Read BIBILLYA Mareiyo Meele a Iruva ESTA 8 Bible Online

ESTA 8 - BIBILLYA Mareiyo Meele a Iruva bible

ESTA 8

¹Nkonu yeto mweni mangyi Ahasuero karambikya Esta masaa moose a Hamani nkiduva va Vayuda. Llyo Esta kavia mangyi sheelyi Mordekai mmbwe ellela na mmbwa ufyari lwakwe. Kuuka yaa, Mordekai kaniingwa mwaanya wa ikwanannya na mangyi.

²Naasa mangyi kaambwa nrashi ilya esoka Hamani kaniingya Mordekai nawe mwiisalalya mmba ya Hamani.

³Lyingyi-se, Esta karera na mangyi, kavo si mbee ya mangyi eiyaa kantereva naalashe makusaro yoo makasha Hamani Mwaakaki enkusarya vayuda.

⁴Llyo mangyi kamwolongya nsengye wa saabu, Esta kasalala mbee ya mangyi.

⁵Kaamba, “Mangyi mbee, kwakooya kyakusennya na irero lyakwa lyikankusennya neekyo nkeyaamba kwankiirikya, naasa ireiyo barrwa yeelema filya Hamani wa Hamedata alevavasya, kaamba Vayuda varumatwa woose kunu urukeny lwa mangyi.

⁶Mashika mmbo nshiidimaa inda ilola uravi sha elo lwiishye vandu vakwa shimalallye?”

⁷Nalyo mangyi Ahasuero kavia Esta na Mordekai, “Shammaa irambikya Esta ushilyi lwa mmba ya Hamani, nawe ammaa ivanikwa nrii-u, mashika a elyi aleriingya Vayuda.

⁸Kyasia reiyeny Vayuda rumi yeyo mukundaa muveni na irina lya mangyi, muvikeny kiringisyo kya rashi yakwe; mashika barrwa itiri kiringisyo kya rashi ya mangyi wo nndu mmbo ayiirikyaa.”

⁹Nalyo veereiya mbony valya va mangyi vakavaangwa swany wikee nkonu wa makumi avii na kararu wa mwiiri wa kararu uvangwaa Siwani, shaasa Mordekai alevavasya, Vayuda woose vakareiyo, ando amwi na vasongoru vawo na vaniini va uruka va India fika Esopia, myuungo iyana lyimwi makumi avii na mfungare wo muungo na kishomu kyawo.

¹⁰Barrwa tikareiyo na irina lya mangyi Ahasuero, kikavikwau kiringisyo kya rashi yakwe, tikarikwa varumi veerishisa vesaamye frasi ta mangyi muni tiirishiswaa.

¹¹Efo barrweny yeto Vayuda vakaniingwa muumu weekusanyirya wo muri, naambo vafishe kyama kyeewaana na vakiduva vawo, ilyamara, ishisha, na irumata itorito lyoose ao muungo moose uvawoyaa wo, vaka na vana vawo na iipoo findo fyawo.

¹²Nalyo nkonu umwi, wikee nkonu wa ikumi na kararu mwiiri wa ikumi na kavii, nto uvangwaa Adari.

¹³Barrwa yeyo yekapa weele wo ando ushilyiny lwa Ahasuero, wo nndu keeta, na Vayuda kiwo, naambo vakudeesye nkonu yeto weetaiya vakiduva vawo.

¹⁴Varumi valya vakeenda vasaamye farisi tirishaa tilya ta mangyi muni, vakakamara ivavaso lya mangyi, weele lukandekabwa kulya turuveny ya Susa.

¹⁵Naasa Mordekai kooka alya kwa mangyi eree masara a kimangyi a fwana ya buluu na shaa, aree na kofia niini ya sahabu, na ikoti iniini lyifwani sambarau. Susa shoose ikakaba ukoru.

¹⁶Kwa Vayuda kukakya, vakatirwa ni nsia nniini.

¹⁷Wo ando urukeny neefo miriny kundo ivavaso lya mangyi lyileitiwa, Vayuda vakafura neekyesa nnu, vakavika sukukuu niini. Nalyo vandu veengi vakakunda yaaluka vave Vayuda, kimaruma kya yeereya Vayuda.