Read BIBILLYA Mareiyo Meele a Iruva 2 VAMANGYI 6 Bible Online

2 VAMANGYI 6 - BIBILLYA Mareiyo Meele a Iruva bible

2 VAMANGYI 6

¹Naasa vakisuku vakavia, Elisha, lola, andu yaa lukai kwankunyiya.

²Lwakutereva lweende loose lufike Yordan, lundemanya-fo firi wo nndu kimwi, lundetana-fo kundo kwekaa. Kawarouwa, Kyasia! Endeny.

³Umwi waawo, kwa ikunda lyafo kumuni, mmbo shakutereva, kweende ando amwi na mashinga afo. Karouwa, Nshendaa.

⁴Naasa keenda amwi nawo, Vekifika Yordan vakamanya miiri.

⁵Indi kyeeri umwi waawo ekemanya firi, kyaara kikailuka-fo kikawa mureny kaffwa, kaamba, Oshi lwakwa nndumi wakwa, kyindo kyeyaakwa.

⁶Nndu wa Iruva kammbesa, Nkilewa kwi? Kamoora andu kweni. Kamanya kiri kakyeera mureny aleronga alya kweni, kyaara kikasaama.

⁷Kammbia, Kiipo, Nawe kaorwa woko, kakyiipo.

⁸Naasa mangyi ya Shamu atiri fira na mangyi ya Israeli, kavika shila na varundi vakwe kaamba, nshivika ulale andu kuve.

⁹Nndu ulya wa Iruva karwaaya mangyi ya Israeli mbony, kaamba, Kwiise, kulaseima andu kuve, mashika kulya mfo Vaashami vakai.

¹⁰Mangyi ya Israeli kanderuma-fo vandu vakandefika andu kulya alevyo ni nndu ulya wa Iruva, kyemwiikyimba kakyiia-u, nshi lyimwi nta kavii-da-fo.

¹¹Naasa mbony yei ikasaaveesa nnu makusaro a mangyi ya Shamu, kavaanga varundi woose kavavia A kye shivieny, mmbovi yeto nnang'ani yeeru akee kyaalu kya mangyi ya Israeli?

¹²Umwi nnang'ani ya varundi vakwe kaamba, Ode, mangyi nndumi wakwa; indi Elisha, nkisuku ulya akee kulya Israeli; mmbwe yeto avia mangyi ya Israeli mbony tafo toose, yeto kureraa kulya kirien kyafo kyeelala.

¹³Kaamba Endeny mukandelola kundo akai, naambo shirumi-fo vandu vandeshimweengye. Kavyo kusyedo, Oothani mfo kundo akai.

¹⁴Karuma-fo frasi na mitika na itorito iniini lya fira; vakafika-fo kwikee kio, vakashingillya muri ulya taari shoose.

¹⁵Naasa, elyi ngama shuru, nndundi wa nndu ulya wa Iruva kasumuka neefo poo, ate mmbo kweifo itorito iniini lya vandu veshingillye muri ulya neefo poo, ate ulya amwi na frasi tawo na mitika a fira. Nndundi ulya wakwe kammbia woshiny llweru nndumi wakwa, lukatana inda?

¹⁶Karouwa, kammbia, kuleereye-fo, mashika ewo vakee neese mmbeengyi ngota yewo vakee nawo.

¹⁷Elisha katereva, kaamba, Woi Nndumi Iruva shakutereva, kutarammbwe miso akwe naidimi ilollya. Nndumi Iruva katarammbwa miso a nndundi ulya nawe kalollya, nalyo kidooro kilya mmbo kyeishwe frasi na mitika a muro akaringitya Elisha taari toose.

¹⁸Na llya vakunda immboya, Elisha katereva Nndumi Iruva, shakutereva kapa, vandu eva ufu miso. Nawo vakafwa miso kiterewo kya Elisha kyikainukya.

¹⁹Elisha kavavia, mwanreka shia, na muri, nshi kunu-fo, shilatyeny shimoore nndu yeto mukennduya. Kavarwaa Samaria.

²⁰Llya valemaa ifitwa kulya Samaria, Elisha kaamba, Nndumi Iruva, tarammbwa miso a vandu eva vaidimi ilollya; ate! Ni Samaria nnang'ani vakai.

²¹Nawe mangyi ya Israeli ekivlollya, kavia Elisha, Ale ndeye akwa shavakapa? Shavakapa?

²²Kammbia Kulavakape-fo; a mmbo kushekapaa vandu kwammaa ivatira na ura a usu lwafo? Vakuniingye shoonga na mura, valye na ina vaidimi ikweengya kwa nndumi waawo.

²³Naasa kavadeesya shoonga shiingyi, vekimaa ilya na ina kavalekyeiya, vakawuya kwa vandumi wawo. Vaaramu nnyefika lyingyi urukeny lwa Israeli-fo.

²⁴Numa ya vayo, Benhadadi mangyi ya Shamu kaumbya itorito lyakwe lyoose, kasaama kandeshingillya Samaria.

²⁵Vakatirwa ni shaa shiniini nnu, kulya Samaria, vakanshingillya kutani nrwe umwi wa nshungu wakumbwa fyenga makumi fya fesa, na kibaba kya maafi ya mbeta akakumbwa fyenga firaanu fya fesa.

²⁶Naasa mangyi ya Israeli afo ashiraa uwe ya isiimamba wa mmba, nka umwi kammbaanga kammbia, Sheekya mangyi; nndumi wakwa,

²⁷Kaamba, Nndumi Iruva alaankweekkya, yeny mmbo nkweekyaa inda, nshipookya na sumbai-ro ao nshipookyaa na uwe?

²⁸Mangyi kammbia, nkyokyi kikutinnyi? Karouwa, ni Nka yeu ashivia shiniingye mwana wakwa lullye inu na yeto wakwe lullye ndesi.

²⁹Naasa lukakora mwana wakwa, lukallya, ndesi ya vayo shammbia neende mwana lullye, indi-we kasuruma mwana wakwe.

³⁰Naasa mangyi ekiita marero a nka ulya karanndwa soori takwe; (nawe ekeiira uwe ya mbombo) na vandu vakalollya eree makunnya efo mwiiliny mmbwakwe.

³¹Nawe kaamba, Iruva ashitannyi indo na mmwasi, kwakooya Elisha mwana wa Shafati alala eefo na muu inu.

³²Indi Elisha kulya kyeny kwakwe, na vamiku andu amwi nawe, na mangyi kamrumya nndu indi kulare nta nndu ulya arumwa amfika kwakwe, kavia, vamiku mulollye, mmbwai yeu ndesa ankudeesya ishuuta muu wakwa? Loleny-nnu yeto arumwa kansha rueny mwaango mukanraya efo mmba mulaunlekeye-fo; nkyo! Nndumi wakwe eto anruma nnyakee numa yakwe?

³³Llya mangyi afo areraa indo, ulya alerumwa kwakwe kaafukya, nawe kaamba, lla-te, makasha yaandi ni kwa Nndumi Iruva ooka, nkyokyi mmbereya mmwasi kwa Nndumi Iruva?