Read BIBILLYA Mareiyo Meele a Iruva 1 MBONY TA FYEERI 21 Bible Online

1 MBONY TA FYEERI 21 - BIBILLYA Mareiyo Meele a Iruva bible

1 MBONY TA FYEERI 21

¹Satana kalemba Davidi kaekyena vana va Israeli, kimaruma kya ikunda ikapanisa vana va Israeli.

²Kweelyo Davidi kavia Yoabu, na valya vekeshillya amwi nawe, “Enden mukandeekyena Vaisraeli woose kupookya Beer-sheba kufike Dani. Musheengye yeekyena lyawo.”

³Nawe Yoabu karouwa kaamba, A le! “Nndumi Iruva, naengere vana va Israeli kafika iyana mmwasi, woose mbo vakee varundi vafo tupu Mmbee. A nkyiki kukunde itana indo nayeengye vandu vafo woose nsindara?

⁴Indi, kimmba mangyi atiri finya mmwasi, kikava ni kuti Yoabu nairikye kilya mangyi aamba. Kweekyo Yoabu karunguka uruka loose lwa Israeli, numa kawuya Yerusalemu.

⁵Yoabu kaengya mangyi Davidi yekyena lya vandu milioni imwi, na fiku iyana lyimwi vatiri wiidimi lwa ikapa fira, yefo Israeli, na vandu fiku mayana aana na makumi mfungare yefo Yudaya, woose vatiri wiidimi lwa ikapa fira.

⁶Indi Yoabu nnyekyena vandu wa Valevi nta va-Benyaminy-fo, kimaruma kya wiitikyi lwa mangyi.

⁷Mbony yei ikaengye Israeli ngapo, mashika nnyesenya Iruva-fo.

⁸Davidi kavia Iruva, “Shankutannya ulyamari uniini, kwa kindo yekyi kya utondo shiletana. Indi shakutereva kushifwaaye mmbe.”

⁹Naasa Nndumi Iruva, karera na Kati nkisuku wa Davidi kammbia,

¹⁰“Enda kwandevia Davidi indi: Nndumi Iruva akuvia, nnang'ani ya findo firaru shitiri sauwa-u lyimwi, na yeny mmbo nshekutannya.”

¹¹Nalyo Kati kaenda kwa mangyi Davidi kammbia, “Nndumi Iruva aamba indi; Sauwa-u lyimwi yelyo kulyikundye:

¹²shaa ya myaaka iraru, ao miiri iraru ya irishiiswa ni matorito a vakiduva vafo? Ao miiri iraru ya ngapo yuuka kwa Nndumi Iruva, kushekooya iwoywa ni ndwari shikasha uruka loose lwa Israeli na ngyufu tisheendwaa ni vasu vakwe? Ni kirouwo-ki shirwaaya Nndumi Iruva?”

¹³Davidi karouwa Kati, kammbia, “Shammaanga ando kuumu! Lyo nshikunndye ngapo yuuka kwa vandu-fo! Ra shikapwa ni Nndumi Iruva muni, mashika we atiri isarya.”

¹⁴Naasa Nndumi Iruva, karika ngapo ya ndwari shiroo kulya urukeny lwa Israeli, na vandu fiku makumi mfungare vakafwa.

¹⁵Naasa karuma nsu indelyamara kulya Yerusalemu, indi kaalasha makusaro kavia nsu ulya “Nairishe kifie!” Nsu ulya esalalyi kufii na uvasha lulya lwa iseya nganu lwa Ornani Myebusi.

¹⁶Davidi kaipoo miso na uwe, kalolya nsu ulya wa Nndumi Iruva eeselelyi nnang'ani ya Iruveeu na Ulana, etiri wokony lwakwwe usu lwa inderumata Yerusalemu shoose. Naasa Davidi na vasongoru woose veree makunnya vakafirya ndi kutani fisangu fyapaana sumbai.

¹⁷Davidi kavia Iruva, Ale Iruva, nshi yeny shilaamba vandu veekyenwa? Yeny mmbwe shilelyamara. Nkyoki vandu yeva vatana? Nndumi Iruva, Iruva wakwa, shakutereva woi mmbe ngapo yeyo ishiwoye yeny na mmba ya nde wakwa, ndwari yeyo shikasha ilashepaana vana vafo-fo.

¹⁸Llyo nsu wa Nndumi Iruva kavia Kati, nandevia Davidi nandetannya Nndumi Iruva kitaara kya irasya, kulya uvasheny lwa yiilulullya nganu lwa Ornani Myebusi.

¹⁹Davidi kaindya ivavaso lya Nndumi Iruva, katana ndesa Kati alemmbia kyeendwa ni irero lya Nndumi iruva.

²⁰Onani we na vana vakwe vaana veshuluula nganu vakandelollya nsu wa Iruva, vakandekusuruma.

²¹Llya yeni Onani kandelollya mangyi Davidi eshaa na kwakwe, karafo yuulula nganu kashefiirya ndi kainyika kisangu kutani apaana sumbai.

²²Davidi kammbia, “Shikummbya irema lyafo lya nganu, na yeny shishekuniinga yekyo kushivia, naambo shishetannya-u Nndumi Iruva ando kweerasya lushekkya ngapo ya ndwari shikasha.”

²³Onani kammbia, “Kwiipoyo Nndumi wakwa;” kutanye ndesa kwakunda, ekafi na fiingyi fikee ni firaso fya ikora, shau, mafura, nswa na nganu, fyoose mmbo shakuniinga.

²⁴Indi mangyi kammbia, “Oode. Mmbo shikutaa wo kindo ndesa kyikwaani; kwafo iningya findo fyaruu kwa Iruva fyuuka kwafo kive ni kiraso kwa Nndumi Iruva-fo.”

²⁵Naasa kataa Onani fesa ta saabu mayana arindaru ta yuura irema lilya.

²⁶Ando alya katannyau Nndumi Iruva kitara kya irasya, kaniingya kiraso kyeekora, katereva Iruva, nawe kamwiirikya kaolota muro wuuka Iruveeu ukarumata kiraso kilya.

²⁷Nndumi Iruva, kavia nsu ulya naviire usu lwakwe shombony.

²⁸Davidi kalollya Nndumi Iruva amwiirikya kiterewo kyakwe alya uvasheny lwa iilullya nganu nalyo yeni kandeutya Nndumi Iruva kiraso alya kweni ireminy lya Onani.

²⁹Yeema lya Nndumi Iruva, llya lyesongosywa ni Mose kulya kasa, na kitara kilya kya irasya firaso fyeekora, mmbo fikee alya kweni Gibeoni, ando kweerasya fika inu.

³⁰Indi Davidi we nnyeidima yeenda kulya yiindya Iruva-fo, kimaruma kya weerei lwa usu lwa nsu wa Nndumi Iruva.