Read BIBILLYA Mareiyo Meele a Iruva 2 VAMANGYI 8 Bible Online

2 VAMANGYI 8 - BIBILLYA Mareiyo Meele a Iruva bible

2 VAMANGYI 8

¹Kikakooyo Elisha ammivia nka ulya mwana wakwe erutwa, kammbia kwiipo kunu yewe na vammba yafo, kweende urukeny lulakee lwafo, kundo kushiidimaa ikaa mashika Nndumi Iruva asheende shaa; kunu urukeny elu ishevaa-fo kundo ando a myaaka mfungare.

²Nawe nka ulya kakwipoo katana ndesa nndu ulya wa Iruva alemmbia, keenda we na va mmba yakwe, kandekaa kwa Vafilisti myaaka mfungare.

³Myaaka mfungare ikimaa isia, nka ulya kawuya ooka kulya urukeny lwa Vafilisti, ishefuuya mangyi kya mmba na marema akwe.

⁴Naasa mangyi eefo areraa na Gehasi, nndundi wa Iruva kamoshora nakooye immbia findo firoo fyoose Elisha alekooya itana.

⁵Nawe eefo eevya mangyi ndesa Elisha aleruta nndu mfu nalyo yeni, nka ulya mwana wakwe alerutwa kasha nag'u ishefuuya mangyi kya mmba na irema lyakwe. Gehasi kaamba, mangyi nndumi wakwa, yeu mmbwe nka ulya na yeu mmbwe mwana wakwe ulya alerutwa ni Elisha.

⁶Naasa mangyi ekivesa nka ulya nawe kammbia ndesa llya alevyo ni Gehasi. Llyo mangyi emmutya nshilyi, kammbia, Ambiirye findo na masaa akwe moose a nrema kupookya nkonu ulya aleepoo kyaaro kufike inu.

⁷Naasa Elisha kakwiipoo kafika Demaski; nawe Ben-hdadi mangyi ya Shamu, elwee kavyo sheelyi nndu ulya wa Iruva ansha yaandi.

⁸Mangyi kavia Hasaeli, ipoo kindo kya pya wokony lwafo kundeambya nakyo nndu ulya wa Iruva; naambo nakweekye ivesa Nndumi Iruva, kwakooya shishekyaa ndwari yei.

⁹Naasa Hasaeli kandemwaambya eerye findo fya pya maakony akwe, fya wo ngata shisha filya fileidimika ikooywa kulya Demaski fyamaa ngamula makumi aana; keenda kafika mbee yakwe kammbia mwana wafo Ben-hadadi, mangyi ya Shamu, mmbwe ashiruma kwafo kaamba, A ndesa ashekooya ikya ndwari yei?

¹⁰Elisha kammbia, Enda kwandemmbia, kuleefo nyinyira, kushia. Indilyo Nndumi Iruva, anshoora sheelyi nkuti nafwe.

¹¹Kamwaatya miso kutani afulukywa, na nndu ulya wa Iruva kaiya misoru.

¹²Hasaeli kaamba, nkyokyi nndumi wakwa akeyyiya? Karouwa, Ni kimruma shiishi makasha kushetannya vana va Israeli, kukoraa miri yaawo, kwa upanga kushewaa vasero varie vana vawo vadu na vaka valemwa varie vana kusheraturwa na ivapara ndeu.

¹³Hasaeli kaamba, Indi yeny ishinga lyafo, yeny kiteni yeny wovi kutani shaidima itana kindo king'ani indi? Elisha karouwa kaambia, Nndumi Iruva mmbo anshoora yewe mmbwe kushevaa mangyi ya Shamu.

¹⁴Nawe kalakana na Elisha, kawuya kwa nndumi wakwe, nawe kammbia nkyikyi Elisha alekuvya? Karouwa kammbia, kuleefo nyinyira kushia

¹⁵Elyi lya ndesi ya vayo, keepo soori ya kitareny, kalyoongisa mura, kalyaala uwe ya kisangu kyakwe kutani afwa. Na Hasaeli kashillya ando akwe.

¹⁶Kwikee mwaaka wa karaanu wa Yeramu mwana wa Ahabu mangyi ya Israeli (Kyeeri Yehoshafati eke mangyi ya Yuda)[2] llyo Yehoramu mwana wa Yehoshafati mangyi ya Yuda epooka ishillya.

¹⁷Etiri myaaka makumi araru na ivii, kyeeri epooka ishilla, kashillya myaaka nyanya efo Yerusalamu.

¹⁸Kalatya ngyayo ta vamangyi va Israeli ngata vetana valya va mmba ya Ahabu, mashika mfu wa Ahabu mmbwe eke nka wakwe, katana makasha mbee ya usangu lwa Nndumi Iruva.

¹⁹Naakwa ni indo Nndumi Iruva nnyalekunda ilyamara Yuda-fo, kimaruma kya Davidi ishinga lyakwe; mashika emainninga kyaasa kya iniinga taa we na mmba yakwe kyeeri kyoose.

²⁰Kyeeri kya ushinga lwakwe, Edomu kashekuuta maakony a ushilyi lwa Vayuda, vakaseleesa mangyi yaawo.

²¹Naasa Yoramu kashekwipoo na mitika yakwe moose kashefika Sairi. Kakwipoo kwikee kio kakapa Vaedomi woose kutani mitika na maakida akwe woose arishya ulaleny.

²²Ni indo Edomu velakana maakony a Vayuda fika inu. Nawe Libna vakavetana indo kyeeri kilya kyeni.

²³Na mbony shoose ta Yehoramu tilesaa-fo na tilya shoose aletana, ndesa ntikee shireiye efo kyitabuny-kya-Mikonu ya vamangyi va Yuda?

²⁴Nalyo Yehoramu kalala na ndeeye, kaarwa ando amwi na vandeye vakwe kulya muriny wa Davidi, na mwana wakwe Ahasia kashillya ando akwe.

²⁵Kwikee mwaaka wa ikumi na kavii, Yoramu mwana wa Ahabu mangyi ya Israeli, Yuda epooka ishillya.

²⁶Mmbo Ahasia etiri myaaka makumi avii na ivii kyeeri epooka ishillya; kashillya mwaaka umwi kulya Yerusalemu. Na maaye irina lyakwe evangwaa Athalia mfu wa Omari mangyi ya Israeli.

²⁷Nawe kalatya-se mbony ta mmba ya Ahabu, katana makasha mbee ya Nndumi Iruva, ndesa valya va mmba ya Ahabu vetana, mashika nawe eke nkwe wa mmba ya Ahabu.

²⁸Keenda aryani na Yoramu mwana wa Ahabu naambo nandekabana na Hasaeli mangyi ya Shamu, kulya Ramoth-gilead, nawo Vaashami vakandevika Yoramu kishavere.

²⁹Mangyi Yoramu kawuya, naambo ashevavarywa kulya Yesreeli fishavere filya alevikwa ni-Mbaashami kulya Rama, kyeeri kilya ekekabana na Hasaeli mangyi ya shamu. Nawe Ahasia mwana wa Yehoramu mangyi ya Yuda, kooloka Yesreeli nandesaiya Yoramu mwana wa Ahabu mashika eke nrovye kitareny.