Read BIBILLYA Mareiyo Meele a Iruva YUUKA 13 Bible Online

YUUKA 13 - BIBILLYA Mareiyo Meele a Iruva bible

YUUKA 13

¹Nndumi Iruva karera na Mose kammbia,

²“Eremuta vana vavee woose va kyuumi efo kwa vana va Israeli, na uvee lwa findo fyeevikkya fyoose, yefyo mfyakwa.”

³Naasa Mose kavia vandu, “Kumbweny nkonu yeu, nto nkonu muleuka Misri, efo mmbeny ya ushinga, kyuuka na woko lwa finya lwa Nndumi Iruva mmbo alemweende yaa mmbushelyiwaa nkate utiri ntarang'o-fo.”

⁴Neeni mmbo mukee yuuka Misri enu mwiiri wa mbee eto uwaangwa wa Abibu.

⁵Naasa kyeeri Nndumi Iruva ashemwendee namufite efo urukeny lwa Vakanaani, na Vahiti, na Vaamori na Vahifi, na Vayebusi, uruka yelo aleniinga vande vafo kyeyaamba mmbo ashekuniingaa yewe ni uruka lushoshoka malela na wukyi, llyo mushevikaa suku-kuu yei wo mwaaka wikee mwiri wa Abibu.

⁶Mmbo mulyaa mikate ilatarang'aa ando a mikonu mfungare, nato nkonu eto wa mfungare mmbo ushevaa suku-kuu ya Nndumi Iruva.

⁷Mikate ilatarang'aa mmbo ishelyiwaa ando a mikonu yeyo mfungare, nkate utiri ntarang'u ulalollywa kwany-fo, nta ntarang'u ulalollywa-fo, efo kwafo-fo.

⁸Na nkonu yeto mmbo kushevia mwana wafo, kwaambe, “Ni kimaruma kya yefyo Nndumi Iruva aleshitannya kyeeri Nndumi Iruva aleshuuta kulya Misri.”

⁹Mmbo suku-kuu yeyo ishevaa sha wende yoo wokony lwafo na kindo kya ikummbwa yoo nnang'ani a miso afo, nalyo ivavaso lya Nndumi Iruva lyilawiike kaniny kyafo-fo, mashika ni woko lwa Nndumi lutiri finya lulekuuta urukeny lwa Misri.

¹⁰Kweekyo mmbo kusheringaa ivavaso elyi kyeeri kya vayo wo mwaaka.

¹¹Naasany kyeeri Nndumi Iruva ashekufitaa efo urukeny lwa Vakanani shaasa alekuvikkya kyaasa yewe na vandoo sheelyi ashekuniingaa,

¹²llyo kushevikkyaa Nndumi Iruva findo fya mbee fiwonkikye fyoose, efyo fya kyuumi fyoose mmbo fishevaa fya Nndumi Iruva.

¹³Nshungu wa mbee mmbo kusheewalashaa na suva na kwakooya, kulakunndye yaalasha llyo kushefishaa singo, na wo mwana mmbee mmbo kushemwalashaa.

¹⁴Naasa fyeeri fishaa elyi mwana wafo ashekuvesaa, “Ifura elyi llyeekyi?” Llyo kushemmbyaa, “Nndumi Iruva mmbo aleluuta Misri kwi-finya ya woko lwakwe, kulya mmba ya ushinga.”

¹⁵Naasa kyeeri Farao aleumisa ngoo nalwiime mumu wa yuuka-fo, Nndumi Iruva kakapa fyuumbe fyoose fya mbee fyekee Misri, fya vandu na fya findo fyeevikkya, kimmba ni indo nkyo kimaruma shautya Nndumi Iruva findo fyoose fya mbee, fikee fya kyuumi; kyeendi vana vavee woose wo mmbo nshevikaa kindo kingyi ando awo.

¹⁶Kindo ekyi mmbo kishevaa ni kiringisyo wokony lwafo, na kilola efo misony afo, mashika Nndumi Iruva mmbo aleluuta Misri kwa wiidimi lwa woko lwakwe.

¹⁷Naasa kyeeri Farao alelekeya vandu yewo vakweengye, Iruva nnyalekunda valatye shia ya Vafilisti-fo, lla llya yekee shifii yiira urukeny lwawo, mashika Iruva mmbo alekusara, “Vandu yeva mmbo vashefwaa nrima kyeeri vashekwanannyaa na fira vawuye lyingyi Misri.”

¹⁸Kyeendi Iruva kavatetera valatye shia ya iringitya-irunguka mbai ya yeeve lya Shamu, Vana va Israeli vakasaama vauka Misri veerye fisha.

¹⁹Mose keepoo mafua a Yosefu keenda eerye mashika alelyisya nnu vana va Israeli mboo, kavavia, lyo Iruva nkuti namukummbwe neeni lyo mulare mulaipoo mafua akwa uka Misri-fo.

²⁰Nawo vakeenda wooka Sukoti, vakamannya ulale Elamu, nnyanu na yeeve ilya.

²¹Nawe Nndumi Iruva kavasongoya nsanyiny na ngo ya ifishi, na kio kavasongoya na ngo ya muro.

²²Ngo ilya ya ifishi nyileuka-u nsanyin-fo, nta ngo ilya ya muro kio-fo, mmbo ilesongoya vandu yewo.