Read BIBILLYA Mareiyo Meele a Iruva 1 MBONY TA FYEERI 15 Bible Online

1 MBONY TA FYEERI 15 - BIBILLYA Mareiyo Meele a Iruva bible

1 MBONY TA FYEERI 15

¹Davidi katana mmba takwe muni kulya muriny wa Davidi, kavika-u na ando kwaivika isanduku lya Iruva, kalyitannya yeema uwe ya vayo.

²Llyo Davidi kaamba, “Nkwiifo muumu wa nndu kuuta Valevi-nsi mmbo vashiidimaa ikurika isanduku lya Iruva, mashika mmbo vakee vasauwe ni Nndumi Iruva na indundya llung'anu.”

³Naasa Davidi kasangirya vandu woose Vaisraeli kulya Yerusalemu, naambo vanderwaa isanduku lya Nndumi Iruva ando kwa vayo alya ensongosya.

⁴Naasa Davidi kasangirya ando amwi na vana va Aron, na Valevi

⁵na vana va Kohati, na Uriel vasongoru waawo, na vana va maye iyana na makumi avii.

⁶Va vana va Merari; Asaya nsongoru waawo, na vana va maye iyana na makumi avii

⁷va vana va Gershoni, Yoeli nsongoru waawo, na vana va maye iyana na makumi araru;

⁸va vana va Elsafani, na Shemaya nsongoru waawo, na vana va maye mayana avii;

⁹va vana va Hebron, Elieli nsongoru waawo; na vana va maye makumi nyanya;

¹⁰va vana va Usieli, Aminadabu, nsongoru waawo, na vana va maye iyana na ikumi na vavii.

¹¹Naasa Davidi kavaanga vakohani vavii Sadoki na Abiatari, na valya va Valevi, Urieli, Asaya, Yoeli, Shemaya, Elieli na Aminadabu,

¹²kavavia, “Yeni ni mirwe ya mmba ta vande va Valevi, kwiilyiseny, yeni na vana va maye vany, naambo mundesaamisa isanduku lya Nndumi Iruva wa israeli mundelyifita ando alya shilemma ideesya.

¹³Mashika yeni kyeeri kilya kya mbee mmulelyipoo-fo; Nndumi Iruva, Iruva weeru alelusakira kimaruma kya ilemwa imwiindya ndesa kikwaani.”

¹⁴Naasa vakohani na Valevi, vakakwiilyisa naambo vaidimi ikurika isanduku lya Nndumi Iruva, Iruva wa Israeli.

¹⁵Na Valevi, vakalyikurika rare meeveny awo ndesa vemmbavasyo ni Mose kyuukana na irero lya Nndumi Iruva.

¹⁶Nawe Davidi kavavasya vasongoru va Valevi, vasauwe vandu nnang'ani yaawo yeva veeshi yiimba na ikapa nisha mbembe, fivale na findo fingyi naambo vakooye yiimba na ifina.

¹⁷Nawo vakasauwa vandu yeva wooka yefo ngyufyariny ta vandu valya veeshi yiimba na ifina mbasa; Hemeni mwana wa Yoeli, Asafu ulya ekee mwanamaye wa Berekia na vana va Merari, vana va maye va Ethani mwana wa Kushaya.

¹⁸Numa kasauwa-se Valevi yeva vengyi vawe vandu vawo vakavii vaivaekya: Sekaria, Yaasieli, Shemiramoti, Yehieli, Uni, Eliabu, Benaya, Maaseya, Matitia, Elifelehu, na Mikaya, na veeringa alya mwaangon: Obed-edomu, na Yeieli.

¹⁹Hemani, asafu na Etani vakasawuwa ikapa matuwasi arera.

²⁰Sekaria, Asieli, Shemiramoti, Yehieli, Uni, Eliabu, Maaseya na Benaya, vekee vekapa finubi fya unyanga lwa Alamoti.

²¹Indi Matitia, Elifelehu, Mikneya, Obed-edomu, Yelieli na Asasia mmbo vasongoru mbee veerye finubi fya unyanga lwa Shemeniti.

²²Nawe Kenania kyeendwa ni wiidimi lwakwe lwa mmbony ta wiimbi, vakamwaalwa nave nsongoru wa woose.

²³Berekia na Elkana wo mmbo vekee veeringa isanduku lya kyaasa.

²⁴Shebania, Yoshafati, Netanaeli, Amasai, Sekaria Benaya na Eliseri, yeva mmbo vekee vakohani vekapa mbembe vesongoye isanduku lya Iruva.

²⁵Naasa mangyi Davidi we na vamiku va Israeli, amwi na vasongoru fiku na fiku vakeenda ikurika isanduku lya Nndumi Iruva lyuuka kulya kyeny kwa Obed-edomu vefuraa.

²⁶Vakautya Iruva kiraso kya ngoleta mfungare na suva mfungare, kimaruma kya iniingwa Valevi valya vakaveekya ikurika isanduku llya lya Nndumi Iruva.

²⁷Davidi mmbo eree ikoti lya wuuru unini nnu, kiwo na Valevi valya woose vekurikye isanduku, veembi na Kenania nsongoru waawo, Mmwasi ya ikoti yelyo Davidi mmbo eree kisubau kya wuuru uniini mmwasi.

²⁸Naasa Vaisraeli woose vakakuumbya amwi ikurika isanduku lya kyaasa lya Nndumi Iruva fika Yerusalemu ando amwi vefuraa. Vakalyiimya veefinaa na yiimba na unyanga lwa wo ngata. (Barangumu, tarumbeta, matoasi finanda na finubi)

²⁹Kyeeri isanduku lya kyaasa lya Nndumi Iruva, lyekeyaanga muriny, muriny wa Davidi, Mikali mfu wa Sauli kaamaiya na itirisheny kalolyi mangyi Davidi eefinaa na ikushela kamwiipala nriminy wakwe.