Read BIBILLYA Mareiyo Meele a Iruva 1 MBONY TA FYEERI 4 Bible Online

1 MBONY TA FYEERI 4 - BIBILLYA Mareiyo Meele a Iruva bible

1 MBONY TA FYEERI 4

¹Vana va Yuda vekee Peresi, Hesroni, Karmi, Huri na Shobali.

²Reaya mwana wa Shobali kaira Yahathi ndeye wa Ahumai na Lahadi yeto nto mmba ta Vasorathi.

³Vana va Etamu vekee Yesreeli, Ishma na Idbashi, vetiri mfwamae waawo umwi evangwaa Haselelponi.

⁴Penueli kaira Gedori na Eseri na Eseri kaira Husha. Yewo mmbo vana va Huri mwana mmbe wa Efratha, ndeye wa Betlehemu.

⁵Ashuru yeto apookye muri wa Tekoa, etiri vaka vavii: Hela na Naara.

⁶Naara kammbonnya vana vaana: Ahusamu, Heferi, Temeni na Haahashtari.

⁷Hela kaira vana vararu: Sereti, Ishari, na Ethnani.

⁸Hakosi kaira Anubi na Sobeba, yeu mmbwe ndeye wa mmba ya Ahariheli mwana wa Harumi.

⁹Kweifo nndu umwi evangwa Yebesi, nndu atiri wiindi kailannya vana va maye woose. Maaye mmbwe emfishya irina yelyo mashika emmbavisa nnu nkonu yeto ewonika.

¹⁰Nawe Yebesi katereva Iruva wa Israeli eshambaa, “Woi Iruva, Shakutereva mbora na isheengerya minyanu yakwa ing'ani mmwasi. Woko lwafo lushiringe findo fivishwa fyoose,” Nawe Iruva kamwirikya kiterewo kyakwe.

¹¹Kalebi mwana wa maye wa Shuha kaira Mehiri na Mehiri kaira Eshtoni.

¹²Eshtoni etiri vana vararu: Beth-rafa, Pesea, na Tehina. Tehina mmbwe apookye muri wa Ir-nahashi. Vandu va mmba yei mmbo vasamya Reka.

¹³Vana va Kenasi ni: Othnieli na Seraya; na vana va Othnieli ni Hathathi na Meonathai.

¹⁴Meonathai kaira Ofra. Seraya kaira Yoabu yeto apookye imungo lya mafundi, mmbo lyefishwaa irina yelyo mashika vandu veifo woose mmbo vekee mafundi.

¹⁵Kalebi mwana wa Yefune, etiri vana vararu: Iru, Ela na Naamu. Na mwana wa Ela ni Kenasi.

¹⁶Vana va Yehaleli ni, Sifu, Sifa, Tiria na Asareli.

¹⁷Vana va Esra ni, Yetheri, Meredi, Eferi na Yaloni. Meredi kaora Bithia mfu wa Farao yeva mmbo vewonnya Meredi: Miriamu, Shamai na Ishiba, yeto apookye muri wa Eshtemoa.

¹⁸Meredi etiri nka ungyi Myudaya. Yeu kammbonnya Yeredi yeto apookye muri wa Gedori, Heberi mmbwe yeto apookye muri wa Soko na Yekuthieli yeto apookye muri wa Sanoa.

¹⁹Hodia kaora mfwamaye wa Nathamu ulya vandeye vapookye vandu va Isanga lya Garmi, valya vesamya muri wa Eshtemoa.

²⁰Vana va Shimoni ni: Amnoni, Rina, Ben-hanani na Tiloni. Ishi etiri vana vavii: Sohethi na Ben-sohethi

²¹Vana va Shela, mwana wa Yuda ni Eri, yeto apookye muri wa Leka, Laada yeto mwiipooka muri wa Meresha ufyari lwa veefuma soori ta kitami mmbekaa muriny wa Beth-ashbea,

²²Yokimu na vandu valya vekaa muriny wa Koseba, na Yoashi na Sarafi mmbo veshillya kulya Moabu kutani vafika Lehemu. (Yeti ni mbony ta myaaka miingi nnu ya kasha).

²³Yeva mmbo vandu veyuumba fia fya uteri valya vekaa mirin ya Netaimu na Gedari vakava veefurukannya mangyi.

²⁴Simeoni etiri vana varaanu: Nemueli, Yamiri, Yaribu, Sera na Shauli.

²⁵Mwana wa Shauli ni Shalumu, Shalumu kaira Mibsamu na Mibsamu kaira Mishma.

²⁶Mishma kaira Hamueli yeto awonye Sakuri na Sakuri kaira Shimei.

²⁷Shimei etiri vana ikumi na varindaru na vefu varindaru. Indi vana va maye mmbetiri vana veengyi-fo, na mmba yakwe nnyefumbuka sha vandu va isanga lya Yuda-fo.

²⁸Na yeva mmbo vekaa mirin ya Beersheba, Molada, Hasar-shuali,

²⁹Bilha, Esemu, Toladi;

³⁰Bethueli, Horma, Siklagi,

³¹Bethmakaboth, Hasar-susimu, Beth-biri na Shaaraimu. Yeyo nnyo miri yaawo kutani kwafika ushilyi lwa mangyi Davidi.

³²Na lyingyi vekaa miriny ingyi iraanu: Etamu, Aini, Rimoni, Tokeni na Ashani,

³³ni amwi na fyuungo yefyo findu mbai ya miri ya kulya Baali. Yefo mfo kwekee ukuuny lwawo vakavika-fo na findo fya ivakumbura kishari kyaawo, Na kundo waparikye nafo.

³⁴Yeva mmbo vandu vasongoru yefo ngyufyari ta Meshobabu, Yamleki, Yosha mwana wa Amasia,

³⁵Yoeli, Yehu (mwana wa Yoshibia mwana wa Seraya, mwana wa Asieli).

³⁶Eliehonai, Yaakoba, Yeshohaya, Asaya, Adieli, Yesimieli, Benaya,

³⁷Sisa (mwana wa Shifi, mwana wa Aloni, mwana wa Yedaya, mwana Shimri na mwana wa Shemaya).

³⁸Ufyari lwawo lukeengera ifumbuka nnu. Yeva lwasenda marina awo mmbo yewo vekee vasongoru va muri wawo.

³⁹Vakakwaana fika minyanun ya murin wa Gedori imungon lya taari ya ngama, naambo vedimi irunya kundo kweeisa mashonri awo.

⁴⁰Nafo vakakooya kundo kuniini kusha kutiri mare, kundo kulaifo vandu kutiri unambwe, yelyo kasha ni Vaahamu veifo.

⁴¹Kyeeri kya ushilyi lwa Esekia mangyi ya Yudaya, vandu yewo lwavasenda marina awo mmbo veenda kulya Kedori vakalyamara miri na mmba tawo vakawunndwa vakavasamisa deny fika inu. Vakaallwa kundo kwawo kwekaa na yiisa mashonri awo.

⁴²Vandu vengyi mayana araanu va ufyari lwa Simeoni vakeenda fika ifumbuu lya Seiri, vasongoru vawo ni: Pelatia, Nearia, Refaya, na Usieli vana va Ishi.

⁴³Nafo vakamamita deny Vaameleki valya vekkya nawo vakasamya-fo fika inu.