Read BIBILLYA Mareiyo Meele a Iruva 2 MBONY TA FYEERI 29 Bible Online

2 MBONY TA FYEERI 29 - BIBILLYA Mareiyo Meele a Iruva bible

2 MBONY TA FYEERI 29

¹Esekia mmbo epooka ishillya Yuda etiri myaaka makumi avii na iraanu, kashillya kulya Yerusalemu ando a myaaka makumi avii na kyeenda. Maaye ni Abiya mfu wa Sekaria.

²Mmbo etana mesha mbee ya Nndumi Iruva, mitannyi yakwe ikavaka ilya ya mangyi Davidi saawoye wakwe.

³Kwikee mwiiri wa mbee na mwaaka wa mbee ukya Esekia ammbe mangyi, mmbo erua lyingyi myaango ilya ya mmba ya Iruva kaisongosya.

⁴Kandevika-fo vakohani na Valevi, kulya kirieny kyeekwaanannya taari ya ngama

⁵karera nawo. Kavavia, “Yeni Valevi arannyiny mmbo mwukwiilyisaa mwiilyise na mmba yei ya Nndumi Iruva, Iruva wa vasaawoye vany. Muute-fo findo fitefusu fyoose yoo ando kweele.

⁶Vasaawoye veru mmbo vemina Nndumi Iruva, Iruva weeru, vakantannya findo fikasha filavaa yaamba vakankapa mungo na yoo ando kwakwe kwekaa.

⁷Vakaraya myaango ya mmba ya Iruva, vakarumya taa, nta valakunde iniingya firaso fya ikora fya mmba ya Iruva, Iruva wa Israeli.

⁸Nkyo kimaruma Nndumi Iruva kasamya Yuda na Yerusalemu, neekyo alevatannya kikailannya na yeerese wo nndu, nakyo kikamanyika ni vandu woose.

⁹Vande veru vakawaawa ni misa, vaka na vana veru vakakamarwa mifungwa.

¹⁰Ulaalu mmbo shanrummbwa shila ivika kyaasa na Nndumi Iruva, Iruva wa Israeli, naambo nalasheesua-se lyingyi kimaruma kyeeru.

¹¹Mmbo shamuvavasa vana vakwa, mulasheteere lyingyi. Mashika Nndumi Iruva mmbwe alemusauwa yeni, muve veekora ubani na itetera vandu kya imwiindya-we.”

¹²Yeva niwo Valevi va mashora: va ufyari lwa Kohati vekee ni: Mahati mwana wa Amasai na Yoeli mwana wa Asariya va ufyari lwa Merari: Kishi mwana wa Abdi na Asariya mwana wa Yehaleli Vaufyari lwa Gershoni: Yoa mwana wa Sima na Edeni mwana wa Yoa.

¹³Va ufyari lwa Elisafani: Shimori mwana wa Yeneli,

¹⁴va ufyari lwa Yedutuni: Shemaya na Usieli

¹⁵Yeva mmbo vesangyirya Valevi vengyi vakakwiilyisa. Naasa vakaangany yefo mmba ya Nndumi Iruva, shaasa vevavasyo ni mangyi, naambo vasangye na yiilyisa kyeiindya shaasa Nndumi Iruva alevavia.

¹⁶Vakohani vakaanga yefo mmba ya Iruva, vakiilyisa na isomuta poo findo fitefusu fyoose fyekee yefo mmba. Kupookya yoondo Valevi vakakurika findo yefyo vakandefyeera kwaasha kulya imungony lya Kidroni.

¹⁷Mashora a yiilyisa mmba ya Iruva akapooka nkonu wa mbee mwiiri wa mbee, kwifikaa nkonu wa nyanya, vakakooya vamma irunda mashora moose sanda na mwaango wa kiria kyeyaanga mmba ya Iruva. Vakeengera irunda mikonu ingyi nyanya, kwifikaa nkonu wa ikumi na karindaru wa mwiiri, mashora ideesya mmba ya mwiindye akasia.

¹⁸Naasa Valevi vakaeenda ivia mangyi Esekia, “Lwamma isangya na yiilyisa mmba ya Iruva, kitara ando kweniingya firaso fyeekora na mesa ya mikate myeele na findo fya vayo fyoose.

¹⁹Na findo fyingyi fyoose filya mangyi Ahasi emfyeera kwaasha, kyeeri kya ushilyi lwakwe llya alemina Iruva, lwamfiilyisa lukafivika yoo mbee ya kitara kyeerasya kya Nndumi Iruva.”

²⁰Llya yeni mangyi Esekia kaumbya vandu vasongoru va muri, woose vakeenda fika mmba ya Iruva.

²¹Naambo vedimi ikuuta ulyamari lwa yefo mmba ya kimangyi, na lwa vandu va Yuda na yiilyisa mmba ya Iruva, mmbo veniingya ngoleta mfungare, suva mfungare, ngurana na suva mfungare na ndafu mfungare. Naasa mangyi kavia, Vakohani valya va mmba ya Aron, vaniingye findo filya yoo kitareny kyeerasya.

²²Naasa nkohani kashisha mbele ngoleta, kalatya suva, kafurumya na ngurana ta suva, samu ilya yavayo kaifwallya kulya kitareny kyeerasya.

²³Mafurumyony vakarwaaya mangyi ndafu tilya na vandu valya vengyi veiiyo nawe, vakateekyerya maako.

²⁴Naasa vakohani vakandeshisha ndafu tilya, na samu ya vayo ikandeletywa uwe ya kitara kyerasya kyeyuuta ulyamari lwa vandu woose, shaasa mangyi aamba kiniingywa kiraso kyekora na kiraso kya ulyamari kya Israeli.

²⁵Mangyi Esekia kalatya uramba llwa Nndumi Iruva enningya mangyi Davidi shaasa emma iniingya nkisuku Gadina Natani vekee ni vakisuku va mangyi. Nawe kandevika-fo Valevi vetiri matuwasi, finanda amwi na fivale kulya mmba ya Iruva.

²⁶Vakasalala-u vetiri findo fyeeimba sha filya fya mangyi Davidi. Na vakohani nawo veiiyo vetiri mbembe.

²⁷Esekia kaveetika iniingya kiraso kyeekora na muro uwe ya kitara kyeerasya shaasa vepooka iniingya kiraso yekyo vandu woose vakapooka yiimba fiimbo fya irumisha Nndumi Iruva, veembi na valya woose vetiri fia fyeiimba, na valya vetiri mbembe vakaimbya nafyo Iruva.

²⁸Vandu vekee alya woose vakaanga mwindeny veshiimbaa nairumisha Iruva, amwi na veembi na valya woose vetiri mbembe vakeemba kutani firaso fyoose fyamaa ikorwa.

²⁹Naasa mangyi Esekia na vandu vakwe woose vakafiirya-ndi vakainndya Iruva.

³⁰Mangyi amwi na vasongoru va uruka woose kavia Valevi veembe fiimbo fya irumisha Nndumi Iruva, filya fyereiywa ni Davidi na nkisuku Asafu. Naasa vandu woose vakeemba vetiri ifura iniini veefiirye-ndi na yiindya Iruva.

³¹Esekia kavia vandu, “Kimmba ulaalu mwamma ikwiilyisa, engyeny Nndumi Iruva firaso fyeekora fya imwaana.” Woose vakairikyana nawe, na vengyi maata vakaniingya firaso fyeekora na muro.

³²Vakaniingya ngoleta makumi mfungare suva iyana lyimwi, na ngurana ta suva mayana avii kwa nndumi Iruva fikee ni firaso fyeekora na muro;

³³vakeende-se ngoleta mayana arindaru, na suva fiku firaru fikee ni kiraso kyelyiwa ni vandu.

³⁴Kimba kulare vetiri vakohani vashiidimaa ishisha findo yefyi fyoose, mmbo vetereva weeki kwa Valevi kutani vainutya ishora yelyo. Mashika kyeeri yekyi, veengyi vemma ikwiilyisa. (Valevi mmbo vekee vandu vatele mmwasi, vakainndya wiilyiso ngota vakohani)

³⁵Kuuta-fo firaso filya fyekora na muro, vakohani mmbo vetiri mashora engyi endekora mafura alya a firaso filelyiwa ni vandu, kweifo na kiraso kya mfinyu ulya uleniingywa amwi na firaso fyeekora. Kweekyo vakandepookya mwiindye lyingyi yefo mmba ya Iruva.

³⁶Mangyi Esekia kava na ifura iniini nnu we na vandu vakwe mashika nndumi Iruva mmbwe alemwiidimisya kunu mashoreny ya kwa kyeeri kifii indo.