani wa kyika Hulda nka wa Shallum mwana wa Tikvah, mwana wa Harhas, mwitokopa isara lya mangyi; (nawe eke kufii deny na yoondo Yerusalemu) nawo vakarera nawe. Naasa karera nawo kavavia

¹⁵“Nndumi Iruva aamba indi, Iruva wa Israeli: Via nndu ulya alekuruma kwakwa, Nndumi Iruva mmbo aamba indi,

¹⁶Lola mmbo nsheende ngapo ya urukeny yelu na vandu veefo na marero moose a kyitabu kilya mangyi ya Yudaya alesoma.

¹⁷Kimmba valeshimina yei, vakandeinndya maruva engyi a wongo, vakarunda mashora yoo na maako awo kyeshirosya ngoo, mmbo vashekooya ngapo ilasia.

¹⁸Naasan kya Mangyi ya Yudaya yeto alekuruma kundevesa kya Nndumi Iruva, kundemmbya mmbo Nndumi Iruva aamba, Iruva wa Israeli: Kyeendwa ni marero yoo kulemmita na nrima wafo ukakurya

¹⁹na ikunyiisa mbee ya Nndumi Iruva, llya kuleeta ndesa asheende ngapo niini kunu urukeny yelu na vandu veefo woose, neewe kimmba kwankurya na ikunyiisa mbee yakwa na yen Nndumi Iruva shankusarya.

²⁰Kweekyo ulaalu mmbo nshemuumbya andu amwi yewe na vandeye vany yefo fifuny fyan, nta mmushekaa mulollye na miso any ngapo yeti shishendee kunu-fo.” Naasa vakawuya na irero yelyo kwa mangyi.