Read BIBILLYA Mareiyo Meele a Iruva 1 MBONY TA FYEERI 17 Bible Online

1 MBONY TA FYEERI 17 - BIBILLYA Mareiyo Meele a Iruva bible

1 MBONY TA FYEERI 17

¹Kukasha nkonu umwi mangyi Davidi ekee yefo mmba yakwe ya kimangyi, kavaanga nkisuku Natani, kammbia, “A nkye lola yeny mmbo shikee kunu mmba yei ikee shitani nisha nnu, indilyo isanduku lya kyaasa lya Nndumi Iruva ni kunu yeemeny lyikai,”

²Nkisuku Natani kammbia, “Kusare kindo kushiidima itana yewe kumuni, mashika Nndumi Iruva akee neewe.”

³Na kio kilya kyeni Iruva karuma nkisuku Natani kammbia,

⁴“Enda kwa Davidi ishinga lyakwa, kumbie, ‘Nndumi Iruva aamba indi Nshi yewe kusheshitannya mmba yakwa ya mwiindye-fo.

⁵Ukya nkonu shoota vana va Israeli kulya Misri kufike nkonu wa inu nshilaange mmba-fo, kyeeri kyoose mmbo sheenda yefo na yefo.

⁶Mikonu myoose yei shilenkaa na vana va Israeli, nshilekooye ivesa vasongoru va Israeli nkyikyi yelyi kulare valenshitannya mmba ikee shitani na meresi-fo.’”

⁷Kweekyo via ishinga lyakwa Davidi indi, “Yeny Nndumi Iruva, munifinya, akuvia, Mmbo shekwiipo kulya kasa kushiisa moonri, shakuvika kuve mangyi ya vandu vakwe Israeli.

⁸Shakaa na yewe wo ando kuleenda, shakweekya kwavinga vakiduva vafo, wo ando kulefika: Mmbo shikwaallwa nndu kutiri finya na wiidimi sha vamangyi vengyi va ulana.

⁹Mmbo shamma isauwa ando kwa ivika vandu vakwa Israeli, vandekaa-u kulare kwiifo nndu ashevapaana-se lyingyi, ukya vansamya kunu urukeny yelu, mmbo valembonisa ngapo shiingyi, indi ulaalu mmbakikaa vapaanwa lyingyi-fo.

¹⁰Mmbo shikapaa vakiduva vafo woose na vandu vafo vasheengereka.

¹¹Nayelyi kushefwaa na irikwa ni vandu vafo mmbo shisheseleesa nsero vafo, nnang'ani ya vasero vafo nave mangyi na umangyi lwakwe lutiraa finya.

¹²Yeto mmbwe asheshitannya mmba yakwa, na umangyi lwakwe lushekaa llung'anu.

¹³Yeny mmbo shishevaa ndeye wakwe, nawe nasheva mwana wakwa, weekyi lwakwa llushaalashika sha llwa lwa Sauli ulya shemwaanta naambo yewe kukooye iva mangyi-fo.

¹⁴Mmbo shishemwallwa nshilyi uwe ya vandu vakwa na umangyi lwakwa fyeeri fyoose.”

¹⁵Natani kavia Davidi findo fyoose filya Iruva ensukuya.

¹⁶Naasa mangyi Davidi kaanga kulya Yeemeny lya Nndumi Iruva, kakaa-fo rembo katereva kaamba, “Yeny mmbo vi na vandu va mmba yakwa mmba-kyi nshikwaani findo yefyi fyoose kwakunda ishitannya Nndumi Iruva, naakwa ni yewo va kyeny kwakwaa!

¹⁷Kilamii, kweengera-se ishitannya na fya mmwasi, kwashivikya fyaasa kya vana va mmba yakwa, na lyingyi, Nndumi Iruva mmbo kukeshaallwa sha nndu nsuri deny.

¹⁸A nkyokyi nshiidima ikuvia mmwasi! Mmbo kushiishi na nshushwa, indilyo kweengera ishiindya tupu yen ishinga lyafo.

¹⁹Yewe Nndumi Iruva, mmbo kuletannya ishinga lyafo findo yefyi fyoose kwa ikunda lyafo kumuni fikalollyo.

²⁰Nkwiifo ungyi sha yewe-fo Nndumi Iruva; kyeeri kyoose mmbo lwiishi yewe mmbwe Iruva.

²¹Nkwiifo isanga lyingyi ulaniny koose sha Israeli-fo, yewo kulewoota ushingeny na ivaallwa vandu vafo kumuni. Findo finiini kulevatannya mbo fikwaani ulaniny koose. Mmbo kuloota vandu vafo ushingeny kulya Misri, kwaanta-fo masanga engyi moose.

²²Kwaallwa vana va Israeli vandu vafo llung'anu, na yewe Nndumi Iruva, kwava Iruva waawo.

²³“Na ulaalu, Woi Nndumi Iruva, inutyany filya fyoose kulekooya ishivikya kyaasa yeny na vana vakwa naambo fikooye iutika ndesa kwaambaye.

²⁴Na irina lyafo lyishaarafumwaa llung'anu na vandu woose vaambe, ‘Nndumi Iruva, muni finya mmbwe Iruva wa Israeli shoose!’ Na wiidimi lwafo lushesalala fyeeri fyoose.

²⁵Mmbo shavika kiterewo yekyi mbee yafo shiikuvikye nsia yewe Iruva wakwa, mashika mmbo kwanshoora na ishimanyisya findo fyoose yefyo kukunndye ishitannya yeny, na vana vakwa kushevaallwa vamangyi.

²⁶Na ulaalu Nndumi Iruva, yewe mmbwe Iruva, ni yewe kulevika kyaasa na ishitannya findo yefyi fing'ani indi.

²⁷Mmbo shakutereva kuvikye mbora yewo va mmba yakwa, naambo vakukaye yefo maakony afo atiri mbora fyeeri fyoose kuleefo umando.”