Read BIBILLYA Mareiyo Meele a Iruva ESRA 1 Bible Online

ESRA 1 - BIBILLYA Mareiyo Meele a Iruva bible

ESRA 1

¹Naasa elyi wekee mwaaka wa mbee, wa ushilyi kwa mangyi Koreshi wa Uajemi, naambo irero lya Nndumi Iruva lyikooye yiinutyo llya alerera nkisuku Yeremia kaambe, Nndumi Iruva kapana nrima wa Koreshi mangyi ya Uajemi, mangyi kakapa weele kulya urukeny lwakwe koose, nakyo kikareiyo, Kyeyaamba,

²“Koreshi mangyi ya Uajemi aamba, Nndumi Iruva, Iruva wa ruveu, mmbo ashirambikye ngyumangyi toose ta ulana, kashivavasya shindentannya mmba kulya Yerusalemu, muriny wa Yuda.

³Nkyony yeni moose va uruka lwakwe, wo umari Iruva nantarami needimi ilollya Yerusalemu muri wa Yuda, nandetana mmba ya Nndumi Iruva, Iruva wa Israeli, mmbwe Iruva akee efo Yerusalemu.

⁴Na yeto moose aleturushuka akee ando koose sha muny neekyo ni vandu va yoo akai venniinga fesa, saabu, na findo fingyi amwi na samana, mbai firaso fya pya kwa kimaruma kya mmba ya Iruva ikee Yerusalemu.”

⁵Llyo vaniini va ngyufyari ta vandu va Yuda na Benyaminy na vakohani na Valevi, na vandu vengyi woose valya Iruva ampaana mirima yaawo naambo varwe indetana-se mmba ya Nndumi Iruva kulya Yerusalemu.

⁶Nalyo vandu vekee nawo vakaveekya, vakavaniinga fiyya fya fesa, na saabu, masaa engyi, na findo fyeevikya, na findo fya wuuru, fiingyi nnu vakafiniingya fya pya.

⁷Nalyo Koreshi kaniingya fiiya fya mmba ya Nndumi Iruva filya Nebukadresa alefyuuta kulya Yerusalemu, kafyaallwa fya mmba ya maruva akwe a vongo

⁸Mangyi Koreshi wa Uajemi keende fiiya yefyo karika Mitredati, mwiikallya mboloko ya fesa, kafyeekyena kandefirambikya Sheshibasa, we nniini wa Yuda.

⁹Nafyo nyefi: mideeva kyiku ya saabu, mideeva ya fesa kyiku kimwi saani makumi avii na kyeenda.

¹⁰Fideeva fya saabu makumi araru fideeva fingyi yaambo fiku fivii mayana aana na fiiya fingi kiku kimwi.

¹¹Fiiya fyoose fya saabu na fya fesa ni fiku firaanu mayana aana makumi arindaru na kyeenda. Efyo mfyo Sheshbasa alerwa nafyo ando amwi na vandu valya valeuka usamirony Babilony vakandefika Yerusalemu.