Read BIBILLYA Mareiyo Meele a Iruva 1 MBONY TA FYEERI 12 Bible Online

1 MBONY TA FYEERI 12 - BIBILLYA Mareiyo Meele a Iruva bible

1 MBONY TA FYEERI 12

¹Naasa yeva mmbo vandu vesheya Davidi ulya Seklai kundo ekusuruma kimaruma kya Sauli mwana wa Kishi. Vandu valya vatakusu vemweekya fira mfo kundo vekai nawe.

²Vekee vandu veeshi ilema ura, vandu verunda na maako moose, vandu vayeera mawe a ngova, na ikapa mife ya ura, vana va maye va Sauli wa Benyaminy

³Nniini waawo ekee Ahieseri, kalatya Yoashi, vana va Shemaa Mkibeati; Yesieli na Peleti, vana va Asmaweti na Baraka, na Yehu Mwanatoti

⁴na Ishmaya Mkibeoni shaamba ya valya makumi araru, nawe mmbwe nsongoru waawo, Yeremia, Yahasieli, Yohana, Yosabadi na Mkederati;

⁵Eliusai, Yerimoti, Bealia, Shemaria, Shefatia Mharufi;

⁶Elkana, Ishia, Asaleli, Yoeseri na Yoshabeamu Vakora,

⁷Yoela, na Sebadia, vana va Yerohamu, wa Kedori,

⁸Na Vakati vakakwaava vakalatya Davidi kulya kundo evikye kitoti kya vasikari wakwe shaamba ta vomi, vandu veshivye ikapa fira; na mafumu na ngao, vatiri fisangu fyeeresye fikavaka miiso. Vandu veeshi irisha sha sarya.

⁹Eseri nniini waawo, Obadia wa kavii, Eliabu wa kararu;

¹⁰Mishmana wa kaana, Yeremia wa Karaanu,

¹¹Atai wa karindaru; Elieli wa mfungare.

¹²Yohana wa nyanya, Elsabadi wa kyeenda,

¹³Yeremia wa ikumi, Makbanai wa ikumi na lyimwi.

¹⁴Yewo mmbo vana va Kati vekee vashilyi va fira, yeto ekee n-ndu kaniingwa iyana, na yeto ekee nsongoru kaningwa kyiku.

¹⁵Yewo mmbo vekillya mura wa Yordan kwikee mwiiri wa mbee, mura ukaiwala-wala taari toose, nawo vakavarishisa woose valya va imungon, vakalla na taari ya ngama na vengyi taari ya nkwaany.

¹⁶Vana maata va Benyaminy na Yuda, vakeenda kutani vandefika kulya kitotiny kwa Davidi.

¹⁷Nawe Davidi kasomuka naambo avawarye, kavavia, “Kwakooya mmbo mwasha kya mafoo, ishesheekya naasa, nrima wakwa usangaa neeni, indi kwakooya mmbo mwasha kya ishikumba kwa vakiduva vakwa, na yen shilatiri ukasha na nndu, mmbo sharambikya Iruva wa vande veru nashikapannye muni.”

¹⁸Nalyo mumuyo nsha ukaolokya Abishai, nsongoru wa valya makumi araru kaamba, “Yese mmbo lukee vafo, Ee Davidi; Na taari yafo, E mwana wa Yese; Urilalyi, yee, va na urilalyi, Na urilalyi luve yefo kwa yewo vakekweekya. Mashika mweeki wafo mmbwe Iruva wafo. Llyo Davidi evaworya kavavika vave vashilyi va vasikari valya vakwe.”

¹⁹Vandu va Manase maata vekaa kyaalu kya Davidi kyeeri kilya ekapana na mangyi Sauli aryani na Vafilisti. Lyo mmbemweekya-fo mashika “Valya vaniini va Vafilisti vevika shila, vakavaumbuta vekunsara valashewafuluka vashewuya taari ya Sauli.”

²⁰Ndesa efo ashendaa na Siklaki, valya va Manase vakawuya taari ya Davidi: Adna, na Yosabadi, na Yediaeli, na Mikaeli, Yosabadi, Elihu, na Seletai, ngyuku ta vashilyi valya vekee na Manase.

²¹Vakaekya Davidi kaidima ivavinga valya veifo vekapana nawe mashika woose mmbo vekee vandu vaantu vakaari va fira.

²²Mashika wo nkonu mmbo vekeesha vandu veyeekya Davidi, kutani lyava itorito iniini nnu lya fira sha itorito lya Iruva.

²³Na elyi lyo yeekyena lya vandu vatiri fisha fya ikapana fira, yewo vesha kwa Davidi wooka Hebron, naambo vasheniingya umangyi lwa Sauli kwa Davidi, ndesa Nndumi Iruva aambaye.

²⁴Vandu vaukye Yudaya, varye ngao na mafumu a fira vekee vandu fiku firindaru na mayana nyanya.

²⁵Vana va Simeoni vandu vakaari vatiri finya va fira, vanndu fiku mfungare na iyana lyimwi.

²⁶Vana va Levi, fiku fiina na mayana arindaru.

²⁷Na Yehoyada, nsongoru wa mmba ya Haruni, amwi nawe vekee vandu, fiku firaru na mayana mfungare.

²⁸Sandau Sadoki nsero mmbavisi, na va mmba ya ndeye, vashilyi makumi avii na vavii.

²⁹Na vana va Benyaminy, vamwi na Sauli vandu fiku firaru; lla yelyi kyava indo vandu veengyi vekee kyaalu kya mmba ya Sauli.

³⁰Na vana va Efraimu, fiku makumi avii na mayana nyanya, vomi vanyaasi, vandu va tokyi va yefo ufyarin lwa vandeye.

³¹Na va mmba ya Manase kyenga kya nnang'ani, fiku ikumi na nyanya vandu vareiye marina naambo vashivika Davidi nave mangyi.

³²Na vana va Isakari, vandu vatiri urango lwa imanya fyeeri, na filya fivasumannyi itana vekee vandu mayana avii na vana va maye vawo woose mmbo vekee kwasi ya ushilyi lwawo.

³³Va Sabuloni, vandu vatiri wiidimi lwa yeengya mapaleny, vandu veeshi mbony ta fira, vatiri fisha fya fira fya wo ngata; fiku makumi araanu, vandu vakaari va fira vakapye ngoo.

³⁴Na va Naftali, vashilyi kyiku, amwi na vatiri ngao na mafumu fiku makumi araru na mfungare.

³⁵Na va Vadani, vandu vatoki veeshi ikapa fira, fiku makumi avii na nyanya na mayana arindaru.

³⁶Na va Aseri, vandu vatiri wiidimi lwa yeengya mapaleny, vandu veeshi mbony ta fira, fiku makumi aana.

³⁷Kwakulya ya mura wa Yordan, vana va Ruben na va Kati, na kyenga kya vandu va mmba ya Manase, vandu valoshe ikapana kwa wo ngata vandu kyiku kyimwi na makumi avii.

³⁸Yewo woose ni vandu vafira valoshe kisha nnu, na woose vakeenda Hebron kwa nrima umwi indevika Davidi nave mangyi ya Israeli shoose, na va Israeli valya valesaa-fo mmbo vetiri nrima umwi-nsi wa ivika Davidi nave mangyi.

³⁹Vakakaa kulya mikonu iraru sele, valyaa na ina, amwi na Davidi mashika vana vamaye vawo vemma ivadeesya.

⁴⁰Kilanya ya fyoose valya veefitani nawo, kufike kulya Iskari, Sabuloni na Naftali vakaveengye shoonga veerye na Mishungu, na ngamula, na frasi, na ng'umbe, shoonga ta miswa, mikate ya mafura, sabibu shumu, mafura mfinyu, ng'umbe, mburu na findo fingyi nkuka-den, kimaruma kya ifura iniini lyekee Israeli.