Read BIBILLYA Mareiyo Meele a Iruva 2 MBONY TA FYEERI 3 Bible Online

2 MBONY TA FYEERI 3 - BIBILLYA Mareiyo Meele a Iruva bible

2 MBONY TA FYEERI 3

¹Naasa Solomon kapooka itana mmba ya Nndumi Iruva kulya Yerusalemu uwe ya ifumbuu lya Moria kulya Nndumi Iruva ekoora kwa Davidi we ndeye, ando Davidi ensauwa, kwikee ni muung'uny lwa iseya nganu wa nndu avangwaa Ornani Myebusi.

²Mangyi Solomon kapooka itana mmba ya mwiindye kwikee mwiiri wa kavii wa mwaaka wa kaana ekee mangyi.

³Yefyi mfyo fyoose fya mmba yeyo ya Iruva yeketanwa ni Solomon. Waasha ni mita makimi avii na mfungare, ivari lya vayo mita kyeenda.

⁴Kiria andu kweyaanga mmba mita kyeenda waasha lwa vayo. Kuleenda na uwe mita makumi araanu na iinya, isimamba lya mmba yeyo kwa mmba ukasikywa ni saabu shisangye.

⁵Uwasha lwa ikwaanannya lukaringitywa na mbau ta miberoshi tikasikywa ni saabu imikaa, miri ya mitende na minyororo ikareiywa-fo.

⁶Mangyi Solomon kashopa mmba ya Nndumi Iruva kwa mawe mesha a wuuru uniini. Saabu yeyo erunda nayo, mmbo yooka Parfaimu.

⁷Mmbo esikya mmba shoose na saabu: Mboshiki ta vayo, fyeeko, mimbombo ya vayo na myaango. Yefo mimbombony ya mmba kukapashwa-fo findo fitiri maaru.

⁸Na kya mmwasi kasongosya andu kweele nnu. Waasha lwa vayo mita kyeenda, kimwi sha ivari lya mmba yei, mashika ni mita kyeenda. Saabu yaanga-u ya isikya kiria yekyo ni tani makumi avii;

⁹misumari yekee kramu mayana araanu, na makumi mfungare ya saabu.

¹⁰Kapasha mafwanu avii a mbau atiri maaru kasikya mafwanu yoo na saabu, kandetekyerya ando kweele nnu.

¹¹Wo ifwanu lyimwi mmbo lyetiri maaru avii, atiri waasha lwa mita yiinya na kyenga; mita ivii na kyenga wo yaaru. Yaaru lyimwi lyikapaana mimbombo wa kiria taari imwi, na lya kavii, lyikapaana llya lya ifwanu lya kavii.

¹²Yaaru lyimwi lya ifwanu lya kavii, nalyo lyikashepaana isimamba taari ingyi ya kiria, na lya kavii lyikashepaana na llya lya ifwanu lya mbee nnang'ani a kiria.

¹³Maaru yoo avii a mafwanu andi ni mita yiinya na kyenga. Vakasalala mapaleny na fisangu fya mafwanu yaandi atiri maaru filolye na yefo kisafu.

¹⁴Kasongosya ipasya lya kitambaa lya kitani nisha lya fwana ya samawati ya sambarau na idodorye. Kalyishopa na mafwanu alya atiri maaru.

¹⁵Mangyi Solomon kasongosya ngoo ivii ta arera, wo imwi waasha lwa mita iyana na ikumi na isaanu na kyenga; kandetiseleesa mbee ya mmba. Wo imwi mmbo yetiri ureto uwe ya vayo itiri waasha lwa mita ivii na robo.

¹⁶Kasongosya mise ya ngata shisha, kashetivika uwe ya ngo tilya kashepasha-se mishiviri ya makomamanga iyana uwe ya vayo.

¹⁷Kasheseleesa ngo tilya yoo mwaangony wa ekalu lyilya, ngo imwi taari ya sinde na ingyi taari ya ndoo, ilya ya taari ya sinde kaifishya irina ni Yakini, na ilya ya taari ya ndoo ni Boasi.