Read BIBILLYA Mareiyo Meele a Iruva 2 MBONY TA FYEERI 13 Bible Online

2 MBONY TA FYEERI 13 - BIBILLYA Mareiyo Meele a Iruva bible

2 MBONY TA FYEERI 13

¹Abiya mmbo epooka ishillya Yuda kwikee mwaaka wa ikumi na nyanya wa ushillya lwa mangyi Yeroboamu.

²Kashillya ando a myaaka iraru ekee Yerusalemu. Maye ni Maaka mfu wa Urieli wa Gibea. Kukasha fira nnang'ani ya Abiya na Yeroboamu.

³Abiya mmbo ekudeesya ikapa fira, etiri itorito lyitiri vaskari vaantu fiku mayana aana; Yeroboamu kakwipoo na itorito lya vasikari fiku mayana nyanya veeshi ikapa fira.

⁴Mangyi Abiya kashesalala uwe ya ifumbuu lya Semaraimu, lyikee nnang'ani ya mafumbuu a Efraimu, kavia Yeroboamu na vandu va Israeli, “Shaarannya yewe Yeroboamu na vandu woose va Israeli!

⁵A shaasa mmbo mulaishi sheelyi Nndumi Iruva, Iruva wa Israeli mmbo elya mma ilafikaa na Davidi sheelyi vamangyi va Israeli woose ni yefo ufyariny lwakwe vashewonikaa?

⁶Indilyo Yeroboamu mwana wa Nebati nndundi wa Solomon, mwana wa Davidi kamina nndumi wakwe.

⁷Numa, kasangyira vandu vatondo valaishi nta itana kindo, nawo vakaaya Rehoboamu mwana wa Solomon naambo atani filya veekunndye fya mirwe yaawo, nta nalaidimi ivalemya. Kimaruma llya ekee mwana na mashora yaa akava maroo kwakwe.

⁸Ulaalu yeni mmbo mukusarye sheelyi mmushiidima iirikisa umangyi lwa Nndumi Iruva yelo aniingye Davidi na va mmba yakwe, kimaruma vai mmutiri itorito iniini na mafwanu a saabu ta ngashe tilya mwesongosywa ni Yeroboamu tive maruva any!

⁹A nshi yeni mwerishisa vakohani va Nndumi Iruva, vana va Aron, mukasanda-fo Valevi na ikusongosya vakohani vany muveni mukatana sha vandu va masanga? Indi nndu moose kakwiilyisa mbee yaan arye ngashe ya shau ao suva mfungare mmbo ava nkohani wa findo filakee maruva a wongo.

¹⁰“Indi kyeru yese, nndumi Iruva, mmbwe Iruva weeru fyeeri fyoose. Vakohani wooka mmba ya Aron mmbo yewo vafurukannya Nndumi Iruva, vesheekywa ni Valevi.

¹¹Wo nkonu ngama na nkwaany vakohani mmbo vaniingya firaso fyeemamitwa, na ifwallya ubani lutiri nrungo nsha, vakaekyerya uwe ya mesa ya saabu shisha, na mikate ya ivika mbee ya Iruva, na itokopa kisinde kya saabu, na yaata taa wo nkonu nkwaany. Yese mmbo lukelatya mavavaso a Nndumi Iruva, iruva weeru, indi yeni mukammina.

¹²Loleny-te Iruva muni mmbwe nsongoru weeru, na vakohani vakwe vamma ipoo tarumbeta naambo vakape na fira ipooke imukapa. Yeni vandu va Israeli reny ikapana fira na Nndumi Iruva, Iruva wa vasaawoye vany. Mmushiidima ivinga-fo.”

¹³Ate kyeeri yekyo kyeni Yeroboamu emma iruma itorito lya vasikari lyindematukya itorito lya Vayuda kwa taari ya numa, na valya vengyi vandevasiika taari ya mbee.

¹⁴Vayuda vekilola numa vakaawukwa nnu ngata vemmairingitywa, naasa yoo kweni vakafuuya Nndumi Iruva, nawo vakohani vakakapa tarumbeta tawo.

¹⁵Llyo veekapana va Yuda vekapa kyoorongye kya fira nawo vekitana indo, Iruva katuula Yeroboamu na itorito lyakwe lya vandu va Israeli usanguny lwa Abiya na vandu va Yuda.

¹⁶Vandu va Israeli vakarisshya vandu va Yuda, nawe Iruva kavarammbikya maakony awo.

¹⁷Abiya na itorito kyakwe kavakapa kyuumi kantula na vekapana va Israeli vakawaawa fiku mayana araanu vandu vatiri finya veeshi ikapa fira israeli shoose.

¹⁸Kweekyo vandu va Yuda vakaidima ivinga vandu va Israeli, kyimaruma llya vekusirye Nndumi Iruva, Iruva wa vasaawoye vawo.

¹⁹Abiya karishisa Yeroboamu kansoka na miri yakwe maata: Betheli, Yeshana, Efroni amwi na fyungo yefyo fyeefitani na miri yeyo.

²⁰Kupookya yoondo Yeroboamu nnyekiidima iwona lyingyi finya kyeeri kya Abiya-fo. Mafurumyony Nndumi Iruva kankapa nawe kafwa.

²¹Indi we Abiya kaengera iva na finya mmwasi kaora vaka ikumi na vaana, kawona vana va kyuumi makumi avii na vavii, vefu ikumi na varindaru.

²²Mashora engyi a Abiya, mitannyi yakwe na marero akwe ni yefo kyitabuny kya nkisuku Iddo tikeeshireiye.