Read BIBILLYA Mareiyo Meele a Iruva ESTA 4 Bible Online

ESTA 4 - BIBILLYA Mareiyo Meele a Iruva bible

ESTA 4

¹Naasa Mordekai eekimanya kya uriingi lulya karandwa isara lyakwe kyoora ting'wa. Karaa makunnya neekwaamba ifu kasomuka kandefika alya nnang'ani kavii a muri eeffwaa na unyanga waasha, evavyoo nnu.

²Kookafo kandefika alya mwaangony kwa mangyi, mashika nkwiifoo ashiidimaa yaanga alya kwa mangyi eeree makuunya-fo.

³Na wo ando efo urukeny, weele lulya lulefika lwewaa Vayuda mmbo kulekaafo kyiyyo kiniini efo kwa Vayuda, vakakootoya, vakakapa kyiyyo, vakaveraa makunnya neekwaamba ifu.

⁴Llyo fishinga fya Esta na veesalallya efo mmba kwakwe, vakansheya vakanshunnya mbony tilya toose. Nawe nka-mangyi kating'wa nnu, karikkya Mordekai soori ando a ikunnya llya eeree, kya indi Mordekai nalakunde iwarya.

⁵Kikeeny indo-da, Esta karuma Hataki, ekee mwiisalallya mmba wa mangyi, nrumi nansheye, kammbavasya nandesununda Mordekai kya mbony toose shaasa tikai.

⁶Nalyo Hataki kasora Mordekai alya eekai mbee ya mwaango wa mangyi.

⁷Mordekai kavia Hataki findo fyoose fileutika na kyaasa Hamani alevika kya ivika fesa mbolokony ya mangyi naambo Vayuda vamamitwa deny.

⁸Kanniingya barrwa sha ilya sheni yeevavasya Vayuda vamamitwa ilya ilevambiswa kulya Shuhsan, noore Esta, na imbya mbony toose, naambo nandeongoya mangyi, naterevye na vandu vakwe varewa na muu.

⁹Naasa Hataki kasheya Esta kambya mbony ta Mordekai.

¹⁰Na Esta karera na Hataki kanruma lyingi kwa Mordekai nandembia indi,

¹¹Mashinga moose a mangyi mmbo eeshi nisha nnu, na vandu va uruka lwa mangyi woose mmbo veeshi sheelyi nndu moose asheshaa neefo kari kwa mangyi, kava nka ao nndumi nalakeembaange yaanga kwa mangyi, kyakwe nkimwi nsi, nkuti nawaawa, kuuta yeto mangyi ashemoolongyaa nsengye wakwe wa saabu nakie muu, neeny nta nshilevaangwa shaange na kwa mangyi-fo ulaalu ni mikonu makumi araru sele yammiirau.

¹²Naasa vakandevia Mordekai marero a Esta.

¹³Na Mordekai karumya Esta rumi ya imwiisa, “Yewe kulasheekusara mmbo kushekyiyyaa efo kwa mangyi Vayuda vengyi veewaawaa-fo.

¹⁴Mashika lyo naakwa kwamalallya ulaalu, Vayuda mmbo vasheonaa shia ingyi ya ivakira, lyo yewe kumuni mmbo kushemamikaa ando amwi na vandu va ufyari lwafo woose. A lyo mmbi eeshi kwakooya mmbo kuleva nka-mangyi naambo kukire vandu vafo kyeeri ekyi?”

¹⁵Na Esta kavaruma vandevia Mordekai indi,

¹⁶“Endesanyirya Vayuda woose va Shushan, mukootoye ando a mikonu iraru mulalyaa nta ina kindo, kio na nsanyiny, neeny na fishinga fyakwa mmbo lutanaa indo, llyo shaangeny na kwa mangyi lla neelyi shilatiri muumu, kwakooya shawaawa, na shiwaawa.”

¹⁷Naasa Mordekai keenda katana fyoose shaasa Esta alembavasya.