Read BIBILLYA Mareiyo Meele a Iruva 2 MBONY TA FYEERI 23 Bible Online

2 MBONY TA FYEERI 23 - BIBILLYA Mareiyo Meele a Iruva bible

2 MBONY TA FYEERI 23

¹Kwikyisia myaaka mfungare, kohani Yehoyada kavika shila na vaniini va fira; vekee ni Asariya mwana wa Yehoramu, Ishmaeli mwana wa Yehohanani, Asariya mwana wa Obedi, Maaseya mwana wa Adaya, na Elishafati mwana wa Sikri,

²Vakalengetya miriny myoose ya Yuda veshuumbya Valevi na vasongoru va ngyufyari ta Israeli woose, vakeenda fika Yerusalemu.

³Vandu woose vakandeanga kulya mmba ya Nndumi Iruva, vakalya mma na Yoashi mwana wa mangyi Yehoyada kavavia, “Loleny, yeu ni mwana wa mangyi! Ulaalu mmbwe avaa mangyi shaasa Nndumi Iruva evika kyaasa sheelyi vamangyi woose mmbo vashukaa yefo mmba ya mangyi Davidi.

⁴Mmbo lutana indi. Kyeeri vakohani na Valevi veefo vashuuta nndumwa nkonu wa Nndumi, kyenga kimwi kya kararu mmbo vasheringaa myaango miniini ya mmba ya Iruva,

⁵kyenga kyingyi kya kararu vasheringaa mmba ya kimangyi, na yewo vengyi wo vasheringaa mwango wa nsuka wa mmba. Vandu woose mmbo vasheangaa yefo ndaleny mmba ya Iruva.

⁶Nkwiifo nndu ungyi moose asheniingwa mwanya wa yaanga yefo mmba ya iterevya kuuta vakohani na valevi yewo vakeeniingya nndumwa fo. Mashika yeva wo ni veele; indi yewo vengyi woose ni kuti valeetye mavavaso a Nndumi Iruva, vakee yefo poo.

⁷Valevi mmbo vasheva veeringaa mangyi na ngyusu tawo wokony, mmbo vashekaa na mangyi wo ando ashendaa. Na nndu moose yeto ashekweesa yaanga yefo mmba ya Iruva, ni kuti nawaawa.”

⁸Valevi na vandu va Yuda vakainndya ivavaso lya Yehoyada. Vandu valya vamma ikamba lyawo mmbekilekyeywa veende kyeny nkonu wa Nndumi fo vammiinuka mashoreny na vakeyaanga mashoreny nkonu wa Nndumi.

⁹Yehodaya kaniinga vesalallya valya wo umwi ngao na ifumu filya fya mangyi Davidi fyekee fisurumi kulya mmba ya Iruva.

¹⁰Karingitya mmba shoose na vandu vatiri usu wokony veringamangyi.

¹¹Naasa Yehoyada kasomuta Yoash na poo kammbika ureto nrweny, kanniingya na mavavaso a ushilyi kammbika umangyi Yehoyada we na vana vakwe vakamwaamba mafura, na vandu woose vakakapa kyoorongye, “Ni yewe mangyi.”

¹²Atalia keeta kyoorongye kya vandu veefuraa kya iniingwa mangyi; kweekyo kaangusya yaanga kulya mmba ya Iruva, kundo vandu vekuumbye.

¹³Kandelollya-fo mangyi mwiiya alya mwaangony wa mmba ya Iruva asalalyi kufii na ngo tilya ta mwango wa yaanga kwa mangyi, na vasongoru va matorito vekee amwi nawe na mbembe tawo. Vandu woose vekefura na ikapa mbembe veembi va wongata vakasanga amwi vefuraa na yiimba. Llyo eranndwa soori takwe kaamba na unyanga waasha, Uriingyi! Uriingyi!

¹⁴Yehoyada nnyekunndye Atalia nawaiywa alya kufii na mmba ya Iruva-fo kweekyo kavaanga vasongoru va fira kavavia, “Muuteny yaandi, nnang'ani ya vasikari na nndu moose yeto akundaa imuuta, nawaawa.”

¹⁵Vakankurika, vakandemwiita shia ya frasi ilya ya mwaango wa yaanga mmba ya umangyi vakammbwaa

¹⁶Yehoyada kasanga na mangyi Yoash, amwi na vandu woose, kavika kyaasa sheelyi kupookya ulaalu mmbo vashevaa vandu va Nndumi Iruva.

¹⁷Naasa vakasheanga kulya mmba ya Baali iruva lya wongo vakaiwunduyasi; vakafisha fitara filya fyeerasya, na maruva a wongo numa ya fyoose vakasherwaa Matani nkohani wa Baali mbee ya kitara kyerasya.

¹⁸Yehoyada kashevika-fo varingyi va mmba ya Nndumi Iruva, varingyi yewo vakasalalywa ni Vakohani na Vallevi, valya vevikwa-fo ni Davidi vetokopa mmba ya Nndumi Iruva, na iniingya firaso fyemamitwa kwa nndumi Iruva, shaasa kikee kireiye yefo mavavaso a Mose, vave varumishaa na yiimba velatya ishingo lya mangyi Davidi.

¹⁹Kavika-fo varingi alya mwaangony wa nndumi Iruva naambo kulasheyaanga-fo vandu vatefusu.

²⁰Vaniini va matorito, vasongoru va vandu, na valya vatiri ushilyi, vandu va uruka woose vakasanga amwi na Yehoyada vakaimya mangyi ooka kulya mmba ya Nndumi Iruva vakaanga kulya mmba ya kimangyi. Vakanndembika kitimyiny kyakwe kya umangyi.

²¹Vandu vakafura nnu kya ivonisa mangyi, na muri ukava na kyimamya, mashika Atalia emma iwaawa.