Read BIBILLYA Mareiyo Meele a Iruva 2 VAMANGYI 23 Bible Online

2 VAMANGYI 23 - BIBILLYA Mareiyo Meele a Iruva bible

2 VAMANGYI 23

¹Naasa mangyi kavaanga vashilyi va Yudaya woose na Yerusalemu vakashekuumbya amwi alya kwakwe.

²Nawe mangyi kasaama kaalukya uwe mmba ya Nndumi Iruva; andu amwi nawe vandu va Yudaya woose na woose vasammyi Yerusalemu, na vakohani na vakisuku woose na vandu woose vandu vaniini nawe kavasomya marero moose a kyitabu kilya kya mma kilekooywa kulya mmba ya Nndumi Iruva.

³Mangyi kasalala kufii na ngo, kalya mma usangun lwa Nnumi Iruva, kyailatya Nndumi Iruva, nayiindya mavavaso akwe; na ngyukureeki takwe, na mavavaso akwe, kwa nrima wakwe den, na kwa ngoo yakwe shoose na isalallya marero a mma yeyo ndesa akee mareiye yefo kyitabun yekyo; nawo vandu woose vakirikya mma ilya.

⁴Naasa, mangyi kavikya Hilkia, nkohani nniini ishingo, na makoon a kwasi, na varingi vesalala yefo kishikony; sheelyi wo nndu moose naniingye yefo mmba ya Nndumi Iruva findo fyoose filesongosywa kimaruma kya Baali na kimaruma kya Ashera; na kimaruma kya itorito, lyoose lya iruveeu; kafiparya muro yefo na Yerusalemu na yefo mareminya Kidroni; kaipoo ifu lyavayo fika Betheli.

⁵Kandeumbuta-fo makohani valya woose veshiindyaa mafwanu, valya vemmbikwa-fo mmbamangyi va Yudaya naambo vafumbirise ufumba andu kwa uwe, yefo mirin ya Yudaya, na wo andu, taari toose ta Yerusalemu, na valya woose valefumbirisya Baali ufumba na nkyeere, na mwiiri, na nyinyiri ta wo ngata ta yefo iruveeu.

⁶Nawe kandesomuta-fo Ashera kulya mmba ya Nndumi Iruva, kwaasha na Yerusalemu fika kulya Kidroni, kaiparya muro kulya kimuren kya Kidroni, kasais ive kiluulyi, kandeera kiluulyi kilya uwe ya fifu fya vandu.

⁷Nawe kawunndwa mmba ta vaka va shia valya vakee kulya mmba ya Nndumi Iruva vefumaa fitambaa fya matirisha a Ashera.

⁸Kandeumbuta-fo makohani woose kulya mirin ya Yuda, kawunndwa kulya uwe kundo kweerasya, kulya makohani woose vakorya ufumba kupookya Geba kundefika Beersheba; kandewunndwa ando kwa uwe alya kishikary, ng'u ando kwekee mwaango we yaanga kwa Yosua, taari ya woko umuso lwa mwiilola alya kishikony.

⁹Indilyo valya vaniini va Ndumi Iruva, va Yerusalemu mmbalesaama uwe kulya kitaren kya irasyo-fo, lyo vakalya mikate ilatiri ntarang'o nnang'ani ya vanavamao vawo.

¹⁰Nawe kawunndwa Tofeth ilya ikee kulya imungony lya vana va Hinomu, naambo nndu nalasheniingya mwana wakwe wa kyuumi ao wa kyika nave kiraso kwa Moleki.

¹¹Kanta-fo frasi tilya mangyi ya Yuda enningya kwa nkyeere, alya mbengyen shia ya yaanga kyen kwa Nndumi Iruva; kufii na kirien kya Nathan-meleki, we mwiilola mmba ya mangyi ilya yekee kyuunguu kyao na mitika a nkyeere moose kaakora muro.

¹²Na fitara fya irasya filya fyekee kai uwe ya kiria kya Ahasi, tilya tesongosywa mmba mangyi va Yuda, na fitara fyerasya fyeesongosywa ni Manase yefo mmba ivii ta Nndumi Iruva, mangyi katifisha-fisha kandeteera yefo poo, na kiluulyi kyavayo kandekipusuya kulya kimureny kya Kidroni.

¹³Na andu alya kwa uuwe, alya usangun lwa Yerusalemu taari ya woko usha lwa ifumbuu lya weesi/ulyamari Kulya Solomon mangyi ya Israeli embatannya, kundo kutiri ngusanu, kwa Ashitoreti vakasakya na Wasidoni, na Kemoshi, Moabu na Mikomu amwi na vana va Amoni, koose kukafishwafishwa

¹⁴kukava andu kutefusu kwiishwe mafwa a vandu vafu.

¹⁵Na kilanya ya fyoose, kitara klya kyeerasya kyekee kulya Betheli, na ando kwa uwe alya kwesongosywa ni Yoroboam, mwana wa Nebati, ulya eteere vana va Israeli kawunndwa kitara kilya kyeerasya na andu alya kukee uwe kawunndwa na ifishafisha ikawa sha kilulyi, na Ashera ilya kaimamita.

¹⁶Na llya Yosia elola numa, kalollya fifu filya fyekee kulya uwe ya ifumbuu; karuma vandu koota-fo mafwa kulya fifun filya kaamamitya uwe ya kitara kyeerasya akatefuswa ndesa irero lya Nndumi Iruva lyileamba, llya lyileambawa ni nndu ulya wa Iruva.

¹⁷Naasa kaamba, Ni kifu kyavi yekyi shikilollye? Na vandu va muri vakammbia, Ni kifu kya nndu ulya wa Iruva aleuka Yuda kasheamba findo yefikuletana yewe fitareny fyeerasya fya Betheli.

¹⁸Kaamba, Neeyeny; kulave-fo nndu moose ashiipoo-fo maffwa akwe-fo. Naasa vakara-fo maffwa akwe, amwi na maffwa a nndu ulya nkisuku ookye Samaria.

¹⁹Na mmba shoose nato tilya tekee shitannyi andu kwa uwe kulya miriny ya Samaria, tilya vamangyi va Israeli vensongosya naambo Nndumi Iruva akooye ifulukwa, Yosia katiwunndwa, katitannya ngata ilya sheni etannya tilya ta Batheli.

²⁰Karumata vakohani woose valya va andu kwa uwe vekee kulya, amamita mafwa awo uwe ya kitara kyeerasya, numa kawuya Yerusalemu.

²¹Nawe mangyi kavika ishingo kwa vandu woose kavavia, Utieny Nndumi Iruva, Iruva waany pasaka ndesa kyikee kireiye yefo kyitabuny kya kyaasa.

²²Ni kya dede, nnyileutwa pasaka sha yeyo kupookya kyeeri kya valeti, valya veleta Israeli nta kyeeri kya Vaangyi va Israeli, nta vamangyi va Yuda-fo.

²³Kya indi kwikee mwaka wa ikumi na nyanya wa mangyi Yosia pasaka yei yetanyika kwa Nndumi Iruva, kulya Yerusalemu.

²⁴Na vandu vetiri mumuyo yeelafya, na vasavi, na mafwanu na makasha engyi myoose elollyo yefo urukeny lwa Yuda na Yerusalemu; Yosia kauta-fo moose naambo akooye isalallya mareiyo a torati yoo akee mareiye yefo kyitabuny kilya nkohani Hilka elollya yefo mmba ya Nndumi Iruva.

²⁵Ukya yelyo mbee, nkuleve-fo mangyi ya ngata yakwe-fo, akundye Nndumi Iruva na nrima wakwe moose, na ngoo yakwe shoose, na finya takwe shoose ndesa kikee kireiye yefo mareiyon moose a Mose; nta numa yakwe nnyalewonika-fo nndu ungyi wa ngata yakwe-fo.

²⁶Indilyo Nndumi Iruva nnyalera unyasi na unyafi lwakwe kya vandu va Yuda, kimaruma kya mikaaye na ngaa shikasha ya Manase-fo.

²⁷Nndumi Iruva kaamba, “Shisamisaa Yuda vakee kwaasha na yeny shallya shilesamisa Israeli, shisheweraa kwaasha muri yeu shileusauwa yeny shimuni; Yerusalemu na mmba ilya shileamba mfo kundo irina lyakwa lyishekaa.”

²⁸Naasa mbony shoose ta Yosia tisaaye-fo, na tilya shoose aletana, ndesa! Mmbo tilakeshireiye yefo kyitabuny kya mikonu kya vamangyi va Yuda?

²⁹Kyeeri kya mikonu yakwe, Farao-neko, mangyi ya Misri kakwipoo naambo andekaba mangyi ya Ashuru, ekifika mureny wa Frati, nawe mangyi Yosia kakwipoo kakabana nawe, nawe mangyi ya Misri kandembwaiya kulya Megido ando alya elewaanannya nawe.

³⁰Varundi vakwe vakammbika ikariny wooka Megido vakamweende Yerusalemu ammefwa, vakanndika kifun kyakwe muni. Vandu va uruka vakasaleesa Yehoahasi mwana wa Yosia, vakamwaamba mafura nave mangyi ando a ndeye.

³¹Yehoahasi mmbo etiri myaaka makumi avii na iraru kyeeri epoka ishilya, kashillya Yerusalemu andu a myeeri iraru; na irina lya maye evangwaa Hamutali mfu wa Yeremia wa Lebna.

³²Katana findo fikasha mbee ya usangu lwa Nndumi Iruva, fivakani na filya fyoose vandeye vakwe vetana.

³³Nawe Farao-neko kandemfingya kulya Ribla, urukeny lwa Hamati, naambo nalashillye kulya Yerusalemu. Kasangirya usanu talanta iyana ta fesa na talanta ya saabu kulya urukeny lulya.

³⁴Farao-neko kasaleesa Eliakimu mwana wa Yosia; Kamwaallasha irina lyakwe lyikava Yehoyakimu, indilyo kepoo Yehoahasi; keenda nawe Misri kandefiiya-fo.

³⁵Na Yehoyakimu kaniinga Farao saabu na fesa indilyo kasangirya usanu kulya urukeny lulya naambo nakooye iniingya fesa tilya kwa ishingo lya Farao; kasangirya fesa na saabu kwa vandu va uruka, wo nndu na kodi yakwe, naambo akooye iniingya Farao-neko.

³⁶Yehoyakimu etiri myaaka makumi avii na iraanu kyeeri epooka ishillya, nawe kashillya Yerusalemu myaaka ikumi na umwi. Irina lya maye evaangwa Sebidah mfu wa Pedaiah wa Rumali.

³⁷Katana findo fikasha mbee ya usangu lwa Nndumi Iruva, fivakani na filya fyoose vandeye vakwe vetana.