Read BIBILLYA Mareiyo Meele a Iruva 2 MBONY TA FYEERI 1 Bible Online

2 MBONY TA FYEERI 1 - BIBILLYA Mareiyo Meele a Iruva bible

2 MBONY TA FYEERI 1

¹Solomon mwana wa mangyi Davidi avangisa umangyi lwakwe, nawe Nndumi Iruva, Iruva wakwe ekee amwi nawe kamwallwa nndu nsuri kammbikya mbora niini.

²Mangyi Solomon kavaanga valya vesalallya vandu kwi makamba a fiku na mayana, valeti na vasongoru woose va ngyufyari ta Israeli.

³Kakwipoo keenda nawo fika ando kweyuutya ndumwa yefo Kibeoni. Mmbo veenda yefo, mashika mfo kundo yeema lyekwanannya na Iruva, llya lyetanwa ni Mose ishinga lya Iruva kulya kasa.

⁴(Indi isanduku lya Iruva ni Yerusalemu lyekai, kulya Yeemen llya mangyi Davidi eshekapya-fo kyeeri elyeende lyuuka Kiriat-yeariamu).

⁵Kweiyo kitara kyeerasya, kya arera, kyesongosywa ni Besaleli mwana wa Uri na nshuku wa Huri, na woose mmbo vekee kulya Kibeoni mbee ya Yeema lya Nndumi Iruva. Yoondo mangyi Solomon na vandu woose vakatereva Nndumi Iruva.

⁶Solomon kaalukya-uwe mbee ya kitara kyeerasya kya arera, kaniingyau kiraso kyemamitwa kyiku kimwi uwe ya kitara.

⁷Kio yekyo kyeni, Iruva kasheya Solomon, kammbia, “Tereva kindo kyoose, kukundye neeny shikuniinga.”

⁸Solomon kavia Iruva, “Mmbo koora nde-yakwa Davidi ikunda iniini, na ulaalu kwanshiseleesa shava mangyi ando akwe.

⁹Ulaalu woi Nndumi Iruva, inutya kyaasa kilya kweniinga nde-yakwa Davidi. Kwanshiseleesa, shava mangyi uwe ya vandu yeva vafye sha kiluulyi,

¹⁰Kweekyo mmbo shakutereva kushiniinge Urango usha na Urilaly usha, naambo shiidimi ishillya vandu yeva vafo nisha. Kilasha kya vayo, mmbo nshiidima inda ishillya vandu yeva vafo veengyi indi?”

¹¹Iruva karouwa Solomon, “Kimmba kindo kwatereva, ni yefo nriminy wafo kikai, nta nkwatereva masaa-fo, nta umasi-fo, nta yiindywa nta nkwatereva yewo vakusuuye vamamitwo-fo, nta muu mwaasha-fo, indi mmbo kwatereva urilalyi na urango usha, naambo kwiidimi ishillya vandu yeva vakwa nisha yewo shakuniinga kuve mangyi yaawo,

¹²shankuniinga Urango usha na Urilalyi. Kya mmwasi shakuniinga umasi, masaa na yiindywa kilanya ya mangyi moose yeto alemmba mangyi mbee yafo, nta kulakaa nave-fo mangyi sha yewe numa yafo.”

¹³Naasa Solomon kakwipoo kulya kundo eutya nndumwa, kulya Kibeoni ulaleny lwa Nndumi Iruva lyekwaanannya, kawuya Yerusalemu. Kashillya Israeli.

¹⁴Solomon kasangirya mitika ya frasi na vesaama frasi kyiku kimwi na mayana aana, na fiku ikumi na fivii fya mitika ya frasi ta fira kulya Yerusalemu, na maata miriny ingyi.

¹⁵Mangyi Solomon kaengera fesa na saabu tikafumbuka sha mawe kulya Yerusalemu, na mbau ta mieresi tikaengereka sha makuu a shela.

¹⁶Vekapa mbusha va Solomon mbo vemweengye frasi yeto, tuuka Misri na Kilikia.

¹⁷Mmbo woora ikari lyimwi lya frasi lyuuka Misri, shekeli mayana arindaru, na frasi imwi shekeli iyana na makumi araanu.