Read BIBILLYA Mareiyo Meele a Iruva YUUKA 15 Bible Online

YUUKA 15 - BIBILLYA Mareiyo Meele a Iruva bible

YUUKA 15

¹Llyo Mose na vana va Israeli valeimmbya Nndumi Iruva kyiimbo ekyi, vakarera vakaamba, Mmbo nshiimbyaa Nndumi Iruva mashika elyi atiri nnduma nnu; Frasi na mwisaama frasi vammeerwa nruveny,

²Nndumi Iruva ni finya yakwa na kyiimbo kyakwa, Mmbwe ammba ukiro lwakwa, We ni Iruva wakwa, neeny nshenrumishaa, Ni Iruva wa vande vakwa neeny nshen'ganisaa.

³Nndumi Iruva ni nndu wa fira, Nndumi Iruva llyo irina lyakwe.

⁴Makari a Farao na ironda lyakwe ambeerya yeeveny, Vashilyi vakwe vasauwe vanrekkya yeeveny ya Shamu.

⁵Ngyuroo ta mura tambamira, Mmbo valerekkya-fo sha mawe.

⁶Nndumi Iruva woko lwafo usha mmbo lulewonisa nnduma wa wiidimi, Nndumi Iruva woko lwafo usha mmbo lulefota-fota vakiduva,

⁷Kyeendwa ni uniini lwafo kwatuula vakiduva vafo, Kwavarwaaya unyafi lwafo nawo vakava sha makenya moomu.

⁸Mura eto mmbo ulesaleeswa ni mumuyo eto aleuka efo mmbweny yafo, Matundulu akasalala sau sha isimamba. Na ndilyi ikauma bony efo si yeeveny.

⁹Nkiduva mmbo aleamba, “Ra shilatye, shiwonise, Shaave mifungwa, Na nrima wakwa ushewutiswaa mfyo, Mmbo nshesommwaa usu lwakwa, Woko lwakwa luvamamite.”

¹⁰Llyo kulevivita uraato lwafo, yeeve ikavamira Vakarekkya sha songoro efo ndilyiny shaasha.

¹¹Woi Nndumi Iruva, efo kwa maruva moose, ni vi akuvakkye? Ni vi akee sheewe, alyimmbye akee mweele? Yeto atiri nnduma na mwitana ngyende ungyi mmbi?

¹²Mmbo kuleorrwa woko lwafo usha Uruka lukavamira.

¹³Yewe kyeendwa ni ulyilyi lwafo mmbo kuletetera vandu Vafo kulevawouwa, Kyeendwa ni wiidimi llwafo kwa kwavasongoya vafikkye marembo afo.

¹⁴Ngyufyari ta vandu mmbo vamiita, Nawo ekawo vakeererema, Yewo vakee Ufilisti usu mmbo lukeevavavisa.

¹⁵Na vamangyi va Edomu mmbo vakeefulukkywa, Vandu va Moabu yewo vatiri finya weerei lwammbatira Vandu woose yewo va Kanaani vammangara.

¹⁶Weerei na usau lwambawoya, Kyeendwa mbwiidimi lwa woko lwafo mmbo vammalallya sau sha iwe, Kutani vandu vafo veera yewo kulevaura.

¹⁷Mmbo kushevaata-fo na ivasaamisa ifumbuny lya ding'u Yaawo. Ando alya kulekudeesya, Woi Nndumi Iruva naambo awe afo ekaa. Ando alya eele kulevadeesya, na woko lwafo, Woi Nndumi Iruva.

¹⁸Nndumi Iruva asheshillya llung'anu na llung'anu.

¹⁹Mashika frasi ta Farao na mitika na vesaama frasi, Vakasiiya yeeveny, Nndumi Iruva kavaviirya mura wa yeeve, Kyeendi wo vana va Israeli vakeenda ando kwaarutu efo yeeveny nnaang'ani.

²⁰Na Miryamu, nkisuku wa kyika mfwamaye wa Aron, kaipoo ngoma shidu vaka vakasomuka woose vakallatya, veerye ngoma veekapaa neefina.

²¹Miryamu kawarya kaamba, Imbieny Nndumi Iruva mashika anrumishwa nnu; Frasi na mwisaama frasi ammbeera yeeveny.

²²Mose katetere Israeli veendembee vauka yeeve lya Shamu, nawo vakashefika kasa ka Shuri, vakeenda kyaaro kya mikonu iraru valalollya mura.

²³Llya valefika ando avaangwa Mara valaidimi ina mura wa Mara mashika ntaran'go, nkyo kimaruma kwevaangwa Mara.

²⁴Nawo vandu vakakunun'gunnya Mose vakaamba, “Lukana-kyi ulaalu?”

²⁵Mose katereva Nndumi Iruva, Nndumi Iruva kamoora ando ukee nri, nawe kavika nri ulya kulya mureny nato ukava ina. Naasa kavavikkya ivavaso, kaveesa,

²⁶kavavia, “Kwakooya mushearannyaa unyanga lwa Nndumi Iruva na usau, we Iruva wafo, neetana kya woorotu mbee yakwe, na iloota kuri kwaarannye mavavaso akwe, yeny nshishekweengyee ndwari-fo sha elyi shiletannya Vamisri-fo; mashika yeny ni Nndumi Iruva yeto mwishiisa.”

²⁷Vakafika Elimu ando kwetiri ngyusoka ikumi na ivii, na myaangashi makumi mfungare, vakamannya ulale yoo kufii na mura.