Read BIBILLYA Mareiyo Meele a Iruva YUUKA 17 Bible Online

YUUKA 17 - BIBILLYA Mareiyo Meele a Iruva bible

YUUKA 17

¹Ironda lyoose lya vana va Israeli lyikauka uruka lwa Sini na marende shaasa Nndumi Iruva alevavia vakafika Refidimu, nan'gu nkweiyo mura weena-fo.

²Vakasalala na Mose vakaamba, “Ende mura lune.” Mose kavavia, “Nkyiki elyi mukeesheesa? Niinda elyi mukeekunun'gunnya Nndumi Iruva?”

³Vandu vakatirwa nyura, nawo vakakunun'gunnya Mose vakaammba, nkyiki elyi kulelusaamisa luuke Misri, kusheluwaa na nyura yese na vana veru na findo fyeru?

⁴Mose kaiya na Nndumi Iruva kammbia, “Shatannya-ki vandu yeva mmbee? Mashika ulaalu nkufii vashikape na mawe.”

⁵Nndumi Iruva kammbia, “Ira mbee ya vandu yeva kuute-u vamiku maata va Israeli, na mbiiri ilya yafo kulekapa nayo mura, kweende nayo wokony.

⁶Neefo lola nshesaleesaa-fo mbee yafo ngereko ya iwe efo Horebu, neewe kusheikapaa, na mura usheukaa-fo, naambo vandu vani.” Mose katana indo vamiku ewo va Israeli velollye.

⁷Ando alya vakafisha-u irina ni Masa, na Meriba, kimaruma kya ufiri lwa Vana va Israeli, mmashika llya valeesa Nndumi Iruva, vashambaa, “Nndumi Iruva akee neese ao ode?”

⁸Naaasa kyeeri ekyi Vamaleki vakasha, vakakapana na vana va Israeli alya Refidimu.

⁹Mose kavia Yosua, Lusauye vandu, kweende nawo kundekapana, na ndesi mmbo nshesalala uwe ya ifumbu lilya alya, na mbiiri ilya ya Iruva nsheitiraa wokony lwakwa.

¹⁰Nalyo Yosua katana shaasa Mose alemmbavasya kandekapana na Vaameleki, na Mose, Aron na Huri vakasaama kulya uwe ya ifumbuny lyilya.

¹¹Naasa kyeeri Mose ammiipo woko-uwe, Israeli vakavinga, kammolota woko-si, Vaameliki vakavinga.

¹²Ni llya maako a Mose ekeyaaraa, naasa vakoonndwa iwe vakalyivika yoo-si Mose kalyikaya. Aron na Huri vakakaa taari yei na yei vakaorrwa maako a Mose na uwe kutani kyeeri mwi uleolokkya,

¹³Yosua kamamita Vaamaleki na usu, ando amwi na vandu vawo.

¹⁴Nndumi Iruva kavia Mose, “Reiya mbony yei kyitabuny kya mikumbuye naambo ilareke, kuringisye Yosua mbony yei, sheelyi mmbo nshevarumata Vaamaleki deny yaa ulaniny valakilollywaa-se.”

¹⁵Mose katannya kitara kyerasya kakivaanga, “Nndumi Iruva ni Bendera yakwa”

¹⁶kaamba, “Nndumi Iruva alelya mboo, Nndumi Iruva mmbo ashevaa mwikapana fira na Vaamaleki wo irika lya vandu.”