Read BIBILLYA Mareiyo Meele a Iruva 2 MBONY TA FYEERI 28 Bible Online

2 MBONY TA FYEERI 28 - BIBILLYA Mareiyo Meele a Iruva bible

2 MBONY TA FYEERI 28

¹Ahasi mmbo eva mangyi etiri myaaka makumi avii, kashillya Yerusalemu ando a myaaka ikumi na irindaru. Yeu nnyelatya ngaa shisha ivakkye ya saawoye Davidi-fo. Mmbo etana findo fikasha filasennye Nndumi Iruva.

²Kalatya ngaa shikasha ta vamangyi va Israeli. Kasongosya mafwanu a Baali a minya.

³Kakora ubani kulya mamungony a Hinomu naakwa ni vana vakwe veni kavaniingya vakava kiraso kyemamita kya mafwanu. Kalatya mikaaye mikasha ya vandu va Hinomu valya Nndumi Iruva evaumbuta-fo kyeeri Vaisraeli vekeyaanga urukeny lwawo.

⁴Kulya vandu va masanga verasya, uwe ya mafumbuu na kwasi ya wo nri utiri kirishe, Ahasi mmbo endeutyafo kiraso kyeekora na muro.

⁵Kimmba mangyi Ahasi emina Nndumi Iruva, Iruva wakwe mmbo eniingya mumu nakapwa ni mangyi ya Shamu, na vandu veengyi va Yuda vakatirwa mifumgwa nekurikwa kufike Demaska. Iruva kaniingya-se mwaanya mangyi ya Israeli,

⁶Pekan mwana wa Remalia nakape-se Ahasi, vasikari vatakusu va Yuda fiku iyana na makumi avii vakawaawa kwa nkonu umwi Nndumi Iruva, Iruva wa vasaawoye vawo mmbwe eniingya mumu kyikatanyika indo. Mashika llya vandu va Yuda vemina Iruva.

⁷Nsikari mwiisraeli umwi evangwaa Siokri kandewaa Maaseia, mwana wa mangyi Ahasi, Asrikam mwisalallya mmba ya umangyi, na Elikana ngari wa mangyi.

⁸Itorito lya vandu va Israeli lyikatira vandu va Yudaya fiku mayana avii vaka na vana, vakawakamara mifungwa Samaria amwi na findo fingyi fyiingyi vetira mifungwa.

⁹Nndu evaangwa Obedi, nkisuku wa Nndumi Iruva, ekaa muriny wa Samaria. Kandekwanannya na itorito lya vandu va Israeli vewuyaa veerye mifungwa wooka Yudeya kufii vaange muriny, kaamba, “Nndumi Iruva, Iruva wa vasaawoye vany, mmbo etirwa nngoo kimaruma kya vandu va Yuda, nkyo kimaruma muleidima ivakapa, lyo ulaalu amiita kiiyo kyawo na ngata mulevatannya kindo kivavaa.

¹⁰Na ulaalu mmbo mukunnde yaallwa vomi na vaka va Yerusalemu na Yuda vave mashinga any. Mwiishi-se sheelyi mwantannya Nndumi Iruva, Iruva waany ulyamari?

¹¹Shaarannyiny! Vafungwa yeva ni vana va maye vany na vamfwamau vany. Vareny veende; mashika Nndumi Iruva mmbo ammisswa kyany.”

¹²Vandu vasongoru vaana va Umangyi lwa taari ya ndoo, Asaria mwana wa Yohana, Berekia mwana wa Meshilemoti, Yehiskia mwana wa Shalumu na Amasa mwana wa Adilai, nawo mmbo veswa kya mbony yei.

¹³Vakaamba, “Muleende vafungwa yewo kunu-fo! Mashika lwallyamarya Nndumi Iruva, na mmbo kishiidima ilweengye ngapo ing'ani yuuka kwakwe kimaruma kya mitannyi yeeru mikasha.”

¹⁴Kweekyo vasikari vakalekeya vafungwa valya woose na findo filya venkamara mbee ya vasongoru vawo,

¹⁵na vandu valya vaana vesendwa, vakaniinga vafungwa valya soori, teraa na makubasi, vakavaamba mafura valya vetirwa mfishavere. Na valya velemywa yeenda veni, vakavikwa mungony wa mishungu, na vafungwa woose vakaviirwa Yudea fika Yeriko muriny wa myaangashi, na Veesraeli vakawuya Samaria kyeny kwawo.

¹⁶Kyeeri kilya mangyi Ahasi mmbo etereva weekyi kwa mangyi ya Ashuru.

¹⁷Mashika Veedomu mmbo vemmusheya-se inkapa fira vakatira na ivakamara mifungwa veengyi.

¹⁸Kyeeri yekyo kyeni Vafikisti mmbo vekekapa fira miri ya Shefela na Negebu ya Yuda. Vakatira miri ya Bet-shemeshi, Ayaloni, na Timna, na fyuungo fyakwe Gederoti Soko na fyuungony fya-vayo; Giriso na fyuungo fya-vayo; vakallwa-fo kundo kwawo kwesamya.

¹⁹Mashika mangyi Ahasi na Yuda mmbo eva nndu mbafu kalyisa vana va Israeli ukyiva, nawe Nndumi Iruva kaswa kavasoka finya kaveengye mwaandu vakakapwa,

²⁰Mangyi wa Ashuru ando eemwekya kankapa mmwasi.

²¹Naasa Ahasi kandeepo saabu yuuka mmba ya Iruva, mmba ya ushilyi, na yuuka yefo mmba ta vasongoru va vandu kandeniingya mangyi ya Ashuru kyikee ni usanu lwakwe, yekyi nakyo nkyemweekya nta kindo-fo.

²²Kyeeri ngapo na makiva fyerovya mangyi yeu, ni indo engera ilyamarya Nndumi Iruva.

²³Mashika mmbo eniingya na irasya maruva a wongo a Vadamasko ilya yenkapa na intuula. “Mmbo aamba, kwakooya maruva a Vaashamu eekya vamangyi va Vaashamu, kishiidimika vasheekye na yeny.” Llya etana indo mmbo kyemweengye ukiva mmwasi, we na vandu vakwe woose.

²⁴Kya findo fyekee kulya mmba ya Iruva, mmbo efisangirya kafipapara fyoose. Karaya mmba ya mwiindye ya Nndumi Iruva. Kandetana kundo kwerasya, Yerusalemu koose.

²⁵Yuda shoose wo ando kutiri muri na fimiri katana-fo kundo kwerasya maruva a wongo na ikorya-fo ubani, kindo yekyi kikenngye nndumi Iruva, Iruva wa Vasaawoye vakwe karooywa nngoo mmwasi.

²⁶Mashora akwe engyi moose, atannyi kyeeri kya umangyi lwakwe mmbo akee mareiye yefo kyitabun kya mbony ta vamangyi va Yuda na Israeli.

²⁷Mangyi Ahasi kafwa, karikwa muriny Yerusalemu, lyo nnyerikwa fifuny fya vamangyi va Israeli-fo. Na mwana wakwe Esekia kava mangyi ando akwe.