Read BIBILLYA Mareiyo Meele a Iruva 2 MBONY TA FYEERI 30 Bible Online

2 MBONY TA FYEERI 30 - BIBILLYA Mareiyo Meele a Iruva bible

2 MBONY TA FYEERI 30

¹Mangyi Esekia karuma nrumi kwa vandu woose va Yuda na Israeli, na vengyi kavareiya barrwa kulya Efraimu na Manase, naambo woose vashe Yerusalemu mmba ya Iruva; kimaruma kya Pasaka na yiinndya Nndumi Iruva, Iruva wa Israeli.

²Mangyi, vasongoru na vandu woose va muri wa Yerusalemu vakairikyana nkonu yeto nniini wa Pasaka uve mwiiri wa kavii,

³ando a mwiiri wa mbee, shaasa kyekee mishivire, mashika yeekyena lya vakohani vakee vavike wakfu vekee vaangu, nta vandu mmbemamya kya indekwaanannya Yerusalemu-fo.

⁴Mangyi na vandu woose vakairikyana kya mbony yei.

⁵Naasa Vaisraeli woose vakanderumywa nrumi kupookya Dani taari ya ndoo, kundefika Ber-sheba taari ya sinde vandekwanannya kulya Yerusalemu kya yiindya Pasaka shaasa kyekee mishivire yaawo, vakasha vandu veengyi valandelollywa lyingyi.

⁶Mangyi amwi na vasongoru vakwe, vakaruma mashinga indefita nrumi Yudaya na Israeli koose ishaamba indi, “Yeni vandu va Israeli, mmbo mulekiiya kipashuka llya mulekapwa ni Vaashuru. Wuiyeny Nndumi Iruva, Iruva wa Abrahamu, Isaki na Yakobo, naambo nawe nawauye.

⁷Mulasheeva sha vasawoye vany Israeli, valya vemina Nndumi Iruva, Iruva waawo shaasa vekapwa ngapo ivavaa.

⁸Mulasheeva mbafu shawo, indi irikyeny Nndumi iruva. Mushe na mmba ya Iruva kulya Yerusalemu, ilya Nndumi Iruva, Iruva waany ale iivika sheele llung'anu, mumwiindye we, naambo nalasherooyo lyingyi ni ngoo kimaruma kyany.

⁹Kwakooya mwawuiya Nndumi Iruva, llyo vashelillyaa vandu valya vany valevakamara mifingwa vawuye kyeny. Mashika Nndumi Iruva, Iruva waany mmbo akee nrilalyi na mwilyilya vandu, kwakooya mwambuiya, mmbo ashemuwaryaa.”

¹⁰Na valya verumwa vakanderingitya koose muri kwi muri kulya urukeny lwa masanga a Efraimu na Manase, kutani vandefka kulya taari ya ndoo ya masanga a Sabuloni, indi vandu vakavaseka na ivateenda.

¹¹Indilyo kweifo-da vandu va masanga nnang'ani yaawo wookye masanga engyi a Asheri, Manase na Sabuloni vekundye isha na Yerusalemu.

¹²Finya ya Iruva yekee mashoreny kulya urukeny lwa Yuda ikavaniinga nrima wa yiindya na ivasanda amwi na yiirikya vasongoru vawo shaasa vekee vavavasye ni Nndumi Iruva.

¹³Mamwiingyi wa vandu vakandekwaanannya kulya Yerusalemu kwikee mwiiri wa kavii kya iindya Nkonu wa ifura wa Mikate Ilatiri ntarango.

¹⁴Vakapooka yuuta-fo fitara fyerasya fyoose filya fyekee Yerusalemu, na filya fingyi fyoose fyekee fyekorya ubani vakandefyeera kulya imungony lya Kidro.

¹⁵Kwikee nkonu wa ikumi na kaana wa mwiiri yeto, vakashisha ngurana ya suva ive ni kiraso kya Pasaka. Vakohani na Valevi vakalollya usutu, vakakwiilyisa, nawo vakandeniingya kiraso kyeekora yefo mmba ya Nndumi Iruva.

¹⁶Vakasalallya kilya kikwaani nawo yefo mmba ya Iruva velatya mavavaso a Mose, nndu wa Iruva. Valevi vakavaniingya samu ya kiraso, nawo vakainyanyatya kulya kitareny kyeerasya.

¹⁷Kimaruma kya vandu veengyi, vekusangirye alya vekee vatefusu, mmbo Valevi veveekya ishisha ngurana ya Passaka vakativika wakfu kwa Nndumi Iruva.

¹⁸Lyingyi nnang'ani a vandu valya vekusang'irya amwi nnu valya wookye Efraimu, Manase, Isakari na Sabuloni, mmbo vekeiindya Pasaka kilasha kya mavavasyo. Indi mangyi Esekia kavaterevia usari kaamba,

¹⁹“Woi Nndumi Iruva, Iruva wa vasaawoye veru kwa isarya lyafo iniini, sarya vandu yeva vafo vakekwiindya kwa mirima yaawo myoose naakwa ni yelyi vakee vandu valyamari.”

²⁰Nndumi Iruva kairikya kiterewo kya Esekia; kwavafwaaya ulyamari lwawo loose; kuleefo mbese.

²¹Vaisraeli woose valya vekwaanannya Yerusalemu kya yiindya nkonu nniini wa Mikate ilatiri ntarang'o, mmbo vekaafo ando a mikonu mfungare vetiri ifura iniini nnu. Valevi na Vakohani mmbo vekaafo veshaarafuma Nndumi Iruva wo nkonu, vakamwiimbya kwa finya tawo toose.

²²Mangyi Esekia kavarumisha na ivaniinga nrima vakohani yewo ngata valetetera mwiindye kwa wiidimi uniini. Llya vemaa ilya ando a mikonu mfungare vakaniingya kiraso kya urilalyi kwa Nndumi Iruva, Iruva wa vasawoye vawo.

²³Vandu woose vakarummbwa shila yeengera mikonu mfungare mmwasi ya ifura. Kweekyo vakaengera mikonu mfungare veefuraa.

²⁴Mangyi Heselia wa Yuda, kaniingya ngoleta kiku na moonri fiku mfungare ive ni shoonga ya vandu valya; na vasongoru vakaniingya ngoleta kiku kimwi, na moonri fiku ikumi. Yekyena lya vakohani

²⁵Wo nndu alesha-u mmbo alefura. Vandu va Yuda woose, vakohani na Valevi, na valya valesha wooka na taari ya ndoo, na veny woose valya vensha isamya kulya Yerusalemu na Yuda

²⁶Muri wa Yerusalemu ukaishwa ifura iniini lyilandelollyo ukya kyeeri kya ushilyi lwa mangyi Solomoni mwana wa mangyi Davidi.

²⁷Vakohani na Valevi vakatereva Nndumi Iruva naolotye vandu mbora yakwe yuuka kwakwe iruveeu, nawe Iruva keeta na yiirikya kiterewo kyawo.