Read BIBILLYA Mareiyo Meele a Iruva 2 MBONY TA FYEERI 7 Bible Online

2 MBONY TA FYEERI 7 - BIBILLYA Mareiyo Meele a Iruva bible

2 MBONY TA FYEERI 7

¹Solomon ekimaa kiterewo kyakwe, muro ukaoloka wuuka iruveeu ukamamita firaso filya fyoose fyenningywa, na mmba ikaishurwa itumbe lya Nndumi Iruva.

²Kimmba itumbe lya Nndumi Iruva lyeshura yefo mmba ya Nndumi Iruva Vakohani mbeidima yaanga-fo-fo

³Vaisraeli vekilollya muro wishooloka wuuka iruveeu, na itumbe lya Nndumi Iruva, kulya mmba, mmbo vewa-si kifulifuli kutani fisangu fyapaana sumbai, veshiinndya na irumisha Nndumi Iruva Kya ilillya lyakwe na ikunda lyilatiri umando.

⁴Naasa mangyi Solomon na vandu woose vakautya Nndumi Iruva nsimbika.

⁵Nawe Solomon kautya Nndumi Iruva ng'umbe fiku makumi avii na ivii, na moonri fiku iyana na makumi avii. Ni indo Solomon na vandu vakwe woose vevauwa mmba ya Iruva.

⁶Vakohani vakasalala kyaanya ando kudesye kwawo kwesalala, nawo Valevi vakasalala vetiri findo fya Nndumi Iruva fyeiimba, filya fyensongosywa ni mangyi Davidi fya kiraso kya nndumi Iruva. Vakamwiimbya, “Kimaruma kya ikunda lyakwe lyilatiri umando,” ni indo mangyi Davidi emmbavia. Vakohani vakakapa mbembe na Vaisraeli woose vakava Vaselelyi.

⁷Naasa mangyi Solomo kavauwa mmba ya Nndumi Iruva nnang'ani ya kiria kilya kyikee mbee ya mmba ya Nndumi Iruva, mashika yoondo nng'u kweyuutya firaso kyemamitwa na mafura a urilalyi mashika kitara kilya kyeerasya kya arera kilennya na firaso fikaingifwa.

⁸Nawe Solomon kavika sukukuu ando a mikonu mfungare we na kilula kya vandu woose va Israeli wooka taari ya Hamati kundefika mura wa Misri.

⁹Nkonu wa nyanya, vakakuumbya lyingyi vakavika nndumwa wa kyaanya, tikisia mikonu ilya mfungare ingyi vakailyisa kitara kya irasya, na mikonu mfungare ya sukukuu.

¹⁰Nkonu yeto walatya kwikee nkonu wa makumi avii na kararu wa mwiiri wa mfungare Solomon kasama vandu vaende kwawo vetiri nsia na ifura miriminy yaawo, kimaruma kya simbo yei Nndumi Iruva eniinga Davidi, Solomon na vandu vakwe Israeli.

¹¹Naasa mangyi Solomon kamaa itana Mmba ya Iruva shaasa enkudeesya amwi na mmba ya umangyi na filya fingyi fyoose ekunndye itana yefo mmba ya Nndumi Iruva.

¹²Na yelyi kio Nndumi Iruva kansheya kammbia, “Shammita kiterewo kyafo na yeny shawarya mmba yei ive ando kweeshuutya firaso fyany.

¹³Kwakooya shamwiima mmbwa, ao shamweengye nrie tishelya fimu fyany, ao ndwari shikasha.

¹⁴Kwakooya vandu yewo vakwa vakunyiisa, vatereve na ishiruuya vashera-fo mikaaye yawo mikasha, llyo yeny shishevaarannyaa kuuka iruveeu, shivafwaaye ulyamari lwawo, na uruka lwawo.

¹⁵Ulaalu mmbo shiringaa mmba yei, na yaarannya fiterewo fyany.

¹⁶Mashika shammbauwa mmba yei naambo vandu vainndye-u irina lyakwa llung'anu. Mmbo shiiringaa na ikunda kyeeri kyoose.

¹⁷Kwakooya kwashirunndya na ishiindya sha ndeye wafo Davidi, kwirundaa na ilatya filya fyoose shilekuvavasya, na ilatya ushilyi lwakwa,

¹⁸llyo nshevangisa kiri kyafo kya ushilyi shaasa shevikyana kyaasa na nde-wafo Davidi shammbia, ‘Kwafo nkwushekaa kuturike-fo nndu wa ishillya Israeli-fo.

¹⁹Indi mukalema ilatya ushilyi na mavavaso akwa shilemuniinga, mukeenda ilatya maruva engyi na yiaiindya,

²⁰mmbo shishemurwaa muuke kunu urukeny yelu shilemunniinga. Naakwa ni mmba yei shileivauwa na irina lyakwa, mmbo shisheifwallya kwaasha na yeny shisheyaallwa kindo kiipale na yiilwa nnang'ani a vandu va masanga moose.’

²¹“Na kya mmba yeyo ikerumisha irina lyakwa, wo nndu ashiira-u, mmbo ashaaukwaa, na ivesa, ‘A nkikyi Nndumi Iruva atane indo kya uruka yelu, na kya mmba yei?’

²²Llyo vandu vasherouwa vaambe, ‘Ni kimaruma kya elyi valeepala Nndumi Iruva, Iruva wa vasawoye vawo yeto alewauta urukeny lwa Misri, vakaiindya na irunndya maruva engyi. Nkyo kimaruma Nndumi Iruva kaveengye ngapo yei.’”