Read BIBILLYA Mareiyo Meele a Iruva NEHEMIA 2 Bible Online

NEHEMIA 2 - BIBILLYA Mareiyo Meele a Iruva bible

NEHEMIA 2

¹Nalyo mwaaka wa makumi avii wa ushilyi lwa Artashasta wiikee mwiiri wa Nisan, shaanga na meseny kwa mangyi naambo shinniingye mfinyo, neeny nkonu yeto mmbo sheerovyo nnu nriminy.

²Naasa mangyi kashivesa, “A mmbo kulwee nta elyi kisangu kyafo kyoorye irovyo indo? A nkyoki ekyo kulore nrima wafo mmbo ukee nrovye.” Elyi ashivesa indo shairyaa deny.

³Naasa shavia mangyi, “Wara finya mangyi. Kisangu kyakwa mmbo kiraa inda kiloora ting'wa, na muri ulya utiri fifu fya vakuu vakwa mmbo uleva sama (ukava nrabu), na ngiri ta vayo tikakorwa na muro?”

⁴Llyo mangyi aleshivia, “A ulaalu nkyoki kukundye ishitereva shikweekye?”

⁵Naasa shavia mangyi, “Kwakooya kisennyaa mangyi, na kwakooya kusennyo ni yeny, woi mangyi, mmbo shakutereva kushifite kulya Yuda, shifike efo muriny yeto utiri fifu fya vakuu vakwa shindeutanase.”

⁶Mangyi eekee ando amwi na nkaamangyi kashivesa, “A kyaaro kyafo nkya mikonu yiinga, kweeta kwandewuya?” Shikimaa indouwa kairikya sheende.

⁷Shooka-fo shavia mangyi, “Mmbo sheeterevaa mangyi barrwa sheende nayo, naambo shindeora vashilyi valya kulya kwakulya ya mura yeto vasheekeye shiire sheende Yuda.

⁸Shiningwa na barrwa yeerwaaya Asafu yeto mwiikallya nyorosho ya mangyi, naambo nashiniinge miri na maboo eesongosya myaango na ngiri ta muri, na mmba yeyo shindekaa yeny.” Naasa mangyi kashiniinga barrwa shaasa Iruva wakwa aleshikundya.

⁹Nalyo shandefika kwa vashilyi valya vakee kwakulya ya mura, shavarambikya barrwa yeto ta mangyi. Nawe mangyi mmbo enshiniinga vasikari vakwe va frasi na vasongoru vengi vashiimye.

¹⁰Nalyo nndu umwi eevaangwaa Sambalati, Mooroni na nndundi wakwe avaangwaa Tobia, Mwamoni, llya valeeta mbony takwa indo, vakaswa nnu, vai mashika elyi anshanndu ashetanyaa Israeli weeki.

¹¹Naasa shiikifika Yerusalemu shakaa-fo ando a mikonu iraru.

¹²Naasa kio kimwi shakuboo shiiriani na vasero vakwa vaangu, kulore shemmivia nta nndu kindo Iruva wakwa enshivavasya shikitani kimaruma kya Yerusalemu. Nta nsheerye kindo kyingi kuuta nshungu yeto sheensaanye-fo.

¹³Shasomuka kio shasora ngiri ilya ilollye kulya imungony, shasora shia yeenda kulya kiroriny kya shoka, na ngiri ya mbulula, nafo shalola mimbombo ya Yerusalemu shaasa uwundukye-wundukye na ngiri ta vayo tikakorwa na muro.

¹⁴Shookau sheenda alya ngiriny ya ngyusoka, na iruva lya mangyi, lyo nkweeiyo mwaanya wa yiira na nshungu ulya shiusaamye-fo.

¹⁵Kyeeri kya kio shasaama na alya mbai ya mfongo, shalola isimamba, shawuya shandeera na alya mbai ya mfongo, shalola isimamba, shawuya shandeera na alya ngiriny ya imungony.

¹⁶Nta vasongoru mmbalemanya kindo shekeetana-fo, nta nshelevia Vayuda nta vakohani-fo ao nta vandu vengi-fo.

¹⁷Naasa shavia vandu, “Ulaalu mulollye shaasa lukee vafwafwa, na shaasa muri weru wa Yerusalemu ukee sama, na ngiri ta vayo tikee shikore na muro. Kyasia, ulaalu lutane isimamba wa Yerusalemu naambo luleengere iva vandu va yiipalwa.”

¹⁸Naasa shavia shaasa Iruva wakwa aleshitetera, na marero alya mangyi aleshivia, shavavia. Nawo vakaamba, “Naasa, ndefony-te lundetana Yerusalemu.” Nalyo maako awo akavanga irunda ishora elyo isha.

¹⁹Kyeeri valeeta sheelyi Sambalati Mooroni na Tobia nndundi wakwe, Mwamoni na Geshemu, Mwaarabu, mmbo valeluseka, vakalumina, vakaamba, “Nkyoki eki mukeetana, a mmbo mukundye ilema ivavaso lya mangyi?”

²⁰Naasa shavavia, “Ni Iruva yeto wa iruveen ashelwiidimisyaa, nkyo yese vasero vakwe, mmbo lutanaa Yerusalemu, lyo yeni mmutiri-fo waavi, nta kyany kiiyoo kunu Yerusalemu-fo.”