Read BIBILLYA Mareiyo Meele a Iruva YUUKA 16 Bible Online

YUUKA 16 - BIBILLYA Mareiyo Meele a Iruva bible

YUUKA 16

¹Naasa vakauka Elimu, na ironda lyoose lya vana va Israeli vakafika kasa ka Sini ikee nnang'ani ya Elimu na Sinai, kwikee nkonu wa ikumi na karaanu wa mwiiri wa kavii llya vemmaa yuuka urukeny Misri.

²Naasa ironda lyoose lya vana va Israeli lyikakunung'unnya Mose na Aron alya urukeny wuumu,

³vana va Israeli vakavavia, “Kyeevaa kyeni kukooye Nndumi Iruva aleluwaiya kulya Misri, kyeeri kilya lwekee na safuria tilya ta nyama, llya lwekeelya shoonga lukawuura, nkyiki elyi muleluuta kulya mukalweende yaa kuumu, naambo muluwaiye yaa na shaa nsemu yeu moose wa vandu.”

⁴Naasa Nndumi Iruva kavia Mose, “Lola, nshemoolotyaa nkate uuka iruveeu sha mmbwa, na vandu yewo mmbo vashesomukaa varorrwe wo nkonu shoonga yamaa nkonu umwi-nsi, naambo shimweese, kwakooya mushelatyaa mavavaso akwa, ao oode.

⁵Na nkonu wa karindaru vashedeesyaa efyo vasherorrwaa, nafyo five kavii yeefyo varorrwaa wo nkonu.”

⁶Mose na Aron vakaongoya vana va Israeli woose, inu nkwaany llyo mushemanyaa dede Nndumi Iruva alemuuta kulya Misri,

⁷na ngama llyo mushelollyaa itumbe lya Nndumi Iruva, mashika we ammiita nkunun'gunu wany, shaasa mulekunun'gunnya Nndumi Iruva, neese ni vaki, kutani mwalukunun'gunnya?

⁸Mose kaamba, “Na mmbo kisheendaa inda, kyeeri Nndumi Iruva ashemuningaa nyama nkwaany naambo mulye, na ngama mikate, musheritwa nrima Nndumi Iruva asheitaa nkunun'gunu wany shaasa mulenkunun'gunnya we, Yese ni-vi? Nta nshi yese-fo, ni Nndumi Iruva mulenkunun'gunnya.”

⁹Mose kavia Aron, Kyasia, Rera na ironda lyoose lya vana va Israeli, Serikyeny kufii na Nndumi Iruva, mashika we ammiita nkunung'unu wany.

¹⁰Naasa kyeeri Aron alerera na ironda lyoose lya vana va Israeli, vakalola taari ya nn'galo, vakalollya itumbe lya Nndumi Iruva lyikee ifishiny.

¹¹Nndumi Iruva karera na Mose kammbia,

¹²“Shammita nkunun'gunu wa vana va Israeli; kyasia, rera nawo kuvavie kyeeri kya nkwaany mmbo mushelyaa nyama, na kyeeri kya ngama mushewuura mikate, neeni llyo mushemanyaa dede yeny ni Nndumi Iruva, Iruva waany.”

¹³Naasa kyeeri kya nkwaany ngwale tikasha tikakwaana yoo ulaleny, na kyeeri kya ngama laura ikakwaana koose yoo ulaleny.

¹⁴Na kyeeri laura ilya iletuturyo, ate mfindo fikuu-mbumbye fiingyi.

¹⁵Kyeeri vana va Israeli valefilollya vakakuvesa veni na veni, “Nkyokyi eki?” Mashika mbalemanya kindo kyeni-fo. Mose kavavia, “Nto nkate Nndumi Iruva amurikkya muulye?”

¹⁶Nndumi Iruva mmbo alevavia indi, “Rorrweny yeni wo nndu kiinani na millyiiye yakwe, wo nndu lita ivii, shaasa mufye efo mmba, niindo mushetanaa, wo nndu shaasa vandu vakwe vafye efo yeemeny.”

¹⁷Vana va Israeli vakatana indo, vakarorrwa, vengyi vakafumbuta, vengyi vakanyiisa.

¹⁸Naasa kyeeri valeesa na bakuri, ulya alefumbuta nnyalesaaywa nkindo-fo, nta yeto alerorrwa kyaangu nnyaleanguywa-fo. Wo nndu karorrwa kiinani na milyiiye yakwe.

¹⁹Mose kavavia, “Nta kulave nndu asurumaa fika elyi lya ngama.”

²⁰Lyo mbaleita kilya Mose alevavia-fo, vengyi vawo vakasuruma fika ngama nayo ikaruka nndakwe na iraa, Mose kasua deny,

²¹Naasa vakarorrwa wo ngama wo nndu kiinani na milyiiye yakwe, na kyeeri mwi ulekora mmwasi filya filesaa yoo sumbai fikeeka.

²²Nkonu wa karindaru vakarorrwa shoonga ya mikonu ivii, na lita yiinya wo nndu. Vasongoru woose va ikwaanu llya vakandevia Mose kya mbony yei,

²³nawe kavavia, “Nndumi mmbo aamba ndesi ni nkonu ukee mmbike mweele kwakwe wa yiimuya. Kaareny inu ekyo mukunndye ikaara, mukasambuta neekyo mukunndye isambuta inu, neefyo fisaa-u mufisurumi five fya ndesi.”

²⁴Nawo vakalatya ndesa Mose alevavia, vasurumi fika ndesi, nafyo mfilepwaa nta yeende makuru-fo.

²⁵Mose kaamba, “Lyeny shoonga yei inu, mashika inu ni Sabato ya Nndumi Iruva, shoonga yei mmusheilollya lyingyi-fo.

²⁶Sangiryeny shoonga ya mikonu irindaru, mashika nkonu wa mfungare mmbwa iimuya, mmushekilollyaa-fo.”

²⁷Naasa nkonu wa mfungare vandu vakeenda vanderorrwa shoonga valakooye,

²⁸Nndumi Iruva kavia Mose, “Mmbo mushelemaa ilatya mavavaso akwa indo fika indii?

²⁹Loleny, kimmba Nndumi Iruva alemuniinga Sabato yei, nkyo kyimaruma nkonu wa karindaru kamuninga shoonga yamaa mikonu ivii, wo nndu nakaa ando akwe, kulave nndu auka yoo kwakwe nkonu yeto wa mfungare-fo.”

³⁰Naasa vandu yewo vakaimuya nkonu yeto wa mfungare.

³¹Vana va Israeli vakavaanga shoonga ilya ni Mana, nayo mmbo yeevakkye mbekye ta ntama, fyaa pyai, na nrolo wa vayo ukava sha nrolo wa mandasi a wukyi.

³²Mose kaamba, Elyi ni irero Nndumi Iruva aleluvavasya, omeri na efa imwi ya shoonga yeyo isurumo ishoorwa vana vany kyeeri kya numa, naambo vashelollya shoonga yeyo shilemuniinga efo kasa kyeeri kilya shilemuuta kulya Misri.

³³Naasa Mose kavia Aron iboo ikopo, kuvike-fo omeri na efa imwi ya Mana, kuivike mbee ya Nndumi Iruva, iringwa kufike marika any a numa.

³⁴Shaasa Nndumi Iruva alevavasya Mose niindo na Aron alevika yoo mbee kya ukureeki iringyo-u.

³⁵Vana va Israeli mmbo valelya Mana ando a myaaka makumi aana, fika kyeeri kilya valekooya uruka lutiri vandu, vakalya Mana ilya, kutani llya valefika minyanuny ya Kanaani.

³⁶Omeri yeyo ni kyenga kya ikumi kya efa.