Read BIBILLYA Mareiyo Meele a Iruva 2 MBONY TA FYEERI 21 Bible Online

2 MBONY TA FYEERI 21 - BIBILLYA Mareiyo Meele a Iruva bible

2 MBONY TA FYEERI 21

¹Nawe Yehoshafati kafwa karikwa amwi na vasaawoye vakwe yefo fifuny fya Kimangyi, kulya muriny wa Davidi; nawe Yehoramu mwana wakwe kashillya ando akwe.

²Yehoramu mwana wa mangyi Yehoshafati etiri vana va maye varindaru. Asaria, Yehieli, Sekaria, Asarihu, Mikaeli na Shefatia.

³Nde yaawo mmbo evaniinga findo fiingyi fya wuuru uniini fikee ni umasi lwawo, saabu na fesa; Na miri ya Yuda ilya itiri finya. Indi kimmba Yehoramu ekee mwana mmbe, ndeye kammbika mangyi ando akwe.

⁴Yehoramu ekilollya umangyi lwakwe lwamba na finya, kavaa vanawo woose, kasanda-fo na Vaisraeli maata valya vatiri ushilyi.

⁵Yehoramu mmbo eva mangyi etiri myaaka makumi araru na ivii, nawe kashillya Israeli ando a myaaka nyanya.

⁶Kalatyaa ngaa shikasha ya mangyi Ahabu na vamangyi vengyi va Israeli mashika nka wakwe ekee umwi wa vefu va Ahabu. Nawe kalyamarya Nndumi Iruvva.

⁷Indi Nndumi Iruva nnyekunda imamita ufyari lwa Davidi-fo, mashika etiri mma nawe, sheelyi vamangyi va Israeli kyeeri kyoose ni yefo ufyariny lwafo vashuuka.

⁸Kyeeri kya ushilyi lwa Yehoramu, vandu va Edomu, velakana na ushilyi lwa Yehoramu, vakasauwa mangyi yaawo.

⁹Naasa Yehoramu amwi na itorito lya vasikari vakwe veerye mitika akwe moose vakandesengetya Edomu, vakakapwa amwi na vasongoru va fira.

¹⁰Kweekyo Edomu ikalakana na Yuda kufike nkonu va inu. Kyeeri yekyo kyeni da, vandu va Libna vakalakana na ushilyi lwakwe mashika Yehoramu elakanana Nndumi Iruva, Iruva wa vasaawoye.

¹¹Kya mmwasi, kandesongosya na yiindya maruva a wongo kulya mafumbuu ya Yuda, na kindo yekyi kyikaengye vandu va Yerusalemu nsindara, na mwaalukoluko va vandu va Yuda

¹²Nkisuku Elia karikya mangyi Yehoramu parua, kammbia, “Nndumi Iruva, Iruva va sawoye vafo Davidi mmbo akeekudenga kimaruma kya ngaa yafo shikasha, kwamina mikaaye misha ya Yehoshafati nde wafo, na Asa mangyi ya Yuda.

¹³Kilasha kya vayo kwalatya mikaaye ya vamangyi va Israeli, kwateere vandu va Yuda na Yerusalemu vakamina Iruva, ngata ilya sheni Ahabu elemba na ireta nayo vana vamaye vakamina Iruva. Kilasha mmwasi kwashewaa vana va mau, vandu vesha ngota yewe kumuni.

¹⁴Kweekyo Nndumi Iruva mmbo akurikya ngapo ivavaa kwa vandu vafo, vana vafo, na vaka vafo, ikusoka na ilyamara umasi lwafo loose.

¹⁵Yewe kumuni mmbo kushelwaa ndwari ya ndeu, ikuvavie kutani taparika.”

¹⁶Kweifo Vafilisti na Vaarabu vesamye kufii na Vaesopia, vandu yeva Nndumi Iruva kavarosya ngoo, naambo vakape Yehoramu.

¹⁷Nalyo tiny, vakeepo misa vakakapa uruka lwa Yuda, vakatira mifungwa masaa moose ekee kulya amwi na mmba ya kimangyi, vana vakwe na vaka vawo woose vakakamarwa mifungwa, kuuta-fo Ahasia mwana wakwe n-du!

¹⁸Numa ya mbony yeti shoose, Nndumi Iruva kamweengye ndwari ya ndeu ivavaa.

¹⁹Ando a myaaka ivii, mbony tikeengera iva shikasha kio na nsanyiny, kutani akumba muu. Nta kulave fo nndu asara kyakwe yaata muro veemulyi lya sheelyi vetannya vasaawoye vakwe.

²⁰Yehoramu mmbo epooka ishillya etiri myaaka makumi araru na ivii, eshillya yefo Yerusalemu ando a myaaka nyanya. Kyeeri efwa nkwiifo nndu eting'wa kyakwe fo. Erikwa muriny wa Davidi, lyo nnyerikwa fifuny fya vamangyi fo.