Read BIBILLYA Mareiyo Meele a Iruva 2 MBONY TA FYEERI 15 Bible Online

2 MBONY TA FYEERI 15 - BIBILLYA Mareiyo Meele a Iruva bible

2 MBONY TA FYEERI 15

¹Mumuyo wa Iruva ukasheya Asariya mwana wa Odedi.

²Nawe keenda yaambya mangyi Asa, kammbia, “Sharanya yewe mangyi Asa, na vandu woose va Yuda na Benyaminy! Nndumi Iruva mmbo akee amwi neeni, kwakooya mwakaa amwi nawe. Mukammuruuya, mmbo mullollya, indi mukanra nawe mmbo ashemuraa.

³Ni kyeeri kyaasha Vesraeli valenkaa valatiri Iruva wa dede, nta Vakohani va ivalosha, nta mavavaso.

⁴Indi kyeeri valewoywa ni ngapo, mmbalealukya Nndumi Iruva, Iruva wa Israeli, vankannduuya vakankooya.

⁵Kyeri kya mbee nkwiifo nndu eshiidima yaanga ao isumuka-fo, mashika nkweifo urilalyi-fo, mmbo teifo ngusanu ta vandu wo mwaalaluko ukakwaana ngyuruka ta vandu woose.

⁶Kukasha-fo ngapanu wo ando, wo isanga lyikakapana na isanga lyingyi, vandu va muri umwi vakakapana na vandu va muri ungyi. Iruva kavalyisa ukiva lwa wo ngata.

⁷Indi yeni kapyeny ngoo, nta mulashewuya numa, mashika ni kuti mulollye mbusha ya mashora yaa mukerunda.”

⁸Asa ekiita marero yaa, a ukisuku lwa Asaria mwana wa Odedi, kikanniinga nrima koota-fo mafwanu alya moose ekeyeengye vandu vakasua kulya urukeny loose lwa Yuda na Benyaminy na alya a ngyuruka tilya toose etiri mifungwa kulya mafumbuu a Efraimu. Nalyo kasongosya kwa wiiya kitara kyeerasya kya Nndumi Iruva, kilya kyekee kulya ndaleny ya mmba ya Nndumi Iruva.

⁹Asa kaummbya vandu woose va Yuda na Benyaminy, na valya vengyi woose vekee kulya urukeny lwakwe wooka Efraimu, Manase, na Simeoni. Yeva mmbo venlatya vekilollya Nndumi Iruva, Iruva wakwe mmbo akee kimwi nawe.

¹⁰Woose mmbo vekusangyirya mwaaka wa ikumi na karaanu wa ushilyi lwa Asa.

¹¹Nkonu yeto mmbo veutya Nndumi Iruva kiraso kyeemamita ng'umbe mayana mfungare na moonri fiku mfungare; nnang'ani ya findo filya vetira mifungwa kulya urukeny lwa Veesopya.

¹²Yoo vakalya mma kya yiindya Nndumi Iruva, Iruva wa Vasaawoye vawo kwa ngoo na nrima umwi-nsi.

¹³Na nndu moose yeto alashiindyaa Nndumi Iruva, Iruva wa Israeli, akee nkoo, ao nkuu, nndumi ao nndu nka, nawaawa.

¹⁴Vakalyisya mboo, Nndumi Iruva, kwa unyanga unniini, vakaonisa unyanga mmwasi, vakakapa mbembe.

¹⁵Vandu woose va Yuda, vakava na ifura iniini mashika mmbo valellya mma ya dede deny. Mashika vanruuya Iruva kwa sina, vakarummbonisa. Nawe Nndumi Iruva kavaniinga urilalyi taari toose.

¹⁶Mangyi Asa esoka Maaka, we maye, kansoka wiindi llwa lwevaangwa nka-mangyi (mama malkia) kimaruma kya isongosya mafwanu kilakwaani na mavavaso a Iruva, a Ashera iruva lya kyika. Asa keera kwaasha ifwanu yelyo, kaifishafisha, kandeimamitya kulya imungony lya kimureny kya Kidroni.

¹⁷Indi naakwa nnyendo kundo kweerasya maruva engyi a wongo kulya Israeli nnyelyamarwa-fo; indi we mmbo eva nndu wa nrima wakikusiryo muu wakwe moose.

¹⁸Kaviira kulya mmba ya Iruva findo fyoose filya fyeeremute fyevikwa-fo ni ndeye, amwi na filya efyeeremuta-we; fesa na saabu, na findo fingyi fyoose.

¹⁹Nkwekiva-fo fira urukeny lyingyi-fo kutani mwaaka wa makumi araru na iraanu ya ushilyi lwa Asa.