Read BIBILLYA Mareiyo Meele a Iruva ESRA 9 Bible Online

ESRA 9 - BIBILLYA Mareiyo Meele a Iruva bible

ESRA 9

¹Numa ya efyo fyoose fikimaa itanyika, vasongoru va Israeli valeshisheya vakashiywa, vandu va Israeli na vakohani na Valevi mmbalekikaa kwaasha na vandu va ngyuruka eto-fo, vakakureveesa na Vakanaani, Vahiti, Vaperisi, Vayebusi Vaamoni, Vamoabu, Vamisri na Vaamori.

²Mashika mmbo valeora vana va kyika va vandu yewo na yaalyikkya vana vawo va kyuumi-da. Nkyony vandu yeva veele vankusasanda na vandu va ngyuruka yeti. Vasongoru na vashilyi vawo mmbo valeepooka itana indo.

³Llya shileeta indo sharandwa soori takwa na kansu yakwa, shamushwa fii takwa na nguyo, shakaa rembo shakunarya.

⁴Llyony vandu woose vakatirwa mmbwerei kimarumaa kya marero alerera Iruva wa Israeli kyuuka na makasha a valya valewuya wooka usamirony kyeeri valepooka ikusanyirya kufii neeny yoo shilekaa shikunarye fika kyeeri kya yuuta kiraso kya nkwaany.

⁵Nalyo kyeeri kya kiraso kya nkwaany shasalala shiikee na fyoova nnu soori takwa na kansu yakwa tiirandukye indo, shafiirya ndi, shooroya Nndumi Iruva, Iruva wakwa maako akwa,

⁶shaamba, “Woi Iruva wakwa, mmbo shasuka deny, shalollya sony isalala mbee yafo, yewe Iruva wakwa, mashika uravi lweru mmbo lwafumbuka lukasikya mirwe yeeru, ukasha lweru lukarwa lukakooya iruveeu.

⁷Uka elyo lya vakuu veru kufike inu uravi lweru mmbo luleva uniini, nalyo kyeendwa ni uravi lweru yese na vamangyi veru na vakohani veru, mmbo lulerambikyo maakony a vamangyi vengyi va ngyurukeny tingyi lukawaawa neekurikwa usamirony, lukasokwa masaa eru, lukasutwa, fika inu.

⁸Lyo ulaalu kyeeri kyaangu Nndumi Iruva, Iruva weeru kaluviira, valya valesaa-fo, kwaluniinga uruka weele. Iruva weeru nalwambure miso luwuiyo mmuu kinnyo elyi lwekee usamirony.

⁹Mashika yese mmbo lukee ushingeny tupu, lyo Iruva weeru nalalure efo ushingeny lweru-fo, kyeendi kalufitya isarya lyakwe, vamangyi va Uajemi veelollye, naambo luviirwa muu, lushetana mmba ya Iruva, weeru iwundukye kuve ando kweekapa mungo kunu Yuda na Yerusalemu.

¹⁰“Woi Iruva weeru, lukaamba-ki ulaalu numa ya yekyi? Mashika mmbo lulera-fo mavavaso afo,

¹¹alya kulevavasya kwa kana ka varundi vafo wovakisuku, veshaamba, “Uruka elo mukee-enda-fo nelutira, ni uruuka utefusu lutiri meesi a vandu va ngyuruka yeto amwi na iswa lyiiishwe-fo uka taari imwi kufike taari ingyi amwi na utefusu lwawo.

¹²Kimmba niindo mulavalekeye woore vana vany va kika, nta mulaore vana vawo va kika-fo, vanllyo mushengeraa itira finya mukae nisha muvelya mbora ta uruka elo, muveereeya vana vany llung'anu.

¹³Neefyo fyoose fiikilukooya kyeendi ni uravi lweeru lwiilannyi kyeeso, neewe Iruva weeru kulakundye ilutaiya kiinani na uravi lweru, kyeendi kwatana kwalureeya-fo yeva valesaafo,

¹⁴a ndesa kivaa lwiimbwe lyingyi mavavaso afo na yaalyikana neewo valetana fya iswa? A mmbo kweeraa kulasukyo ni yese neelumamita deny, kure kulesaa-u nndu aturunya?

¹⁵Woi Nndumi Iruva, Iruva wa Israeli ni yewe muni usumanu, nkyo kileengye yese lukasaau shaasa luiyoo inu. Naasany ekakava yese lukee varavi, kulaiyoo nta umwi weeru ashiidimaa ikaa na isalala mbee yafo-fo.”