Read BIBILLYA Mareiyo Meele a Iruva 1 MBONY TA FYEERI 22 Bible Online

1 MBONY TA FYEERI 22 - BIBILLYA Mareiyo Meele a Iruva bible

1 MBONY TA FYEERI 22

¹Naasa Davidi kaamba, “Yaandi ng'u ando mmba ya Nndumi Iruva ishekaa, yaandi ng'u ando a kitara kya Irasya, ando vana va Israeli vasheutya firaso fyekora.”

²Mangyi Davidi kaummbya vandu woose vekee kulya urukeny lwa Israeli kavaniinga mashora. Kavika-fo vandu vapasha mawe a itana mmba ya Iruva.

³Kaummbya minya shiingyi taisongosya misomari na mangeeto a myaango na minya tingyi ta arera tilava yeekyena.

⁴Mbau ta mieresi mangyi eengywa mmba-Sidoni na Vatiro tilatiri yeekyena.

⁵Davidi kawuya kaamba, “Mmba yei mwana wakwa Solomoni akeendetannya Iruva, ni mmba ya utore uniini kunu ulaniny. Kimmba akee mwaangu nta nalandemanye mbony shiingyi ta ulana, ni kuti shimweekye idesya findo na masaa etana mmba yeyo.” Kweekyo Davidi kaidima isangyirya findo fiingyi kulaore amfwa.

⁶Llyo Davidi evaanga nsero wakwe Solomoni kammbikya ishingo lya itannya Nndumi Iruva mmba, Iruva wa Israeli.

⁷Davidi kammbia, “Mwanakwa! Shekunndye itannya Nndumi Iruva, Iruva wakwa mmba ya imwiindya,

⁸Indi Nndumi Iruva, kashivia, shilemmbwaa na ipuuswa nnu samu ta vandu veengyi, na ikapana fira shiingyi, kweekyo kya findo yefyo fivii, nnyeshiirikya shishetana mmba yakwe-fo.

⁹Lyo eshivikya kyaasa. Kaamba kushewona nsero, nawe asheshillya uruka na urilalyi. Shisheniinga urilalyi nnang'ani yakwe na vakiduva vakwe woose, na irina lyakwe ni Solomoni, mashika kyeeri kya ushiyi lwakwe shisheniinga Israeli uringyi na urilalyi.

¹⁰Mmbwe asheshitannya mmba yakwa, nawe mwana wakwa, na yeny shive ndeyaakwe, nna ngyeeri isheshillyaa Israeli llung'anu.”

¹¹Davidi kaengera immbya, “Ulaalu mwanakwa, Nndumi Iruva, Iruva wafo nakee na yewe, naidimi yiindya kyaasa kyakwe, na ikuidimisya intannya mmba yakwe.

¹²Na Nndumi Iruva, Iruva wafo nakuniinge wiidimi na urango usha, naambo kwidimi ishillya Israeli na itira mavavaso akwe.

¹³“Kwakooya kwaidima yiindya mavavaso alya moose Nndumi Iruva eniingya Mose kya ishillya vana va Israeli mmbo kuvaa wa ngoma. Kusirye Iruva, na yeengera finya, kulaereye kindo nta kutasawe-fo.

¹⁴Weekyi lwakwe kya mmba yei ya Nndumi Iruva, mmbo shansangirya mmwasi ya tani fiku firaru na mayana aana fya saabu, na mmwasi ya fiku makumi araru na fiina fya fesa fyoose yefi ni fya mmba yeyo. Na mmwasi ya fyoose kwiifo arera na minya shuumbye tilatiri yeekyena. Kwiifo mbau na mawe, indi ni kuti kweengyere mmwasi.

¹⁵Vandu va mashora vakunndwa veengyi, vepasha na isangirya mawe vandu vetana mawe, vepasha mbau na vandu vengyi nkuka mmbo vakundikye kya mashora yaa.

¹⁶Findo yefi fya saabu, fesa, arera na minya kutiri. Ulaalu mmbo kushiidimaa ipooka mashora, nawe Nndumi Iruva akee na yewe.”

¹⁷Davidi kaitikya vasongoru va Israeli woose yeekya Solomoni.

¹⁸Kaamba, “Nndumi Iruva, Iruva waany, mmbo alekaa neeni, kamuniinga urilalyi taari toose valya vekee kunu urukeny yelu, ulaalu ni mashinga eru na Nndumi Iruva.

¹⁹Ulaalu rundeny Nndumi Iruva, Iruva waany kwa ngoo na nrima moose. Pookeny itana Mmba, naambo luidimi ivika-fo isanduku lya kyaasa lya Nndumi Iruva, na findo fyeeke yefyo fyeyutya Nndumi Nndumwa mweele.”