Read BIBILLYA Mareiyo Meele a Iruva YUUKA 21 Bible Online

YUUKA 21 - BIBILLYA Mareiyo Meele a Iruva bible

YUUKA 21

¹Na mavavasyo kushevikaa mbee ya vandu yeva n'gu yaa.

²Kwakooya kwaura ishinga Mwebrania, mmbo ashekurunndya ando a myaaka irindaru, mwaaka wa mfungare mmbo asheukaa kwafo neende ekee nleke.

³Kwakooya mmbo alesha kwafo akee muni, mmbo asheukaa-fo ekee muni, kwakooya erie nka, nka yeto wakwe mmbo ashendaa, eriani nawe,

⁴Kwakooya ni yeto muni kyeny enninga nka yeto, nawe kamwiirya vana va kyuumi na va kyika naasa nka yeto na vana vakwe mmbo vashevaa va Nndumi Iruva yeto muni kyeny na nndu yeto mmbo ashendaa muni.

⁵Kyeendi ishinga elyo lyikammaamba paa yeny shikunndye nndumi wakwa na nka wakwa na vana nshikunndye ilekwa sheende-fo,

⁶llyony nndumi yeto wakwe ashemwendee mbee ya Iruva yoo mwangony, ao yoo kyeekony kya mwango, na nndumi yeto wakwe nandoshe kuri na mfuma, llyony neengere indunndya.

⁷Kwakooya nndu akunda mwana wakwe wa kyika nave kishinga, nnyashendaa sha mwana wa kyuumi-fo.

⁸Kwakooya nndumi wakwe alasennywa mmbwe, ave nka wakwe namoore, lyony asheirikkyaa nalekeywa, nnyatiri wiidimi lwa inkumba neende kwa vandu vengyi-fo, mmbo kivaa sheelyi mmbo antannya kya ulembi.

⁹Kwakooya mmbo afingye mwana wakwe, mmbo ashentannya shaasa atannyaa vana vakwe muni.

¹⁰Na kwakooya mmbo akunndye yoora nka ungyi, shoonga yakwe yeto na soori takwe na findo fyoose fikwaani na nka nammi sheeto ungyi.

¹¹Naasa kanra nalantannya indo findo efyo firaru llyo ashenraa neende, lyo nnyasheviirywaa masaa-fo.

¹²Kwakooya nndu akapa nndu ungyi kafwa, nkuti nawe nawaa-wa.

¹³Kyeendi kwankooya mmbo ileva nrenga kulore mmbo alellaaya, indi Iruva kammbika maakony afo nshekooraa kundo asherishyaa.

¹⁴Kyeendi nndu asora ungyi kya unyafi naambo nandemmbwaa kya nkuushu karishya mmba ya Iruva mmbo ashesomutwaa-fo nandewaa-wa.

¹⁵Nndu yeto ashekapaa ndeye ao maye kuti nawaa-wa.

¹⁶Nndu kaiva ungyi naambo nankumbe, ao ashekooywa kwakwe kuti nawaa-wa.

¹⁷Yeto ashelyisyaa ndeye mboo ao maye kuti nawaa-wa.

¹⁸Vandu vakasakkya, na umwi kakapa ungyi na iwe ao ng'unde, lyo nalafwe, lyo kalala kitareny,

¹⁹kyeeri ashekwiipoo ny yeenda na nsengye, yeto mwinkapa narewa lyo nataa mikonu yeyo yakwe alereta, nooke-fo nammbavare kutani ashia.

²⁰Na nndu kakapa ishinga lyakwe, ao kishinga kyakwe na mbiiri nawe kafwa nkuti nataiywa,

²¹kyeendi kwakooya ashia ando a nkonu umwi ao ivii nalataiywa-fo, mashika mmbwakwe.

²²Kwakooya womi vakapana vakavavisa nka akufinngye kutani akapa urende lyo nalammbavise mmwasi, nkuti yeto ammbavisa natae kilya mmi wa nka yeto ashambaa lyo nkuti kiinani shaasa valerummbwa mwaandu.

²³Kyeendi kwakooya avaviswa mmwasi, llyo ashetaa muu kwa muu,

²⁴iriso kwa iriso, iyoo kwa iyoo, woko kwa woko, urende kwa urende.

²⁵Irumata kwa irumata, kishavere na kishavere, ibushuka na ibushuka.

²⁶Kwakooya nndu akapa ishinga lyakwe iriso, ao iriso lya kishinga kyakwe na ilyikasheesa, mmbo ashellekaa kyeendwa ni iriso elyo lyakwe.

²⁷Ao kakapa ishinga lyakwe kamwiillwa iyoo, ao iyoo lya kishinga kyakwe, mmbo ashenraa kyeendwa ni iyoo lyakwe.

²⁸Kwakooya ng'umbe yakapa nndu Nndumi ao nndu nka na wombe, nawe kafwa, ng'umbe yeyo mmbo ishewaa-waa na mawe, nyama ya vayo ilalyiwa-fo; kyeendi we muni ng'umbe nakureeywa.

²⁹Kyeendi kwakooya ng'umbe yeyo niindi iishivye ikaba vandu, na muni wa vayo ammivywa lyo nalasare, nayo ikawaa nndu nndumi ao nka, ng'umbe yeyo mmbo ishewa-waa na mawe, na muni wa vayo nawe navewaa-wa.

³⁰Kwakooya ndela yakundika kwa nndu, llyony naniingye kya ivauwa muu wakwe.

³¹Ao kwakooya ng'umbe mmbo yakapa mwana wa womi ao wa kyika na wombe ikandosha ru-ru, ng'umbe yeyo mmbo ishetannywaa indo.

³²Ng'umbe ikadosha ishinga ao kishinga na wombe, muni ng'umbe mmbo ashetaa muni ishinga makumi araru ta fesa, na ng'umbe yeyo ishewaa-wa na mawe.

³³Kwakooya nndu ashesumaa irina, nare nalalyisikkya, na ng'umbe ao nshungu usheoloka-fo,

³⁴muni irina mmbo ashetaa, asheninngya yeto muni ng'umbe fesa, na kindo ekyo kilefwa kive kyakwe.

³⁵Ng'umbe ya nndu ikakapa ng'umbe ta nndu ungyi nayo ikafwa. Mmbo vashekumbaa ng'umbe yeyo ikee na muu na yaava uuru lwa vayo, na ng'umbe yeyo yafwa nayo mmbo vasheyaavaa,

³⁶Kyeendi kwakooya kyiishiwa sheelyi ng'umbe yeyo mmbo yiishivye ikapa na mbembe, kyeendi muni wa vayo nalasare, llyo muni ashetaa ng'umbe na ng'umbe, na ng'umbe yeyo ifiiye ive yakwe.