Read BIBILLYA Mareiyo Meele a Iruva ESRA 4 Bible Online

ESRA 4 - BIBILLYA Mareiyo Meele a Iruva bible

ESRA 4

¹Nalyo vakiduva va Yuda na Benyaminy veekiita sheelyi vandu valya valeuka usamirony Babilony mmbo vaketannya Nndumi Iruva we Iruva wa Israeli mmba ya mwiiindye,

²vakasheya Serubabeli na vasongoru va ngyufyari ta vakuu, vakavavia, “Lutani mmba yei loose, mashika naakwa ni yese mmbo lwiinndyaa Iruva sheeni, neese mmbo lumuutyaa firaso uka kyeeri kya Esar-hadoni ekee mangyi ya Ashuru, na mmbwe yeto alelweende yaa”

³Kyeendi we Zerubabeli na Yosua na vasongoru valesa-u va ngyufyari ta vakuu va Israeli, vakavia, “Yeni nkimukooye ilweekya itannya Iruva weeru mmba-fo. Mmbo lutanyaa Nndumi Iruva, Iruva wa Israeli mmba yese luveni, shaasa mangyi Koreshi wa Uajemi aleluvavasya.”

⁴Nalyo vandu va efo urukeny vakawaa vandu va Yuda nrima, vakavasaerese, vakavaleesa kyeeri vekeetana mmba yeyo.

⁵Lyingyi vakataa vashilyi va Vajemi vavafulute. Vakatana indo kyeeri kya mangyi Koreshi wa Uajemi, kufike kyeeri kya mangyi Dario.

⁶Nalyo kyeeri kya ushilyi lwa Ahasuero, llyo alepooka ishillya, vakiduva vakareiya mmbony ta uriingi uwe ya vandu va Yuda na Yerusalemu.

⁷Na fyeeri fya Artashasta, Mitredati, na Tabeeli na wooroye vawo-vesaaye-u vakareiya Artashasta, mangyi ya Uajemi fiidikiro fyakwe, fikareiyo na mireiye ya barrwa yeyo fireiyo fya vayo fyekee fya Kiaramu.

⁸Na Rehumu nshilyi waawo, na Shinshai, mwiireiya, vakareiya barrwa kwa Artashasta, uwe ya vandu va Yerusalemu ikaamba indi,

⁹Ni yeny Rehumu, Nshilya nniini, na Shimshai, mwiireiya na vandu vawo, vashilyi va Uajemi, na Vaarkewi, Vababeli, Vashushani, mmbo Vaelamu,

¹⁰neewo vengyi valesaafo, valya Ashuri-banipali niini, mwiindyo, alevaruuta kashevavika muriny wa Samaria na kundo kungyi-da, urukeny lwa taari ya nkwaany ya mura wa Efrati.

¹¹Yei nnyo barrwa vandu yewo valerikya mangyi Artashasta na Varundi vafo valya vakee taari ya nkwaany ya mura wa Efrati, vakwiidikira. Na ulaalu

¹²Mmbo kisumani mangyi namanyi sheelyi Vayuda, valya valeuka kwafo, mmbo valesha kunu kweru Yerusalemu. Nawo mmbo vambooka-se itana wuiya muri yeu llyang'a na nkasha, Mmbo vammaa iveiya uvasha lwa vayo neesaamisa isimamba lya vayo.

¹³Kyasia yese mmbo lukundye mangyi namanyi sheelyi kwakooya muri yeu watanwa na isimamba lya vayo lyasia itanwa, vandu yewo mmbakiutaa isanu, nta ukamba nta vaavi loose yefo mbolokony ya mangyi-fo, nkuwonika-fo kindo-fo.

¹⁴Ulaalu kimmba lukee urundiny lwa mangyi, nta lulakundye ilollya mangyi eturaa wiindi lusumani-u, nkyo kiteve lukaruma rumi ishemanyisya mangyi mbony yeti

¹⁵Naambo mbony tisunundo efo kyitabuny kya uramba uka elyo lya vakuu vawo. Llyo kushekooya efo kyitabunyy ekyo imanya dede sheelyi muri mmuri llyang'a utavisaa vamangyi na vashilyi, ukavatannya meesi, na vandu va vayo uka kasha vakarika uriingyi, nkyo kileteva muri yeto ukalyamarwa.

¹⁶Mmbo lwavia mangyi paa, kwakooya muri yeto watanwa lyingi na masimamba a vayo akamarisywa efo urukeny lwa taari ya nkwaany ya mura wa Efrati nkuvaa uruka lwafo-se-fo.

¹⁷Nawe mangyi kirouwa indi, Kwafo Rehimu, Nshilyi nniini, na Shinshai, mwiireiya na kwa yewo vengyi vakee Samaria neefo taari ya nkwaany ya mura wa Efrati, shamwiidikira.

¹⁸Ulaalu barrwa ilya mulelurikya mmbo ilesomwa yoo mbee yakwa.

¹⁹Shoota ivavaso mbony yeto tindesumwa. Nakyo kikalollyo sheelyi muri yeu uka mbee mmbo uriingyaa vamangyi, na ulyang'a na uriingyi filembutikafo.

²⁰Nalyo mmbo kweifo vamangyi vatiri nnduma efo Yerusalemu, valya valeshillya uruka loose elo lukee taari ya nkwaany ya mura wa Efrati, vakasannyo usanu na ukamba na udedemi.

²¹Ulaalu uteny ivavaso naambo ishora elyo lyisalale, muri yeu ulatanwa-fo, kutani elyi yeny nshuuta ivavasyo.

²²Kwiiseny mularokoye mbony yei, mashika nkivaa ullyang'a elu lweengereke na mangyi nature usanu-fo.

²³Kyeeri barrwa yei ya mangyi Artashasta ilesomyo Rehumu ulya nshilyi nniini, na Shamishai, mwiireiya ando amwi neewo vengyi, vakaangusya vakeenda Yerusalemu, vakandekyeemya Vayuda na finya, na iveema valakitani muri yeto-fo.

²⁴Nalyo ishora lya itana mmba yeyo ya Iruva ya Yerusalemu lyikamanda kyikaenda indo fika mwaaka wa kavii wa ushilyi lwa mangyi Dario wa Uajemi.