Read BIBILLYA Mareiyo Meele a Iruva 2 MBONY TA FYEERI 32 Bible Online

2 MBONY TA FYEERI 32 - BIBILLYA Mareiyo Meele a Iruva bible

2 MBONY TA FYEERI 32

¹Numa ya mashora yaa mesha moose aletana mangyi Esekia, mangyi Senakeribu wa Ashuru kakwipoo nakape Yuda. Mmbo esha kavika turuve kulya koose kutiri finya evikye nsia sheelyi ashiidimaa itira mifungwa.

²Mangyi Esekia ekilollya sheelyi mangyi Senakeribu mmbo akundye ikapa Yerusalemu,

³mmbo erummbwa shila, we na vaitori vakwe vaniini va fira woose indefisha ngyusoka na mira yekee poo ya miri nawo vakairikyana nawe.

⁴Vakakusangyirya amwi vandu veengyi vakandefisha ngyusoka na fimura fyoose kulave-fo mura ushekooywa yefo urukeny yelo.

⁵Mangyi kaengera isimamba lya kavii karingitya muri moose na uwe ya vayo katana-u nnara na taari ya kipoo kaengera isimamba lyingi karingitya riti; kavambisa kwa wiiya lyikatira finya taari ilya ivaangwa Milo kulya muriny wa Davidi. Kaengera deny isongosya mafumu na ngao.

⁶Kaumbya vandu va muri woose kavavika kwasi ya vaitori vailola va fira yoo uvasheny mwaango wa muri, kavavia,

⁷“Mulaereye nta mulasave kya mangyi ya Vaashuru na matorito akwe a fira-fo, nkwiifo kindo ashiidimaa ilutannya-fo mashika yese mmbo lutiri finya mmwasi lukamwiilannya.

⁸We ni finya ya vandu atiri, indi yese, mmbo lutiri finya ya Nndumi Iruva, Iruva weeru mmbwe ashelweekya, na ilukapannya fira yeeru, mmbwe lummbikye nsia.” Marero ya a mangyi Esekia, mmbo eniinga vandu finya shiniini nnu.

⁹Numa ya vayo, Senakeribu mangyi ya Ashuru ameringitya muri wa Lakishi we na matorito akwe moose, karuma varundi vakwe Yerusalemu kwa Esekia mangyi ya Yuda, na kwa vandu woose vakee kulya Yerusalemu, eshambaa,

¹⁰“Senakeribu mangyi ya Ashuru mmbo akee yaamba indi: Nkyoki mukusirye kutani mwakaa Yerusalemu, kundo muri wamma iringitywa?

¹¹Nshimmbo, Esekia akemulemba mushefiiya yaandi ni shaa ao nyura, emuvyaa, ‘Nndumi Iruva, Iruva waany ashemuturunyaa maakony a mangyi ya Ashuru?’

¹²Nshi Eesekia yeu alelyamara ando kwakwe kweyiindya na fitara fyakwe eyitikyaa vandu woose va Yuda na Yerusalemu evavyaa, ‘Mmushindyaa kitara kyerasya kimwi na uwe ya vayo mushekorya firaso fyany?’

¹³A mmbo muleeshi alya moose yeny na vasaawoye vakwa luletannya vandu woose va masanga engyi? A shaasa maruva yoo a masanga a ngyuruka yeto veedima iturunya ngyuruka yeto maakony akwa?

¹⁴Ni iruva ungau nnang'ani ya maruva yoo a masanga yoo aleidima iturunnya vandu vakwe wooka maakony akwa llyony neeni mwiidimi ivika-u nsia sheelyi Iruva yeto waany ashemuturunyaa maakony akwa?

¹⁵Mulalembwa ni Esekia nta mulasheyiirikya mbony yeto. Mulasheyiirikya nndu yeu-fo, mashika, nnyalensha-fo iruvva wa masanga ao mangyi shoose kavinga iturunya vandu vakwe wooka maakony a mangyi ya Ashuru-fo nkyo Iruva yeu waany nnyashiidimaa-fo.”

¹⁶Varundi va mangyi ya Ashuru vakarera marero meengyi makasha a itatala Nndumi Iruva, na Esekia nndundi wakwe.

¹⁷Mangyi muni kareiya Nndumi Iruva, kamwaarara Iruva wa Israeli eshaamba, “Ndesa maruva a masanga engyi alelemwa iturunya vandu vawo uka maakony akwa, naakwa ni Iruva wa Esekia nnyashiidima iturunya vandu vakwe-fo.”

¹⁸Vasongoru yewo vakavarya kwa unyanga uniini Kiebrania, kyevaniinga usau na weeresi vandu va Yerusalemu valya veselelyi uwe ya isimamba lya muri naambo kive kyaangu kwawo itira muri.

¹⁹Vakarera kya Iruva wa Yerusalemu ngata ilya varera nayo maruva a vandu va masanga, mafwanu akee masongosye na maako a vandu.

²⁰Mangyi Esekia na nkisuku Isaya mwana wa Amosi vakatereva Iruva na imfuuya naambo avaniinge weekyi.

²¹Nawe Nndumi Iruva karuma nsu mweele kawaa vasikari na vasongoru va fira va Ashuru woose. Naasa mangyi ya Ashuru kawuya kyeny kwakwe na usutu uniini. Nawe ekee yefo mmba ya iruva wakwe, nnang;ani ya vana vakwe vakashemmbwaiya alya kweni na usu kafwa.

²²Niindo Nndumi Iruva, eturunya mangyi Esekia na vandu va Yerusalemu na vakiduva vakwe woose, kavaniinga nduma nsha, na urilalyi nnang'ani ya amurasa na vandu woose.

²³Vandu veengyi vakasha Yerusalemu yeengye Nndumi Iruva firaso, amwi na yeengye Esekia mangyi ya Yuda findo fiingyi fya pya fya wuuru uniini. Kupookya yoondo, vandu va masanga engyi moose, vakamwiitikisa nnu.

²⁴Kyeeri yekyo Esekia mmbo elwaa, kufii nafwe. Esekia katereva Nndumi Iruva, nawe Iruva kairikya kiterewo kyakwe kamoora kiringisyo.

²⁵Indi Esekia nalakikunde yuutya Nndumi Iruva kiraso kya yefyo fyoose alentannya mashika nrima wakwe weeshwe ikwiishika. Kindo yekyi kikeengye waataro vandu va Yuda na Yerusalemu.

²⁶Mafurumyony, Esekia na vandu vakwe va Yerusalemu, kakunyiisa, nawe Nndumi Iruva kavafwaaya kutani Esekia afwa.

²⁷Mangyi Esekia kava isimba nnu, kainndywa ni vandu woose. Katira mmba shiingi ta isuruma-fo saabu, arera, mawe a wuuru uniini na findo fingyi fya umasi lwakwe; ngawo na findo fyoose fya yefo kwakwe fing'ani

²⁸Na kyammwasi etiri mmba kundo kwevika shoonga ta vandu, fyeelya na fyeena amwi na shoonga ta findo fyakwe fya mmba.

²⁹Iruva kamweengerya miri ingyi mmwasi kundo kwevika-ng'umbe na moonri, na masaa yoo meengyi Iruva enniingye.

³⁰Ni mangyi Esekia, mmbwe yeto eraya usoka lwa Gihoni, kasuma mfongo, kutani waparikya taari ya kavii ya isimamba lya Yerusalemu. Esekia kavikywa mbora wo kindo eketana.

³¹Naakwaa ni kyeeri kilya vateteri vaniini va Babilony vekeerumwa kulya kwakwe indevesa kya findo finiini fyekee yutika kulya kwake, Iruva mmbo enreeya nalole kindo akusarye yefo nriminy mbwakwe.

³²Mashora engyi a mangyi Heseki na usha lwakwe, akee mareiye yefo masukukyony a nkisuku Isaya mwana wa Amosi, yefo Kyitabuny kya Vamangyi va Yuda na Israeli.

³³Esekia kafwa karikwa kwa uwe ya fifu fya Vamangyi. Vandu woose va Yuda na Yerusalemu vakanniinga wiindi uniini nnu. Mwana wakwe Manase kava mangyi ando akwe.