Read BIBILLYA Mareiyo Meele a Iruva 2 MBONY TA FYEERI 17 Bible Online

2 MBONY TA FYEERI 17 - BIBILLYA Mareiyo Meele a Iruva bible

2 MBONY TA FYEERI 17

¹Yehoshafati mmbwe evikwa mangyi, ando a ndeye Asa, kaseleesa umangyi lutiri finya uwe ya Israeli.

²Kavika matorito miriny myoose ya Yuda, na kundo koose kulya Yudaya na miri ifitani na Efraim kulya koose ndeye we Asa entira kandevika-fo matorito eeringa.

³Nawe Nndumi Iruva kandekaa kyaalu kyakwe kammbikya mbora, mashika Yehoshafati mmbo elatya ngyayo ta ndeye ta mapookyony, nta nnyeendya maruva a wongo-fo.

⁴We mmbwe eendya Iruva ulya eendywa ni ndeye, kainndya mavavaso akwe, nta nnyelatya mikaaye ya vandu va Israeli-fo.

⁵Nndumi Iruva kaseleesa ushilyi lwa mangyi Yehoshafati urukeny lwa Yuda na vandu woose vakamwiindya na imweengye findo fiingyi fya pya fikamweengye uniini.

⁶Kalanga nnu nriminy wakwe irundya Nndumi Iruva, na kilanya ya fyoose kawunndwa-wunndwa kundo koose maruva a wongo, na mafwanu a Ashera iruva wa kyika, wa Yuda eekai.

⁷Kwikee mwaaka wa kararu wa ushilyi lwakwe, Yehoshafati karuma: Ben-haili, Obadia, Sekaria, Netanaeli na Mikaya, vendelosha kulya miriny ya

⁸Valevi kyeenda na Vakohani vavii vakeenda kimwi nawo. Valevi yewo ni: Shemaya, Netania, Sebadia, Asaheli, Shemiramoti, Yehonatani, Adonia, Tobia-donia na vakohani vekee ni: Elishama, na Yehoramu

⁹mmbo vekurika kyitabu kya mavavaso a Nndumi Iruva, vvakarunguka nakyo kulya mirin ya Yuda veloshaa vandu.

¹⁰Nndumi Iruva, mmbo evika weeresi ngyumangyi toose tilya teefiti na Yuda, tikaereya ikapa fira na Yehoshafati.

¹¹Vafilisti maata vakaenngye Yehoshafati fesa, na findo fiingyi fya pya, na Vaarabu vakamweengye suva ta moonri fiku mfungare na mayana mfungare na ndafu fiku mfungare na mayana mfungare.

¹²Kweekyo Yehoshafati mmbo engera iva na finya mmwasi. Katana ulale na kundo kweevika shoonga.

¹³Kweekyo etiri kundo kuniini kweevika shoonga kulya miriny ya Yuda. Yefo Yerusalemu kavika-fo vasikari vaantu veeshi ikapa fira.

¹⁴Na yelu llo uramba lwawo kweelatya ngyufyari ta vandeye vawo. Adna kava mmbwe nniini wa vasikari vandu fiku mayana araru va isanga lya Yuda.

¹⁵Wa kavii ekee ni Yehohanani nawe kava na vasikari fiku mayana avi makumi nyanya kwasi ya yakwe.

¹⁶Wa kararu ekee Amasia mwana wa Sikri, nawe etiri vasikari fiku mayana avii kwasi yakwe Amasia kakuuta irundya Nndumi Iruva we muni kuleefo wiitiki.

¹⁷Eliada ntakusu, atiri finya, wa mmba ya Benyaminy, etiri vasikari fiku mayana avii kwasi yakwe vatiri ngyura na ngao.

¹⁸Wa kavii kwa ushilyi ni Yehosabad, kava nsongoru wa vasikari fiku iyana na makumi nyanya woose vatiri fisha fya ikapa fira.

¹⁹Vandu yeva woose, mmbo vekeeifurukannya mangyi yefo Yerusalemu, na kilanya ya fyoose mangyi kavika vasikari vengyi kulya koose kwetiri fiteshe.