Read BIBILLYA Mareiyo Meele a Iruva NEHEMIA 3 Bible Online

NEHEMIA 3 - BIBILLYA Mareiyo Meele a Iruva bible

NEHEMIA 3

¹Nalyo Eliashibu ulya ekee nkohani nniini kasanga na vakohani vengi vakabooka mashora eetana ngiri yeevaangwaa ya moonri. Vakavika maboo, vakasaleesa myaango fika nnara wa Hamea, vakaamaa, vakayeeremuta, fika nnara wa Hananeli.

²Vandu va Yeriko vakavasorya itana. Na numa yaawo kasha zakuri mwana wa Imri.

³Ngiri ya makunga yo mmbo yetanwa mmwana va Senaa, vakavika maboo neesaleesa myaango ya vayo, na minya ta vayo na misirya ya vayo ya minya.

⁴Numa yaawo ni Meramoti mwana wa Uria, mwana wa Hakosi. Numa-se ni Meshulamu wa Berekia wa Meshezabeli. Numa kalatya Sadoki mwana wa Baana.

⁵Numa ni Watekoi, lyo vasongoru vawo mmbalekunda irundya ishora elyo-fo

⁶Na ngiri ilya ya kasha ikarundyo ni Yoyada wa Pasea na Meshulamu wa Besodeya, vakavika maboo neesaleesa myaango, vakavika minya na misirya ya minya.

⁷Numa yaawo ni Melatia Mgibeon, na Yadoni, Mmeronoti nawo ni va kulya Gibeon, na va Mispa, nawo vekee vandu va ushilyi lwa kwakulya ya mura yeto.

⁸Numa kalattya Usieli mwana wa Harhaya nawe ekee mfuru wa saabu. Kasoryo ni Hanania, ekee umwi wa vesongosia mafura afwaamaa, nawo vakatana Yerusalemu vakafikya isimamba ulya mmbongye

⁹Numa yakwe kasorya Refaya, mwana wa Huri ekee nshilyi wa kyenga kya Yerusalemu.

¹⁰Numa yakwe kasorya Yedaya, mwana wa Harumafu. Numa yakwe ni Hatushi, mwana wa Hashabneya.

¹¹Malkiya mwana wa Harimu na Hashubu, mwana wa Pahat-moabu, vakatanau kyawo ando amwi na nnara wa ando kwa muro.

¹²Kalatyo n'shalumu mwana wa Holeheshi nshilyi wa kyenga kyingi kya Yerusalemu, we kasanga na vefu vakwe.

¹³Ngiri ya imungony mmbo iletanwa ni Hanoni neewo vakee Sanoa, vakasalesa myaango ya vayo, na minyata vayo, na misirya ya vayo na isimamba yeto mwaasha wa ngiri ya mbulula.

¹⁴Na ngiri yeyo ya mbulula ikatano ni Maliya mwana wa Rekabu, nshilyi wa muungo wa Bet-hekeremu, kaitana kasaleesa myaango ya vayo na minya ta vayo na misirya ya vayo.

¹⁵Nawe Shalumu wa Koehose kasongosya ngiri ya ngyusoka, nawe ni nshilyi wa muungo wa Mispa, kasaleesa myaango ya vayo na minya na misirya ya vayo na isimamba yeto wa kirori kya Shiloa kufii na nnda wa mangyi, fika alya fitereny fya muri wa Davidi.

¹⁶Numa yakwe ni Nehemia mwana wa Asibuki, nshilyi wa kyenga kya muungo wa Betsuri fika alya taari iiduvani na fifu fya vafyari va Davidi, fika alya firoriny filesumwa, kundekooya mmba ya vandu vakaari vakee vasikari.

¹⁷Numa ya vayo ni Valevi, Rehuni, mwana wa Bani. Kasorya Hashabia, akee akida wa kyenga kya muungo wa Keila.

¹⁸Numa ya vaye vana va maye vawo vakatana, ni Binui mwana wa Henadadi, nshilyi wa kyenga kya muri wa Keila.

¹⁹Numa yakwe ni Ezeri, mwana wa Yesua, ekee nshilyi wa Mispa, taari ilya yiiduvani na kisike kya fisha yoo isimamba wiidndukye nang'u taari ingi.

²⁰Kasorya Baruki mwana wa Sakai, karunda na nsasari, ukaa yoo mbai ya isimamba fika yoo mwaangony wa mmba ya Eliashibu ulya nkohani nniini.

²¹Kasoryo Mmeremoti, mwana wa Uria, mwana wa Hakosi, uka yoo mwaangony wa mmba ya Eliashibu fika yoo mmba yakwe imandi.

²²Numa yakwe ni Vakohani valerunda, mmbo valeuka ngyurukeny tillya tifitani na Yerusalemu.

²³Vakasoryo ni Benyaminy na Hashubu, taari yeyo ya mmba yaawo. Numa vakasoryo ni Asaria mwana wa Maseya, mwana wa Anania, usumaru na mmba yakwe.

²⁴Numa yakwe kasorya Binui, mwana wa Henadadi, uka mmba ya Asaria fika yoo ilemyony lya isimamba.

²⁵Numa ya vayo ni Palali mwana wa Uasai, fika yoo isimamba ulenyi, fika yoo nnara urooye uwe ya mmba ya mangyi, ikee kufii na kari ka varingi. Numa karunda Pedaya mwana wa Parosho,

²⁶(na Vaneti mmbo vekee Ofeli) fika taari ilya ya mura nnyo taari ya ngama, nung'u na nnara ulollyo.

²⁷Vatekoi vakasorya irunda, taari ilya ya nnara nniini fika mmbombony wa Ofeli.

²⁸Yoo uwe ya ngiri ya frasi mvakohani valerundyan, wo numoi taari ya mmba yakwe.

²⁹Numa yaawo ni Shemaya alelatya, ni mwana wa Shekania, nawe ni nringi wa ngiri ya taari ya ngama.

³⁰Numa yakwe ni Hanania, mwana wa Shelamia, na Haruni, nawe ni mwana wa karindari wa Salafu, Numa yakwe Meshulamu kalatya, ni mwana wa Berekia, taari seyo ya mmba yakwe.

³¹Numa yakwe ni Malkiya nawe ni umwi wa vafuru va saabu, karundyau kandekooya mmba ya Vanetini, na ya veekaba mbusha, taari ilya ya mmba ya vafungwa, fika alya kiryeny kya mbai.

³²Na yoo nnang'ani ya kirya ekyo kya uwe kya mbai na ngiri yeyo ya moonri mmbafuru va saabu na veekaba mbusha valerundyau.