Read BIBILLYA Mareiyo Meele a Iruva 1 MBONY TA FYEERI 5 Bible Online

1 MBONY TA FYEERI 5 - BIBILLYA Mareiyo Meele a Iruva bible

1 MBONY TA FYEERI 5

¹Yelu llo ufyari lwa Ruben, mwana mmbe wa Israeli. (Ruben mmbwe mwana mmbe, indi kimaruma kya ituusa nka wa ndeye kalala na uvee lwakwe lukaniingywa Yosefu we mwanawo allatye. Kweekyo we nnyekireiywa yefo urambeny lwa ufyari ngata kikwaani sha mwana mmbe-fo.

²Nakwaa ni yelyi ufyari lwa vandu va Yuda vesheva vandu vatiri finya vakailannya vengyi na vashilyi vakava mfo kundo vashuuka indi usumanu lwa mwana mmbe ni kwa Yosefu).

³Vana va Ruben, mwana mmbe wa Israeli, vekee ni: Hanoki, Palu, Hesroni na Karmi.

⁴Vana va Yoeli ngyeeri na ngyeeri vekee ni, Shemaya, Koki, Shimei,

⁵Mika, Reaya, Baali,

⁶na Beera ulya mangyi Tiglath-pileseri wa Ashuru enkamara mifungwa naakwa ni elyi eke nsongoru, wa mmba ya Ruben kankurika ushingeny.

⁷Yaa ni marina a vasongoru va ngyufyari ta mmba ya Ruben, Yeieli, Sekaria,

⁸Bela, mwana wa Asasi na nshuku wa Shema wa ufyari lwa Yoeli, valya vesammi Aroeri taari ya ndoo koose kundefika Bela na Boal-meoni.

⁹Kimmba vetiri nnu findo fya mmba fingyi, mmbo vekwaana taari ya ngama koose kutani vandefikya kasa koomu fika mura Eufrate.

¹⁰Kyeeri kya ushilyi lwa mangyi Shauli, vandu va Ruben mmbo vaanta kituuru kya fira vakakapa Vahajiri vakavasoka uruka lwawo taari ya ngama ya Gileadi, vakandesamya-fo.

¹¹Vandu va Kati vefitani na vandu va Ruben, taari ya ndoo kulya urukeny lwa Bashani kupookya taari ya ngama kundefika Saleka.

¹²Nndu apookye usongoru ni Yoeli, wa kavii ni shafamu, Yanai na Shefati yeva mmbo vepooka ngyufyari tingyi yefo Bashani.

¹³Vakasha vengyi va ngyufyari mfungare; Mikaeli, Meshullam, Sheba, Yorai, Yakan, Sia na Eberi.

¹⁴Woose yeeva mmbo vekee vana va Abihaili ulya eke mwana wa Huri, mwana wa Yaroa, mwana wa Yeshishai, mwana wa Yado, mwana wa Busi.

¹⁵Ahi; ulya eke mwana wa Abdieli na nshuku wa Kuni mmbwe ekee nniini kunu ngyufyari yeti.

¹⁶Kundo vekaa ni kulya Giliadi na Bashani na miri yaawo myoose ya Sharoni imungo lyeiisa findo.

¹⁷Vandu va ngyufyari yeti shoose mmbo tereiywa kyeeri Yotamu eke mangyi ya Yudaya, na Yeroboamu eke mangyi ya Israeli.

¹⁸Vandu va Ruben, Kati na Manase va taari ya ngama mmbo vekee vandu vatiri finya fiku makumi aana na vaana, mayana mfungarena makumi arindaru, vandu valoshe nisha mbony ta fira na ngata ya ikapana na ngao, ngyusu na ngyura.

¹⁹Mmbo vekapana fira na Vahajiri, Yeturi, Nafishi na Nodabu

²⁰akavika nsia kwa Nndumi Iruva, vakatereva naveekye, nawe kaita kiterewo kyawo kavaniinga finya vakaidima ikamara mifungwa Vahajiri amwi na mbuya tawo.

²¹Ngamula fiku makumi araanu, mashonri fiku mayana avii makumi araanu; mishuungu fiku fivii na itorito lya vandu fiku iyana lyimwi veefo na muu.

²²Vandu vengyi vakawaawa mashika Iruva muni mmbwe ekee mweekyi waawo. Vakeengera ikaa yefo urukeny yelo kutani nkonu ulya waisamirwa.

²³Vandu yeva va Manase taari ya ngama ni kulya Bashani vekaa. Vekee ni vandu veengyi vakafumbuka na yengereka nnu. Vakakwana vakafika taari ya ndoo Beal-hermoni, Seniri na ifumbuu lya Hermoni.

²⁴Yeva mmbo vekee vasongoru va mmba tawo: Efa, Ishi, Elieli, Asrieli, Yeremia, Hodaviah, na Yahdieli. Mmbo vekee vasikari vatiri finya, vandu vesha yefo usongoruny lwa ngyufyari tawo.

²⁵Vandu yeva mmbo velyamarya Iruva, vakara-fo yiindya Iruva wa vandeye vawo, vakaindya maruva a vandu va masanga, alya Nndumi Iruva emmbamamita mbee yaawo.

²⁶Naasa Iruva wa Israeli kaishura Puhu finya mangyi ya Ashuru, (irina lyingyi ewangwaa Tiglat-pileseri) kakapa uruka lulya, kavakurika mifungwa mmba ya Ruben, Kati na kyenga kya Manase va taari ya ngama kavafita usaurony kulya Hala, Habori na Hara, mbaa-mbaa ya mura wa Kosani kundo vakai kufike inu.