Read BIBILLYA Mareiyo Meele a Iruva ESRA 10 Bible Online

ESRA 10 - BIBILLYA Mareiyo Meele a Iruva bible

ESRA 10

¹Nalyo elyi Esra eefo atarevaa nepara ulyamari indo, kakutuula, si kifulufulu yoo mbee ya mmba ya Iruva womi vaka na vana va Israeli veengyi nnu vakakusanyirya yoo akai, veeshiiyaa nnu.

²Nalyo Shekani mwana wa Yehieli, ni umwi wa vana va Elamu, kavia Esra, “Yese mmbo lulelyamarya Iruva weeru llya luleora vaka veny efo vanduny yewo va uruka elo, lyo luvikye nsia kwiifo kyetana kimaruma kya Israeli.

³Ulaalu luvikye Iruva kyaasa, lulakani na vaka yewo veny, ando amwi na vana vawo, lulatye ekyo lwavavasyo na valya vaindyaa mavavaso a Iruva weeru, lutani indo shaasa mavavaso akwe akai.

⁴Kyasia kupoony te ni ishora lyafo kulyitani, na ukaari, lukee neewe.”

⁵Nalyo Esra kakupoo, kalyisa vakohani na vasongoru mboo na Valevi na Israeli woose, vakairikya itana shaasa avavia, vakalya mboo.

⁶Esra kookany yoo mbee ya mmba ya Iruva, kaanga neefo kiryeny kya Yehohani mwana wa Eliashibu, kalala rony nnyalelya shoonga-fo, nta nani mura-fo, mashika mmbo ekeiya kimaruma vandu va usamirony valetura kikusiryo.

⁷Vakakapa weele kulya Yuda koose na Yerusalemu naambo valya valeuka usamirony woose vakusanyirye kulya Yerusalemu,

⁸na nndu ara nalafikafo ando a mikonu iraru kyuuka na ivavaso lya vasongoru na vamiku mmbo ashesokwaa findo fyakwe fyoose, naverauwa na vandu vengyi woose.

⁹Nalyo womi woose va Yuda na Benyamen vaakakusanyirya kulya Yerusalemu ando a mikonu iraru, nato wekee nkonu makumi avii wa mwiiri wa keenda; nawo vakakaa rembo yoo poo mbateny mbee ya mmba ya Iruva, veereremaa kimaruma kya mbony yeyo, neelyi mmbwa yekee kapa nnu.

¹⁰Naasa nkohani Esra kasalala, kavia vandu, “Mmbo mulelyamara elyi muleora vaka veny, mukang'anisa ukasha lwa Israeli.

¹¹Kyasia ulaalu kuryeny mbee ya Nndumi Iruva, Iruva wa vandeye vany, mutani ekyo akunndye, mukurauwe na vandu va uruka elu na mulakani na vaka yewo veny.”

¹²Llyo ikwaanu lyoose lyikarouwa kwa unyanga uniini deny woose vakaamba, “Shaasa kwaluvia niindo lutanaa.”

¹³Vakeengera yaamba, “Vandu yeva ni veengyi na mmbwa mmbo yiifo ikapaa, lulashidimaa isalala poo, neelyi nshi ishora lya nkonu umwi-fo ao ivii-da-fo, neese mmbo lulyamarye kiniini-dwa.

¹⁴Kyasia vasongoru veru vasalale ando a ikwaanu lyoose, neewo woose efo miriny yeeru varye vaka veny vavangwa vashe kwa kyeeei kikwaani, ando amwi na vamiku na Valeti va wo muri kutani unyafi lwa Iruva luluuke.”

¹⁵Nalyo vakairikya woose kuuta Yonatan mwana wa Asaheli, na Isaya, mwana wa Tikwa, wo mmbo vakalema ekyo kyarerwa amwi na Meshulamu na Shabetai, vekee Valevi vakakaa kyaalu kyawo.

¹⁶Lyo valya valeuka usamirony vakatana shaasa kilererwa. Nalyo nkohani Esra kasauwa vasongoru va mmba vandeye-awo wo shaasa veekai. Vakavika shila nkonu wa mbee wa mwiiri wa ikumi, vakakaa rembo isununda mbony yeyyo.

¹⁷Vakamaa isongosia mbony ta womi yewo woorye vaka veny wikee nkonu wa mbee wa mwiiri wa mbee.

¹⁸Nnang'ani a vana wa kyuumi va Vakohani yewo veerye vaka veny, kukakooyo-fo vana va Yossua, mwana wa Yosadaki na vana va maye, Maaseya na Elieseri, Yaribu na Gedalia,

¹⁹Yeva vakakureeka ilakana na vaka vawo, vakoota na suva ive kiraso kya ukasha lwawo.

²⁰Na vana wa Imeri, ni Hanani na Sebadia,

²¹Na vana wa Harim ni Maaseiya, Elia, Shemaya Yehieli na Usia.

²²Vana wa Pashuri, ni Elioenai, Maaseya, Ishmaili, Netaneli, Yosabadi na Elasa.

²³Na va Valevi ni: Yozabadi, Shimei, Kalaiya (ao Kelita), Petahia, Yuda na Eliezeri.

²⁴Na wa Veembi ni Eliashibu. Na va Vesalala ngiriny ni Shalumu, Telemu na Uri.

²⁵Na wa Israelii vana va Paroshi, Ramia, Isia, Malkiya, Miyamini, Eliezeri, Malchiya na Benaiya.

²⁶Na vana va Elam ni Matania, Sekaria, Yehieli, Abdi, Yeremoti na Elia

²⁷Vana va Satu ni, Elioenai, Eliashibu, Matania, Yeremot, Sabadi na Asisa.

²⁸Na vana va Bebai ni Yehohanan, Hanania, Sabai na Atlai.

²⁹Vana va Bani ni Meshulamu, Maluki, Adaya, Yashubi, Sheali na Yeremoti.

³⁰Vana va Pahat-Moabu ni Adna, Kelali, Benaya, Maaseya, Matania, Besaleli, Binui na Manase.

³¹Na vana va Harim, Elieseri, Ishiya na Malkiya na Shemaya na Shimeoni,

³²na Benyaminy, Maluki na Shemaria

³³Vana na va Hashum ni Matenai, Matata na Sabadi. Elifaleti Yeremai, Manase na Shimei.

³⁴Vana va Bani ni Maadai na Aramu na Ueli,

³⁵na Benaya na Bedaya na Keluhi,

³⁶na Wania na Meremoti na Eliashibu

³⁷na Matania na Matenai na Yaasu

³⁸Na vana va Binui, ni Shimei,

³⁹na Shelemia, Natan na Adaya

⁴⁰na Maknadebai na Shashai na Sharai,

⁴¹na Asareli, Shelemia, na Shemaria,

⁴²na vana va Shalumu na Amaria na Yosefu,

⁴³vana va Nebo ni Yeieli na Matitia na Sabadi na Sebina na Ido, na Yoeli na Benaya.

⁴⁴Yewo woose mmbo valeora vaka veny, vaka vawo maata mmbo veetiri vana, vakoombutwa na vana vawo.