Read BIBILLYA Mareiyo Meele a Iruva 2 MBONY TA FYEERI 8 Bible Online

2 MBONY TA FYEERI 8 - BIBILLYA Mareiyo Meele a Iruva bible

2 MBONY TA FYEERI 8

¹Immiira miaka makumi avii uka mangyi Solomon etana mmba ya Nndumi Iruva amwi na mmbaa umangyi.

²Nalyo Solomon katana wiiya miri ilya eniingwa ni Huramu, ekimaa itana kaniingya Vaisraeli miri yeyo vakaa-fo.

³Keengera katira miri ya Hamati na Sabali.

⁴Kulya kasa kandetana-fo muri wa Tadmori. Na kundo kweesuruma findo katana wiiya kulya Hamati.

⁵Solomon kaengera itana miri ingyi mmwasi kulya Beth-horoni wa ndoo, na Beth-horoni wa sinde, miri mitani nisha-deny.

⁶Muri wa Baalati na miri ya vayo kundo kweyuummbya findo na mitika ishomuwaa na ingyi a vesaama frasi vakwe, na findo fyakwe fiingyi fyoose yefyo ekunndye ifitannya kulya Yerusalemu, Lebanoni na kundo kungyi yefo umangyi lwakwe.

⁷Vandu vengyi woose valesaafo nnang'ani ya Vaheti, Vaamoro, Vaperesi, Vakifi na Vayebusi ni valya woose valakee Vaisraeli,

⁸na vengyi maata valya vesaafo kulaore vemamitwa mbaisraeli mmbo Solomon evaniinga mashora maroo a-iitikywa na nnyindo vatannywaa fika inu.

⁹Indi nnang'ani a vandu va Israeli, nkwiifo nta umwi Solomon enniinga mashora a ushinga-fo, wo mmbo veningwa mashora a ilola na isalallya varundi mashinga woose, na mitika ya frasi, na vengyi vesaama mitika ifuruwaa ni frasi.

¹⁰Velola vaniini va vashilyi va mangyi Solomon ni vandu mayana avii na makumi araanu.

¹¹Solomon kashesamisa nka wakwe mfu wa mangyi ya Misri, ooka muriny wa Davidi kulya emmutannya mmba yakwe. Mmbo aamba, “Nka wakwa nnyashiidimaa ikaa mmba ya Davidi, mangyi ya Israeli-fo, mashika wo ando isanduku lya Nndumi Iruva lyambikwa mmbo kwava ni Kweele.”

¹²Solomon kaniingya Nndumi Iruva firaso fyeemamitwa uwe ya kitara kyerasya kilya entannya Nndumi Iruva yefo mmba ya Iruva.

¹³Mmbo eniingya firaso yefyo kyuukana na ivavaso lya Mose lya wo nkonu Mweele wa yiimuya. Yelyi mwiiri wipooka, suku kuu isaru ta wo mwaka. Sukukuu ya mikate ilatiri ntarang'o na sukukuu ta matengo.

¹⁴Eelatyaa mavavaso a Davidi we ndeye, kavika uramba lwa yaallya makamba, wo mikonu ya Vakohani na ya Valevi veyeekya Vakohani irumisha Iruva na iveekya yiinutya mashora awo. Na kya mmwasi kavika uramba lwa vesalala mwangony kwi makamba, wo mwaango kavika-fo vandu vesalallya; yeto ni mumu wa Davidi nndu wa Iruva.

¹⁵Vakohani na Valevi vakalatya na itana filya fyoose mangyi emmbavasya fikwaani na mmba ya isuruma findo.

¹⁶Naasa uramba lwa mashora a Solomon moose, kupookya iwe lya nndumba lya mmba ya Nndumi Iruva lyivikwa akainukya. Ni indo mmba ya Nndumi Iruva yesia.

¹⁷Kyaangu Solomon keenda Esion-geberi na Eloti yeyo ifiitani na Yeeve lya uruka lwa Edomu.

¹⁸Huramu, kanrikya merikebu tilya tekee kwasi ya ushilyi lwa vesalallya vakwe amwi na verunda vesha va merikebu yeto. Yewo amwi na vesalallya va Solomon vakeenda fika Ofiri, vakandekurika-fo saabu vakaengye mangyi Solomon kilo fiku ikumi na firaanu.