Read BIBILLYA Mareiyo Meele a Iruva 2 MBONY TA FYEERI 36 Bible Online

2 MBONY TA FYEERI 36 - BIBILLYA Mareiyo Meele a Iruva bible

2 MBONY TA FYEERI 36

¹Vandu va Yuda mmbo vesauwa mwana wa Yosia vakamwaamba mafura kava mangyi ya Yerusalemu.

²Yoahas mmbo etiri myaaka makumi avii na iraru kyeeri eva mangyi ya Yuda, nawe kashillya Yerusalemu ando a miiri iraru.

³Mangyi Neko wa Misri kantira mifungwa, kutani Yuda yaniingya ratili fiku mfungare na mayana araanu ta arera na ratili makumi mfungare na isaanu ta saabu kive ni kindo kyemmbauwa.

⁴Neko kaallwa Eliakimu nave mangyi ya Yuda ando a Yoahas, na irina lyakwe kamwaalasha kammbanga Yehoyakimu. Yoahas karawa Misra ni Neko.

⁵Yehoyakimu mmbo etiri myaaka makumi avii na iraanu kyeeri eva mangyi ya Yuda. Kashillya Yerusalemu ando a myaaka ikumi na umwi. Kalyamarya Nndumi Iruva, Iruva wakwe.

⁶Mangyi Nebukadinesar wa Babilony, kanlamya finya, kamfinga na mise naambo ankamare mfungwa andemfita kulya Babilony.

⁷Nebukadinesa kakamara kyenga kya masaa a mmba ya Iterevya, kandeavika kulya mmba yakwe ya kimangyi kulya Babilony.

⁸Mashora moose yoo Yehoyakini atannyi, na findo fingyi fyoose fikasha atannyi, mmbo fikee fireiye yefo kyitabuny kya Vamangyi va Israeli na Yuda. Yehoyakini mwana wakwe kava mangyi ando akwe.

⁹Yehoyakini mmbo etiri myaaka ikumi na nyanya kyeeri eva mangyi ya Yuda, kashillya kulya Yerusalemu ando a myaaka iraru na mikonu ikumi. Nawe katana makasha usanguny lwa Nndumi Iruva.

¹⁰Ando a mwaaka umwi, mangyi Nebukadinesar karuma vandu vakandeondwa Yehoyakini amwi na masaa moose alya a mmba ya Iterevya. Naasa Nebukadinesar kaallwa Sedekia nave mangyi ya Yuda na Yerusalemu ando a mwanamaye Yehoyakini.

¹¹Sedekia mmbo etiri myaaka makumi avii na umwi, kyeeri eva mangyi ya Yuda, kashillya ando a myaaka ikumi na umwi.

¹²Katana makasha usanguny lwa nndumi Iruva; kava mbafu mbee ya nkisuku Yeremia, yeto mwiyaamba Irero lya Nndumi Iruva.

¹³Sedekia nawe kamina mangyi Nebukadinesar ulya emmbikya ishingo kalyiisyamboo na irina lya Iruva, sheelyi nnyakaa natatale-se Iruva-fo. Kalema ikurya, na iwuiya Nndumi Iruva, Iruva wa Israeli.

¹⁴Naakwa ni vasongoru va Yuda, vakohani na vandu woose, vakalatya ngaa shikasha ya vandu va masanga vakaindya maruva a wongo, na itefusa mmba ya iterevya ilya Nndumi Iruva muni ennyivika sheele.

¹⁵Nndumi Iruva, Iruva wa vakuu vawo keengera-se ivarummya varumi ivaikimba naambo vakurye, kimaruma kya ivalyillya wo na mmba ilya ya iterevya.

¹⁶Indi valakunde yaarannya, vakaengera itatala na imina varundi va Iruva, vakamina marero a Iruva, na iseka varumi vakwe kutani Nndumi Iruva arooywa ni ngoo kya vandu yeva kulave-fo nta umwi aidima iturunnya.

¹⁷Kweekyo Nndumi Iruva keende mangyi ya Babilony ivakapa. Vakawaawa vandu veengyi va Yuda vakasandwa-fo na valya vekee yefo mmba ya iterevya. Vandu va ngata shoose, vandu vakuu ao vakoo, vomi ao vaka, valwee ao valalwee Nndumi Iruva kavarammbikya woose vakakombwa kombi.

¹⁸Mangyi kandekurika findo fyoose filya fyekee kulya mmba ya iterevya na masaa engyi moose a mangyi amwi na a vasongoru vengyi vakafikamara fika Babilony.

¹⁹Kakora mmba shoose ilya ya iterevya amwi na muri. Kawunndwa isimamba lya Yerusalemu, kakora mmba shoose ta kimangyi amwi na masaa avayo moose.

²⁰Valya woose veturunya, kawakamara mifungwa fika Babilony, vakandeva-fo mashinga akwe, na vammba yakwe kutani kyeeri kya Umangyi lwa Persia lwapooka.

²¹Nakyo kilya Nndumi Iruva emmamba na kana kya nkisuku Yeremia kyikainukya, “Uruka lushevaa sama, kuleefo iremwa ando a myaaka makumi mfungare, kyiinani na kyeeri kya mikonu ilya ya Sabato kulare yeiinndywa.”

²²Mmbo kwekee mwaaka wa mbee, wa ushilyi lwa Koreshi mangyi ya Persia na kilya Nndumi Iruva, emmamba na kana kya nkisuku Yeremia kyikava dede. Nndumi Iruva kaata makusaro a mangyi Koreshi nawe makusaro yoo kaata kwa vandu vakwe woose yefo, ushilyiny lwakwe na barrwa tireiywa na isomwa kundo koose yefo umangyi lwakwe.

²³“Yelyi ni ishingo lya Koreshi mangyi ya Persia. Nndumi Iruva, Iruva wa Iruveeu, mmbwe aleshisauwa mangyi ya ulana loose, kashiniinga na mashora a irundya mmba yakwe ya interevya ya Yerusalemu kunu urukeny lwa Yuda. Ulaalu yeni moose mukee vandu va Iruva, kwipoony mukeenda na nndumi Iruva, Iruva waany namusongoye.”