Read BIBILLYA Mareiyo Meele a Iruva 2 MBONY TA FYEERI 9 Bible Online

2 MBONY TA FYEERI 9 - BIBILLYA Mareiyo Meele a Iruva bible

2 MBONY TA FYEERI 9

¹Malkia wa Sheba ekiita mbony ta Solomon shaasa tikee shisha mmbo efinga kyaaro keenda Yerusalemu naambo akooye ivika Solomon fyeesony, fya immbesa fiveso fyuumu. Mmbo eenda aryani na nsemu wa vandu, amwi na ngamula tikurikye mafura afwaamaa nisha, saabu shiingyi nnu amwi na mawe a wuuru uniini. Na kyeeri efika kwa Solomon mmbo emmbya fyoose yefyo etiri nriminy mbwakwe.

²Solomon mmbo erouwa fiveso fyoose kuleefoo kimwi kyemweengye tamba.

³Malkia wa Sheba ekilollya urilalyi lwa Solomon na mmba ilya emaitana

⁴na mmwasi ekilollya shoonga ilya vemmuvikya meseny yakwe, kalollya na vesalallya vakwe shaasa vakwaallye meseny, na varundi valya veefurukannya veny shaasa varee soori shisha, na varundi vengyi woose, na kiraso kyeemamitwa kilya kyeniingywa kulya mmba ya Iruva, kyeeri elollya findo yefyo fyoose mmbo ooma ang'any.

⁵Naasa kavia mangyi, “Fyoose shilemmiita kulya urukeny lwakwa kya mashora afo, na urango lwafo ni dede!

⁶Indi nsheedima yiirikya mbony tawo-fo, kutani yelyi shafika ilola na miso akwa shimuni; ate mmbo shevywa findo kyenga-nsi, urango lwafo, na wiidimi lwafo ni mmwasi ya yefyo shevywa.

⁷Vaka vafo vatiri ngoma! Amwi na varundi vafo woose yewo vakekufurukannya na yaarannya seu tafo mikonu myoose.

⁸Nndumi Iruva, Iruva wafo narumishwa yeto kulennsenya, kutani akuvika kitiminy kyakwwe kya umangyi kuve mangyi ando a Nndumi Iruva, Iruva wafo. Mashika Iruva wafo mmbo alekunda Vaisraeli kavaniinga finya ilatiri umando, kakuseleesa yewe kuve mangyi uwe yaawo, kusalallye yewe usumanu na wiindi.”

⁹Naasa kaniinga mangyi mmwasi ya kilo fiku fiina fya saabu na mafura mesha afwaamaa na mawe a wuuru uniini. Mafura yoo Malkia wa Sheba eniinga mangyi Solomon mmbo ekee mafura a ngata ya kyaanya deny.

¹⁰Varundi va mangyi Huramu na mangyi Solomon valya veende saabu yuuka Ofiri, veende na miri misha deny ya mbau amwi mawe a wuuru uniini.

¹¹Solomon mmbo erunda na mbau tilya kasongosya kai ka mmba ya Nndumi Iruva na mmba ya ushilyi, kasongosya fivale na finanda fyeeimmbya Iruva. Mbony ta ngata yei ntilelollyo tusu kunu urukeny lwa Yuda-fo.

¹²Nawe mangyi Solomon kaniinngya Malkia wa Sheba wo kindo kilya nrima wakwe welanga; wo kindo aletereva mmbo alenniinga kuuta-fo filya aleengye mangyi Solomon. Mafurumyony Malkia mmbo ekwipoo kawuya urukeny lwakwe aryani na varundi vakwe

¹³Wo mwaaka mangyi Solomon mmbo ekewarya saabu kufii tani fiku makumi avii na firaanu.

¹⁴Kilasha na ilya ekewarya yuuka kwa vekapa mbusha vandu vaniini; na ingyi yuuka kwa vamangyi va Arabia na vaniini va fyuungo yefi finiini fyoose fya Israeli.

¹⁵Mangyi Solomon kasongosya ngao yeti shiniini mayana avii; na wo imwi ikaambwa kilo mfungare ta saabu shisangye.

¹⁶Kasongosya ngao tingyi shidu mayana araru nato tikaambwa kilo isaru ta saabu wo imwi, naasa mangyi kandetivika mmba ivaangwa ngorosho ya Lebanoni.

¹⁷Mangyi keengera kasongosya kitima kya umangyi kiniini, kakyaamba saabu shisha.

¹⁸Kitma yekyo mmbo kyeetiri fitere firindaru, na kitima kya yeekerya marende kya saabu, fyoose yefyo mmbo fyekee filungye yefo kiminy kya umangyi, na wo taari mmbo kweiyo ando kwa yeekyerya maako, kweiyo mafwanu a miiso avii yoo kufii na ando kwa yekyerya maako.

¹⁹Kweiyo mafwanu a miiso ikumi na avii asalalyi yoo masiyyony a fitere. Nkwiifo umangyi lungyi loose lwensongosya kitima kya ngata yei-fo.

²⁰Maleseri moose a mangyi Solomon mmbo ekee a saabu, na findo fingyi fyoose yefyo fyekee yefo mmba yei ya ngorosho ya Lebanoni mmbo fyekee fya saabu shisha. Fesa nnyekee kindo kya toki kyeeri kya ushilyi lwa Solomon-fo.

²¹Solomon mmbo etiri merikebu teshendaa kufike Tarshishi na varundi va Huramu, ando a myaaka iraru mmbo vewuyaa veerye saabu, fesa, mbembe mafuwe na tausi.

²²Mangyi Solomon mmbo ekee isimba kailannya vamangyi vengyi woose ulaniny kava nndu atiri seu na umasi.

²³Na vamangyi va ngyuruka tingyi toose mmbo veshendaa kwa mangyi Solomon ikunda imwaarannya seu takwe yeto Iruva anniinngye.

²⁴Na wo mangyi eshendaa kwakwe mmbo enrwaaya findo fya pya, fya fesa, fya saabu, soori, fisha fya fira, mafura afwaamaa nisha, frasi na matiko.

²⁵Mangyi Solomon mmbo etiri masara fiku fiina aivika frasi na mitika, na vasikari vesaama frasi fiku ikumi na fivii, yeva woose kavavika miriny itiri fiteshe fya mitika a frasi na kulya Yerusalemu.

²⁶Mmbo eshillya vamangyi woose veifo kupookya mura wa Efrate kundefika urukeny lwa Vafilisti na miriny ya Misri.

²⁷Kyeeri kya ushilyi lwa Solomon kulya Yerusalemu fesa ntekee kindo kyeeruya-fo mmbo teishwe shapu sha mawe kataallwa sha mbau ta mieresi na makuu ya Shefela.

²⁸Solomon mmbo engyo frasi tuuka Misri na kundo kungyi koose.

²⁹Mbonyi tingyi ta Solomon uka mapookyony fika mafurumyony a ushilyi lwakwe mmbo tikeeshireiye kyitabuny kya mbony ta nkisuku Natani yefo ukisukuny lwa Ahiya wa Shilo, kasanda-fo na nkisuku Ido Mwilola yeto alereiya mbony ta Yoroboam mangyi ya Israeli.

³⁰Solomon mmbo aleshillya uruka lwa Israeli shoose ando a myaaka makumi aana.

³¹Nawe Solomon kafwa karikwa kulya muriny wa Davidi we ndeye; Na mwana wakwe Rehoboamu kashillya ando akwe.