Read BIBILLYA Mareiyo Meele a Iruva 2 MBONY TA FYEERI 24 Bible Online

2 MBONY TA FYEERI 24 - BIBILLYA Mareiyo Meele a Iruva bible

2 MBONY TA FYEERI 24

¹Yoashi mmbo eva mangyi etiri myaaka mfungare kashillya Yerusalemu ando a myaaka makumi aana. Maaye ni Sibia wa Bear-sheba.

²Kyeeri kyoose kya muu wa nkohani Yehoyada, mmbo Yoashi etana mesha mbee ya Nndumi Iruva.

³Yehoyada kaorya Yoashi vaka vavii, vakamwiirya vana va kyuumi na va kyika.

⁴Ando a mikonu myaangu Yoashi ekee mangyi karummbwa shila isongosya mmba ya Iruva.

⁵Kaumbya vakohani na Valevi, “Veende vakwaani miriny ya Yuda indesangyirya fesa tuuka kwa wo nndu, teendetokopa mmba ya Iruva wo mwaaka. Kavavikya ishingo lya yiitika ishora yelyo.” Indi Valevi vakakyeisa.

⁶Kweekyo kammbesa nkohani Yehoyada, “Nkyiki yelyi kulare kwammitika Valevi vasangirye usanu luuka Yuda na Yerusalemu shaasa Mose, ishinga lya Nndumi Iruva emmbavasya vandu iniingya kya yeekya Yeema yeele lya Nndumi Iruva?”

⁷(Nka ulya nlang'a Atalia na vana vakwe, elyamara mmba ya Iruva, llya vaanga-fo vakautya-fo mwiindye wa irasya na yiindya Baali iruva lya wongo na itefusa fiya fyeele fya mmba ya Nndumi Iruva).

⁸Mangyi kaniingya Valevi ishingo lya isongosya isanduku lyeevika firaso lyindevikwa alya mwaangony wa mmba ya Iruva.

⁹Naasa mbony tikandekwaana Yerusalemu koose na Yuda teyaamba, wo nndu naniingye usanu lwa Nndumi Iruva, shaasa veloshwa ni Mose ishinga lya Iruva kyeeri kilya ekee kulya kasa koomu.

¹⁰Mbony yei ikasennya vandu woose, amwi na vasongoru vawo, vakaniingya usanu lwawo kutani isanduku lyaishwa.

¹¹Wo nkonu mmbo Valevi vesheonndwa isanduku yelyo lya usanu vakanderwaaya valya vakwaani. Nawo vakawarya vakaniingya vangari vawo, nawo vakandeniingya valya vasongoru vawo vereiya mbony nawo vakanderwaaya nkohani nniini nawe kandewarya kandetisuruma, numa ya vayo kandeviira isanduku llya ando kwavayo. Kwa shia yei vakasangirya fesa shiingyi nnu.

¹²Mangyi amwi na Yehoyada vakanderambi kya fesa yeto kwa vasongoru valya veetokopa mmba ya Iruva; nawo vakaruuya vepasha mawe, mbau, na vengyi vefinga na yoososa minya teshopa mmba.

¹³Varundi yeva woose vakarunda nisha nnu, na mmba yei ya Iruva ikava sha llya mbee, ikasennya sha llya yeekai.

¹⁴Mashora eetokopa mmba ekyisya, saabu shoose na arera ilya yesa ikaniingywa mangyi Yehoyada, nawe kandoora fyombo fyayuutya nndumwa yefo mmba ya Nndumi Iruva, fikee ni firaso fyemamitwa na ifumbiria ubani. Vandu vakeengera iniingya firaso fyemamitwa yefo mmba ya Iruva kyeeri kyoose kya muu wa Yehoyada.

¹⁵Yehoyada kalwaa deny, ekifika myaaka iyana na makumi araru kafwa.

¹⁶Karikwa fifuny fya kimangyi kulya muriny wa Davidi vakamwindya kimaruma kya mashora mesha, etannya vandu va Israeli, Iruva na mmba ya Iruva

¹⁷Indi Yehoyada ekifwa tishi, mmbo vasongoru va Yuda vesheya mangyi Yoashi vakalemba nawe keeirikyana nawo.

¹⁸Llyo vandu vemanda yaanga mwiindye yefo mmba ya Nndumi Iruva, Iruva wa vasaawoye vawo.

¹⁹Nndumi Iruva kavarummya nkisuku naambo vawuyye Iruva, lyo vandu vakalema imwaarannya.

²⁰Naasa mumuyo wa Iruva kasheya Sakaria mwana wa nkohani Yehoyada. Kasalala ando vandu woose vashiidima ilollya kavavia, “Nndumi Iruva amuvesa, nkyiki yelyi mwafisha ivavaso lyakwe mukakweengye ngatara yeni muweni! Mukallema nawe ulaalu ammulema!”

²¹Mangyi Yoashi kashekulunga na variingyi valya, kaniingya muumu, vandu vakandekapa kohani Sakaria na mawe uwasheny lwa mmba ya Iruva.

²²Mangyi karekywa shaasa Yehoyada we ndeye wa Sakaria entannya mashora mesha, kasalallya Sakaria kawaawa. Nawe Sakaria ekumbaa muu kafwa kaamba, “Iruva alollye kindo kwashitannya nawe kuti nakutaiye kiduva!”

²³Kwiikee masiiyon a mwaka, Vaashami mmbo veepo misa vakakapa Yerusalemu na Yuda. Vandu vasongoru woose vakawaawa, vakakurika mifungwa na findo fiingyi vakeenda nafyo Demaski.

²⁴Itorito lya Vaashami mmbo lyekee lya vandu vaangu deny indi Nndumi Iruva kavaidimisya ikapa Vayuda kimaruma llya vemina Nndumi Iruva, Iruva wa vasaawoye vawo. Ni indo Waashami vakainutya ivavaso lya Nndumi kwa mangyi Yoashi.

²⁵We muni mmbo ekapwa kakyira ifwa. Vakyiduva vakwe vekyeenda, yookweni vasongoru vavii va itorito lyakwe vakalya kyama vakammbwaiya yoo kitareny kyakwe, kyetaiya llya esalallya mwana ulya wa kohani Yehoyada kawaawa. Vakandika kulya muriny wa Davidi lyo nshi kulya fifuny fya kimangyi fo.

²⁶Valya velya kyama kyemmbwa ni Sabadi mwana wa nka Mwamoni avangwaa Shimeti, na Yehosabadi mwana wa Mmoabi avangwaa Shimriti.

²⁷Mbony ta vana va Yoashi, ta itokopa mmba ya Nndumi Iruva, na ukisuku lwa vayo mmbo tikeshireiye yefo kyitabuny kya vamangyi, na Amasia kashillya ando akwe.