Read BIBILLYA Mareiyo Meele a Iruva 1 MBONY TA FYEERI 19 Bible Online

1 MBONY TA FYEERI 19 - BIBILLYA Mareiyo Meele a Iruva bible

1 MBONY TA FYEERI 19

¹Numa ya vayo Nahashi mangyi ya Vaamoni kafwa, na mwana wakwe Hanuni katira umangyi.

²Mangyi Davidi kaamba, “Ni kuti shindesaiya Hanuni na intannya mesha, ngata ndeye Nahashi eshitannya,” Kweekyo mangyi Davidi karuma varundi vakwe ando akwe. Naasa vekifika kulya urukeny lwa Amoni na yiindikira mangyi Hanuni,

³Vasongoru va uruka lwa Vaamoni vakalatya mangyi vakammbia, “Nkyo, mmbo kukusarye sheelyi Davidi mmbo aruma vandu yeva yaandi, ishekusengera kimaruma yelyi kulefiywa ni ndeye wafo? Ni dede woode! Mmbo avaruma ishenunwa mbony ta uruka naambo naidimi ikutuula!”

⁴Hanuni katira varundi valya va Davidi kawoota nguyo, karanndwa soori tawo nnang'ani kupookya uwe fika kyenga kya kisouwa; kavalekeya veende kyawo.

⁵Kyikava ni kindo kya usutu iwuya kyeny. Kyeeri Davidi eeta kindo vetannywa, kavarummya nrumi kavavia vakaa kulya Yeriko kweni kutani nguyo tawo tammya lyingyi.

⁶Mangyi Hanuni ekilollya we na vandu vakwe Vaamoni ansakya na Davidi, mmbo eruuya fesa tamaa fiku makumi araru na fiina kararika nato mitika amwi na veerishisa mitika wooka taari ta Mesopotamia ya uwe, Maaka na Soban koose.

⁷Makari a fira, fiku makumi araru na avii a mangyi ya Maaka kasheringitya muri kufii na Nedeba. Na Vaamoni woose vakakwiipo woola yefo miriny yaawo vakakuumbye amwi ikapa Davidi.

⁸Kyeeri Davidi eeta mbony ngata tiketanyika, mmbo eruma Yoabu na itorito lyoose lya fira.

⁹Nawo Vaamoni vakakwiipo ikapa fira kupookya alya shia ya yaanga muriny waawo nniini Rabbali.

¹⁰Yoabu kalollya mmbo ammeeringityo ni matorito a vakiduva taari toose, numa na mbee, kweekyo kasauwa vasikari yeva vesha vakaari va Kiisraeli, kavavika nisha velolaa Vaaramu.

¹¹Na vasikari valya vengyi valesaa-u vakashillywa ni mwanamaye Abishai, vakakudeesya nisha ikapa Vaamoni.

¹²Yoabu kammbia, “Kwanlollya Vaaramu veshilyimba finya, kushe swan ishiekya, na kwakooya Vaamoni vakulema finya mmbo na yeny shishaa ikweekya.

¹³Kaarya, nta kulaereye-fo! Ndifo lukapani kya vandu veru, na kya miri yei ya Iruva. Kwa wiidimi lwa Nndumi Iruva mmbo kitanyika.”

¹⁴Yoabu na vandu vakwe vakakapa fira, na Vaaramu vakarisha.

¹⁵Vaamoni vekilollya Vaaramu vanrisha nawo vakarisha Abishai; Nawe Yoabu kawuya kyakwe Yerusalemu.

¹⁶Vaaramu vekilollya vankapwa mba-Israeli vakandesangirya vasikari vengyi wooka taari ya ngama ya uruka lwawo ifitani na mura wa Eufrate, nawo vakasongoywa ni Shobaki nniini wa matorito a mangyi Hadadeseri wa Soba.

¹⁷Davidi ekiita indo kasangirya Vaisraeli woose vakaruuka mura wa Yordane indevakapa fira.

¹⁸Vaaramu vakakapwa na irishiswa deny, Davidi we na vasikari vakwe vakaidima iwaa vasikari veerishisa frasi fiku mfungare, na vashendaa na marende fiku makumi aana, Ni amwi na Shofaki nsongoru nniini wa matorito a Vaaramu.

¹⁹Mashinga alya a Hadadeseri ekilollya vankapwa ni Vaisraeeli; vakawuya itereva usari na ikulunga na Davidi vakasheva mashinga a Davidi, na kupookya yoondo Vaaramu mmbekikunda-se yeekya lyingyi Vaamoni-fo.