Read BIBILLYA Mareiyo Meele a Iruva ESTA 1 Bible Online

ESTA 1 - BIBILLYA Mareiyo Meele a Iruva bible

ESTA 1

¹Mangyi Ahasuero wa Siria mmbo eshillya uruka uniini nnu uka India fika Esopia yoo nnang'ani, yeekee mmwasi ya myuungo iyana lyimwi makumi avii na mfungare.

²Naasa elyi ekee kulya Shushan, kiriny kya ushilyi lwakwe

³mwaaka wiikee wa kararu wa ushilyi lwakwe, kavikya vashilyi vakwe woose sukukuu niini, na vasikari va Umedi na Siria vakavaangwa-fo.

⁴Nawe mangyi koora veny vakwe umasi lwakwe na findo fyakwe fya itumbe, ando a miiri irindaru sele ewooraa.

⁵Eekimaa kavavaanga shoongeny efo Shushan, veny woose vakakuumbya-fo, vaniini na va-du, ando a mikonu mfungare sele, vekee efo kari ka mangyi.

⁶Nafo mmbo kweefo soori ta bafta shaa pyai na ta buluu teeava kundo kweekaa, nato tikanunutwa na kindo fyoose fisha fifwani sambarau, fikanunutwa ni bangilyi ta fesa na ngo ta vayo n'ta iwe yaa lyimika mikaa. Fitara fyeelaaya fyekee fya saabu neefo si m'mawe amikamikaa a fwana idodorye, shaa ta tyeri na muu.

⁷Vakaniiya wari findony fya saabu, na mfinyu yeto wekee wa kimangyi, shaasa mangyi yeto eetiri maako.

⁸Wo nndu kana shaasa kilensennya we muni kulaifoo ivio mandaany, mashika niindo mangyi alevavasya veefurukanya-u.

⁹Nawe Vashti, nka-mangyi kavikya vaka wooroye sukukuu indo sha mangyi, efo kwakwe.

¹⁰Kwiikifika nkonu wa mfungare, na mangyi shaasa ammiishwa nsia, na mfinyu umwiira nrony, kavavasya vasero vakwe mfungare, mmbo Mehumani, Bista, Harbona Bigta, Abagta, Setari na Karkasi, mmbo veesalallya va efo mmba kwa mangyi Ahasuero.

¹¹Vaandevaanga nka-mangyi we Vashti, nashe mbee ya mangyi eree ureto lwa nka wa kimangyi, naambo vasongoru na veny valya vallollye nawe shaasa akee nsha, mashika lyo mmbo eesenyi deny.

¹²Lyo we Vashiti kalema fushu isha llya alevio ni veesalallya mmba valya va mangyi. Nallyo mangyi karooywany unyafi nnu.

¹³Naasa mangyi kavia vandu varango veeiyo, na valya va urango lwa fyeeri, mashika kyeeri ekyo niindo kyeekai ivesa yewo veeshi uramba.

¹⁴Yoo uvariny lwakwe vakakaau Karshena Shetari, Adimata, Tarshishi, Meresi, Marsena na Memukani, mmbo vasongoru vashilyi va Siria na Umedi, valesha kwakwe sukukuu nawe kavavesa,

¹⁵“A nyira katannywa inda nka yeu wakwa Vashti mashika elyi alema itana ekyo avavasyo mmangyi llya aleruma veesalallya mmba yakwe?”

¹⁶Naasa Memukani karouwa mangyi na vasongoru valya veiyo, “Vashti yeu, akee nka wa mangyi, nshi alyamarya mangyi muni-da-fo, kyeendi ni ando amwi na vashilyi na vasongoru yeva woose, ando amwi na vandu va uruka lwa mangyi Ahasuero woose”

¹⁷Mashika ekyo nka-mangyi akitana mmbo kimanyoo mmbaka woose, nawo mmbo vaminaa womi vawo deny, kyeeri kishemanyikaa mangyi Ahasuero mmbo alevaanga nka wakwe nashe yoo akai, lyo kallemmya isha.

¹⁸Naakwa ni ulaalu vaka yewo va vandu vaniini va Siria na Umedi elyi vammaa yiita kindo ekyo mmbo vatanyaa vashilyi na vasongoru va mangyi indo. Llyony kushekaafo kiila kiniini na iipala.

¹⁹Kweekyo kikansennya mangyi noote ivavasyo, nalyo lyireiyo efo fitabuny fya Vashuri na Vamedi, sheelyi Vashti nalakani na mangyi Ahasuero, nawe mangyi nawonise nka ungi akee nsha mmwasi.

²⁰“Na elyi iranda lyikapwaa urukeny koose efo umangyiny lwakwe, vaka woose nkuti vaindye womi woose vawo, kava n-du, kava nniini.”

²¹Nalyo kindo eki kikasennya mangyi ando amwi na vasongoru woose, nawe katana shaasa Memukani alerera.

²²Nawe karuma barrwa efo myuungony nnya umangyi lwakwe loose, ikeeshireiye ikavikwa woko lwakwe wo vandu na kishomu kyawo vamangyi songosiny, wo nndu nndumi nashillye kyeny kwakwe nisha, naveevambisa mbony yei na kishomu kya vandu vakwe.