Read BIBILLYA Mareiyo Meele a Iruva YUUKA 11 Bible Online

YUUKA 11 - BIBILLYA Mareiyo Meele a Iruva bible

YUUKA 11

¹Nndumi Iruva kavia Mose, “Ulaalu yiifo ngapo imwi yasaa-fo, nayo nsheyenngyee Farao na Misri shoose, na numa ya vayo ashemuningaa mumu muuke kunu, nawe kyeeri ashemuningaa mumu mmbo ashemuumbutaa deny muuke kunu.”

²Naasa yewe rerya vandu yeva veete wo nndu nndumi na uroye na wo nndu nka na uroye navie yeto ungyi nanningye fiiya fya saabu na fya fesa.

³Nndumi Iruva kaelelisa Vamisri vakavairikkya, kilanya yeekyo Mose kava nndu wa itumbe deny kulya Misri mbee ya varundi va Farao na mbee ya vandu vakwe.

⁴Mose kaamba, “Nndumi Iruva mmbo aamba indi, ‘Kwikee kio nnang'ani mmbo nshiraa kwa Vamisri,

⁵na vana vavee woose va Misri mmbo vashefwaa, kupookye mwana mmbee wa Farao yeto muya umangyi, kutani kwafikkya mwana mbee wa kishinga yekyo kyitiri iwe lyesa nswa, na kindo kivee kyoose kya findo fya mmba na mafisi a ngoroshony.

⁶Llyoony kushekaa-fo kiiyo kiniini urukeny lwa Misri koose, kulaore kilenkaa-fo uka elyo, nta nkishelollywaa-se sheekyo-fo.’

⁷Kyeendi efo kwa vana va Israeli nta kite kyeni nkishesomutaa ulumi-fo, nta findo fyawo-fo, nkyo naambo mushelollya shaasa Nndumi Iruva arauwaa Vamisri na Vaisraeli,

⁸Na varundi yewo vafo vasheshisheyaa yeny, na ishifiirya ndi, veshaamba, ‘Kweete yewe na vandu yeva vafo woose; numa ya vayo neeny nsheuka-fo, Naasa kauka kwa Farao eetirwa nnyashi nnu.’”

⁹Nndumi Iruva kavia Mose, “Farao nyashemwaarannya-fo, naambo ngyende takwa tishefumbuka urukeny lwa Misri.”

¹⁰Mose na Aron vakatana ngyende yeto toose mbee ya Farao. Nndumi Iruva kaumisa nrima wa Farao, nawe nalaniinge vana va Israeli mumu wa yuuka urukeny lwakwe.